ای امامِ عصرِ حاضر حجّتِ پروردگار
ماسواللّهه ولیّ، حیّ کردگار
انتظارون قویمیوب دیلّره آرام و شکیب
قلبلردَن شوقِ دیدارون آلوب صبر و قرار
ابرِ غیبت دَه قالوب تا آفتابِ طلعتون
بو ایشیق گُوندوز اولور اهلِ وفایه تیره تار
منتظر دور شیعه امرِ قادرِ قهّاریله
یادگارِ حیدرِ کرّار چکسون ذُوالفقار
جور و ظلمیله دولوب دور یِر خدایا اذن وِئر
خَتم وئرسون جور و ظلمه خاتمِ هشت و چهار
منتظِر آرام اولماز منتظِر دوتماز قرار
تاپمیوب تا خاتمه بو طول تاپموش انتظار
آغلاروق بیز گاه گاه امّا او آغلار صبح و شام
گُل یوزی گولمز یقین گر گلسه هر گُون یوز بهار
گه باخار احوالِ اسلامه یانار دلدَن او شاه
گه سالار جدّی حسینی یادَه آغلا زار زار
عرض ائدر دشتِ بلادَه اوُلمادوم جدّا سنه
اکبر و عبّاس تک تا ایلییدیم جان نثار
یادَه سالدوق جا سنون جدّا سوسوز جان وئرماقون
چشمۀ چشمین دَن اشکیم شطّ و جیحون تک آخار
آلمیشام سو ایچمماق درسین عمون عبّاسی دَن
ایچمرم خوش حالیله دنیادَه آبِ خوشگُوار
او سالوب یاده سوسوز قیزلاریوی سو ایچمدی
منده سالدوق جا او حالی یادَه اولّام اشکبار
ای هامی عالم فدا بیر ایله کانِ همّته
بو وفا دنیادَه بیر عبّاسه اولموش انحصار
گوهرِ گنجِ ادب دور دُرَّ دریای حَیا
اوج همّتده هما دور ماهِ گردونِ وقار
سوز یتوشدی بیر محلّه وار یری عرض ایلیم
شمّۀ مهرِ وفاسین دَن به وجهِ اختصار
قارداشین یالقوزلیان دا کربلادَه کوفیان
دوره سین دشمن آلاندا هر طرفدَن چون حصار
بیر نمایش وئردی قویدی عالمی مبهوت و مات
بیر وفا گوستردی حیران قالدی فکرِ روزگار
ساچسا همّت پرچمین زیبنده دور مَحشر گونی
ایلسه صاحب لوای حمد اونیله افتخار
اولدی اول محصور شاهه بیر گوزل حصنِ حصین
قویمادی بیر ذرّه دوشسون خوفه اطفالِ صغار
قیزلار آسودیدی امّا خوف و وحشت دَن قوشون
قورخودان یاتمازدی دشمن وار سوزومدَه اعتبار
نعشی اوسته شه مگر بو کلمه نی ذکر ائتمدی؟
ایندی قارداش یاتمیان گوزلر داخی راحت یاتار
روزِ تاسوعا یاخونلاش موشدی گون ائتسون غروب
همّتِ عبّاس امّا اولدی گُون تک آشکار
خُلد اعلادَه اوغول وای سسلیندَه فاطمه
امرِ قتل، حتمی اولاندا باشلاناندا کار زار
شمر اولوب اوّل شقی بو آدلانوب اوّل سعید
او توکوب ثاراللهی بو ایلدی ایثار ثار
او گتوردی الدَه بیر فرمان حسینون قتلی نه
بو حسینون شمعِ عشقین دَه یانوب پروانه وار
او خیال ائتدی آییرسون شاهدَن سردارینی
بو دئدی عَبد ایلمز ترکِ رکابِ شَهریار
گر قلم قولدان قلم امدا تاپسا #شأنیا
بو مفصّل مَطلبی نظمیله اجمالاً یازار
عصرِ تاسوعا قریبِ شامِ عاشورائیدی
چخدی لشکردَن کناره شمرِ شومِ نابکار
یوز دوتوب سمتِ سپاهِ شاهِ دینه دادیله
سسلدی «أَینَ بنو أُختی؟» سوزون ایتدی کرار
بولدی شمرین مقصدین پورِ رشیدِ مُرتضی
باشینی سالدی اشاقه با کمالِ انکسار
شاهِ دین یوز دوتدی عبّاسه بویوردی یا أَخا
شمر ذی الجوشن سیزی سسلور گُورون نه قصدی وار
ایلدی عبّاس فوراً امرِ شاهه امتثال
خارج اولدی خیمه لردن مُرتضایه یادگار
یوز دوتوب اکراهیله شمره دئدی قصدون ندی
وئردی عبّاسه بو طرزیله جواب اوُل کین شعار
هم قبیلم دور آنان سن قتله یتسن تا وارام
اوز قبیلم ایچره اولّام بو عمل دَن شَرم سار
گئت گوتور قارداشلارون گَل مُلحق اول بو لشکره
اول سپه سالارِ لشکر واردی سنده اقتدار
هر ریاست ایسته سن وار سویسن هر بیر منصب آل
سر سپه حتّی سنه اوز شغلون ایلر وا گذار
آلمیشام کتباً امیریم دَن امان نامه سنه
یوخ تعرّض سیزلره گر اولسا هر شهر و دیار
تا ایشیتدی بو سوزی پورِ غیورِ مُرتضی
تیتردی اعضاسی اوُلدی طبعی نه چوخ ناگوار
سویلدی ای بی حیا دنیادَه عار اولسون سنه
شرم ائدورسن اوز آنام دان ایتمی سن زَهرادَن عار
فاطمه اوُغلون قویوم یالقوز گَلوم سردار ئولوم؟
یوخ بو منصب دَه شرافت، وار مذلّت زینهار
نه امان نامه نه مَنصب نه ریاست نه جَلال
بیر گُونوم اوُلسا حسین سیز عالم اوُلسون تار و مار
سن خیال ائتمه حسینه قارداشام سر لشکرم
بیر غلامم گر قبول اِئتسه بو شاهِ تاجدار
طول وِئرمه صحبته قورخار حسینون قیزلاری
خیمه لردَن گورموسن زَهرا قیزی زینب باخار
فکریمه بیر سوز گُلور نوعاً چوخ اِستبعادی یوخ
تا خیمدَه بو خبر نشر اوُلدی تاپدی انتشار
شمر عبّاسی له میداندا اِئدنده گفتگو
خیمه لردَه زینبه یوز وِئردی حالِ اِنکسار
یوز دوتوب درگاهِ حقّه یادگارِ فاطمه
عرض اِئدوب ای دادگر ای مهربان پروردگار
قارداشیم عبّاسی آیا بس آنام اُمّ البنین
بسلموب اوُلسون حسینه بیر بئله موقع دَه یار
شمر آییرسا بیربیری ندن بو ایکی قارداشیمی
وای منه اولّام یقیناً تا وارام دنیادَه خوار
شمر گوردی ایلمز عبّاسه اَفسانه اثر
شاهبازِ اوجِ همّت کرکسه اوُلماز شکار
او قیتدی لشکره عبّاس خجلت دَن ولی
شرم ائدردی بیردَه سمت خیمیه اِئتسون گذار
شه توجّه ائتدی لطفاً با وفا سرداری نه
گوردی عبّاسه وِئرور دنیای دون بی حد فشار
آز قالور ئولسون خجالت دَن او غیرت معدنی
ایلدی اِحضار حضوره قیلدی رأفت بی شمار
هر سوزی گر چه امامون قولیجه اولماز دئماخ
وار ولی شهرت بو سوزدَه مندَه اِئتمم استتار
ایتدی فرمایش اَبُوالفضله غریبِ کربلا
میلون اوُلسا گیتمه گه قارداش واروندی اختیار
بولمورم بو سوز ابُوالفضله نقدر ائتدی اَثر
دوشدی توپراقه قدوم شاهه اوُلدی خاکسار
عرض اِئدوب مولا قاپوندان قوما بیر عَبدم ذَلیل
اولماسام قابل، قبول اِیله واریمدی اعتذار
سیّدی سن سیز حیاتی نیلورم دنیادَه من
خوش دَگل سندن صورا عمر اوُلسا گیرم صد هزار
فرض ائله من بیر غلامم شاهزاده اکبره
تا اِئدوم احراره بیله بندلیقدان افتخار
وِئرماقا پایانه اوز پیمانیمی خوش خوانیله
ایسترم توفیق حقدَن عهدیم اولسون اُستوار
خالقیم قیلسون عَطا سالم بدَن آسودَه دل
دلنشین اولسون سوزوم چون شعرِ #شأنی آبدار
مایلم بیر اَربعین اوُچ اکبر آدلی نوحه خوان
اِتّفاقیله نصیب اوُلسون او شش گوشه مَزار
- شنبه
- 14
- مرداد
- 1402
- ساعت
- 22:51
- نوشته شده توسط
- یوسف اکبری
- شاعر:
-
مرحوم حسین شانی تبریزی
ارسال دیدگاه