گیت مُعینون حضرتِ جان آفرین اولسون على
اوُل شهیدِ راهِ حق اِحیای دین اولسون على
گیت علاقن دین یولوندا عالمه اِعلان ایله
باشدان آت باش فکرینی شوقیله ترکِ جان ایله
دینِ اسلامِ عزیزه جانوی قربان ایله
سن شَهید اول زنده قرآنِ مُبین اولسون على
جسمین اولسا دین یولوندا ریز ریز و بند بند
ایتمرم هرگز شکایت ای جوانِ دل پَسند
بلکه اوللّام حضرتِ زَهرا یانیندا سر بلند
گیت آنان بو اِفتخاری له قَرین اولسون على
جان قویوب جدّون بابان دینی ایدوب لر پایدار
دین و قرآن پُر بها دور ای جوانِ گُلعذار
سنده گیت قانیله دینین پایه سین قیل اُستوار
تا رضا سندَن او ختم المُرسلین اولسون على
مَحو اِیده قرآنی ایستور فُرقِهء بیدادگر
دَمبدَم قرآن وِیرور دِنیایه اِعلانِ خَطر
بو خطردَن گِیت قوتار قرآنی ای نیکُو سِیَر
تا قیامون درسِ کُلَّ مُسلمین اولسون على
راضیم قانونلا زیبا عارضون گُلگُون اولا
نرگسِ مستِ و خمارون قانیله مَشحون اولا
اُمّ لیلانین دَه سن سیز شُهرتی مَجنون اولا
صحبتی دللّردَه هر ماه و سِنین اولسون على
گیت لبِ دریادَه لب تشنه بو گوندَه قانه بات
باش و جانوندان اَل اوز جانان یُولوندا کامه چات
خسته یورقون خاک و خون ایچره یخیل نازیله یات
بلکه بیدار اُمّتِ قرآن و دین اولسون على
هر باخشدا برملا ای ماه منظر گوزلرون
شرح ایدر گویا شَهادت فیضی گوزلر گوزلرون
گیت دولا قانیله بو طاهایه بنزر گوزلرون
جان فدای چشمِ ناز و حقّ بین اولسون على
گوزلریم دوشجاق گوزون اوسته هلالی قاشوه
شوریم آرتار آغلارام اولسون قسم گُوز یاشوه
ویر اجازه بیر آنان گَلسون دولان سون با شوه
تا بلا گردان سنه بو دل حَزین اولسون على
دانهء مرجان کیمی تَر، گُل جَمالوندا گَزر
آرتیروب پیرایه سین رُخسارِ آلون خوش بَزر
پردَه سال رُخساریوه وار دور یول اوسته بد نظر
بد نظردَن حفظ او یوز، بو مَه جَبین اوُلسون على
گیت آنان لیلا فَراقُوندا دَره دَرد اوُسته دَرد
اوُدلی دلدَه هم نفس اولسون اونیله آهِ سرد
گُوزدَه گوز یاشی اولا مجنون کیمی صحرا نورد
گوز یاشیله پای ناقه گِل نشین اولسون على
گیت یارائیله گُل آچسون پیکرون گلشن کیمی
اَگنیوه گی برگِ خونین سرخ پیراهن کیمی
قانلو زلفین نیزه دَه رُخساره توک خَرمن کیمی
دوشسون آردین جا آناندا خوشه چین اولسون على
شعلۀ شمعِ فراقون لا یانوب هر ثانیه
اوُد لانوب سرمشق ویرّم یانماقی پروانیه
رشتۀ عشقون چکر آخر منی ویرانیه
بو اوُغول سوز خوشدی ویرانه نشین اولسون على
بو آنالار ایچره سن ویردون منه چوخ امتیاز
قویمادون یالقیز قالا بوچولدَه سلطانِ حجاز
سرفراز ایتدون منی ای نو جوانِ سرفراز
عشقی وه اَحسن هزاران آفرین اولسون على
سن ذبیحِ عشق سن بو کربلا رشگِ منا
اول فدا الله یولوندا غم خلیلین قیل رضا
کعبۀ عشقونَده منده ایلرم سعی و صفا
اوندا که بی سر بو جسمِ نازنین اولسون على
ایلیوب جانان سنی دعوت ضیافت خانیه
بیر دایان سُرمه چکوم بو نرگسِ مستانیه
شانه ایلوم قالماسون حَسرت بو تِللّر شانیه
نظم دَه زلفِ سیاهون چین به چین اولسون على
دویمورام سندن ولی ایمدی گرک دور اَل اوُزوم
لاله تَک گیت قرمزی قانه بویان ای گل یوزوم
لاله زارِ عشقی وه گللّم تماشایه اوُزوم
تا صفای دل دلیم دَه جا گُزین اولسون على
شاخ عمرم دَن گلِ اُمّیدیمی دَرَرم بو گون
هدیه وِیرّم یاره یوز شوقیله دوندرّم بو گون
تشنه لب قربان منای عشقه گُوندرّم بو گُون
گیت سوسوز جان وِیر روان ماء مُعین اولسون على
کثرت عقلی له ای عشقِ خدا دیوانه سی
سن اوُزون ایله مُحبت شمعی نین پروانه سی
وای اوغول دلدَه اولوم من درد و غم هم خانه سی
من اوُلوم منله او آهِ آتشین اولسون على
سندَه وار شورِ شهادت ای جوانِ خوش خصال
من دیمم گیتمه بوعالی فیضی دَن بو چولدَه قال
دورما گیت مندَه آنالیق حقّیمی ایتدیم حَلال
گیت سن اول الطافِ رَبّ العالمین اولسون على
ای سپهرِ حُسندَه گُل عارضی رَخشنده ماه
باخما گِیت سن گوندوزوم سن سیز اولار لیلِ سیاه
گِیت اوزون چیخ آغ گونه اول شهرِ عشقه پادشاه
تاجِ زرّین باشه قوی فخرِ مُبین اولسون على
دین یولوندا بادهء هجرون اوُغول نوش ایلرم
قلبی مین عمریم جه یانماقین فراموش ایلرم
اوُز الیم له من سنی بو گُون کفن پوش ایلرم
تا رضا و رغبتیم عین الیقین اولسون على
اوندا که زَهرا عزیزی عزّت و فردَن گِچه
آسمانِ حُسندَه چوخ ماه منظرون گِچه
اُمّ لیلا دَه گرگ دور مین لر اکبردن گِچه
شُهرتی اوغلى ئولَن صبر آفرین اولسون على
ای جوان #تائب سیزه خدمتگذارِ پیر دور
چوخ گناهی وار اوُزی آلودهء تقصیر دور
اَل آتوب دامانوزه گوز یاشلی دامن گیر دور
ایسته محشردَه شفیعیّ شاهِ دین اولسون على
- شنبه
- 14
- مرداد
- 1402
- ساعت
- 22:38
- نوشته شده توسط
- یوسف اکبری
- شاعر:
-
صادق تائب
ارسال دیدگاه