آغلا گُوزوم حسینی گُور آلِ عَبادَن آیریلور
شاهِ شَهید زینبِ بَختِ قَرادَن آیریلور
باشلیوب آلِ مُصطفی داد و فَغان و شُور و شین
یانمَش اُورکلَر چَکر قَلبیدَن آهِ آتَشین
وَجهی بُو دور که حضرتِ خِیرالَانامَه جانشین
نایبهء ستم کِشی خِیر نَسادَن آیریلور
حَسرتیلَه او تَشنه لَب خوردا اُوشاق لارا باخور
اِیستوری گیزلَدَه وَلی اَشگی دایانمُوری آخور
آهِ سکینه یاندیرور قَلبِ شَریفینی یاخور
بیر اِیله مهربان آتا نازلی بالادَن آیریلور
مَجملی مَطلبین بُو دور سُوزدَه چوخ اُولماسین صَداع
مَندَه نه واردی نِطق دِل سَندَه نه حالِ اِستماع
کیم بُولوری نه آیریلیق کیم بُولوری نِجه وِداع
کیم بُولوری که کیم نِچه حُور لَقادَن آیریلور
تیکمیشیدی حسینه گُوز جُملهء داغ دیدَه لَر
گُوردی وِداعِ شاهی تا مُحنَت و غَم کِشیدَه لَر
یأسه دُونوب اُمیدلَر اَشگیلَه دُولدی دیدَه لَر
قَلبه رِجُوع اِیدَن باخوب گُوردی رَجادَن آیریلور
مانِع اُولوب بُیوکلَره عِفّت و عِصمت و حَیا
لِیک اُوشاقلار آغلادی باشلادی شُوریلَه نَوا
قَلبِ امامَه گُور نِجه اِیتمز اَثر بُو ماجَرا
بیر دُولی خیمه نالهء وا اَبَتادَن آیریلور
بَعضی اِئدور نَوا وُورور بَعضیسی باشه سینیه
بَعضی دِیور اِسارتی گُورمَه روا سکینیه
گَل بیزی تازه دَن بابا قِیتر آپار مَدینیه
مِهرِ وَطن مَگر دِلِ اَهلِ وَفادَن آیریلور
بَعضی کناردَن باخور بَعضی گَلور قُوجاقینه
بَعضی دوتور اَلین اُوپُور بَعضی دوشُور اَیاقینه
مُشگُل اُولور صَغیر اُوشاق دوزسُون آتا فَراقینه
هانسی بالانی گَر فَلک قُویسا آتادَن آیریلور
بیر بالا عَرض اِئدور بیزی سَنسیز عَدو اِیلَه سُویار
نَه باجیما لباسِ نُو نَه مَنه مَقنعه قُویار
نَه بُو رقیّه شامَه دین شیوَن و ناله دَن دُویار
نَه بُو رُباب صُبحه تَک شُور و نَوادَن آیریلور
نَه آنالار کناردَه آه و نَوادَن اَل چَکُور
نَه بالالار کنار اُولور چَنگ رَدادَن اَل چَکور
آلِ عَبا نَه دامنین بُوشلور عَبادَن اَل چَکُور
اَهلِ کَسا نه خامِس آلِ عَبادَن آیریلور
نالهء شاهزادَه لَر اِیلَه اِئدوبدی شاهی ماُت
بُولمُوری جان وِئروب بَنین بُولمُور اَسیر اُولوب بَنات
زِینب آچاندا قُوللارین حِیرتَه دوشدی اُمّهات
سُویلدیلَر گُورُون نِجه اُخت اَخادَن آیریلور
نائبهء بَتول او دَم پیلَدی صَبر ناقه سین
بیلدیروب اَهلِ عالمَه قارداشینا عَلاقه سین
باشینَه سالدی بیر قَرا آچدی جَلال طاقَه سین
یَعنی وِقار و عِزّ بُو بَختی قَرادَن آیریلور
قارداشینی قُوجاقلادی باجی بیر اِضطرابیلَه
سُویلدی کَسمَه اُلفَتُون زِینبِ دِل کَبابیلَه
عَزم اِیدوسَن ئولوم یُولون سَن که بِئله شِتابیلَه
رُوح بَدندَن آیریلور جِسم قُوادَن آیریلور
وِیردی جَواب شاهِ دین صَبر اِیلَه فُرقتیمدَه دوز
عُمر یِتوب دور آخره مَندَن آنام باجی اَل اوز
خوش گُونَه اَهلِ دل اُولان حَسرت اُولور گِجه گُونوز
اهلِ وِلا اُولان مَگر دَرد و بَلادَن آیریلور
#شانی عَزیزیوین دِلین روزِ وِداع داغلادون
سیلِ سِرشگُون عارضه گُوردیلَه خَلق باغلادون
یَعنی #صحافیله اِیله قُول بُویُون اُولدون آغلادون
یاد اِیلدون حسین نِجه آلِ عَبادَن آیریلور
- شنبه
- 14
- مرداد
- 1402
- ساعت
- 22:37
- نوشته شده توسط
- یوسف اکبری
- شاعر:
-
مرحوم حسین شانی تبریزی
ارسال دیدگاه