عَبَث دَگُول گِیجَه گُوندوز چُوخ آه و زار اِیلَرَم
سِرِشگِ دِیدَه می رُخساریمَه نِثار اِیلَرَم
حَریرِ خامَه دِی هَم صُحبَتیم صَباحَه کیمی
سِزیلتیمی اوُنیلَه مَندَه کم عَیار اِیلَرَم
عَلاقَه کَسمَه مِیشَم بی سَبَب جَماعَتدَن
تَجَرُّد عالَمِینَه هر گِجَه گُذار اِیلَرَم
رَفیقلَر چُوخی بیگَانَه دور حَقیقَتدَن
اوُزومی مَجمعِ بیگانَه دَن کَنار اِیلَرَم
ازَلدَه تُوپراقیدیم، آخِریمدَه تُوپراق دور
نِجَه جَلالَتِ دُنیایَه، اِعتبار اِیلَرَم
سِرشگ دانَه لَرین صُبحَه تَک یُوزَه دُوزَرَم
هِزار دانَه بُولوب، بیر بَه بیر شُمار اِیلَرَم
وِیروبدی دَم مَنَه بیر مُرشِدِ طَریقِ اَدَب
قَلَندَرَم، او دَمی، دَم بِه دَم شُعار اِیلَرَم
رَقِیب فَخری بُو دور، فَقردَن فَراغتی وار
او جاه و عِزّتَه، مَن فَقرَه، اِفتِخار اِیلَرَم
بِهِشت اَگَر بُو یالانچِی حُسینچیلَر یِریدِی
جَهنّمی مُن اوُزوم مِیلاً اِختیار اِیلَرَم
علی آدِین دِیَرَم، نَظمِیمَه یِتَر قُوّت
حُسین آدِین دِیَرَم، کَسبِ اِقتدار اِیلَرَم
اوُزی یارالیدی، مِیداندا قُوملار اوُستَه دُوشُوب
او حالی یادَه سالُوب، نالَه، زار زار اِیلَرَم
حُسینَه آغلاماقا حَقدَن اِیستَرَم تُوفِیق
مُوّفَّقیّتیمَه شُکرِ کِردِگار اِیلَرَم
اوُزی دِییَن کیمی بیر قَطره گُوز یاشیم آخسا
نُه خُوفِ قَبر، نَه تَشویشِ مُور و مار اِیلَرَم
تَوَجّه اوُلسا اوُزوندَن او بَزمَه یُول سالارام
او اَشگیلَه گُوزُومی دائم اَشگَبار اِیلَرَم
مَگَر دِیمُوردِی زِیاد اوُغلی، مَن مُسلمانَم؟
یَزید اِمام دِی فَرمانین اُستُوار اِیلَرَم
علی قِیزی دِئدی مَندَه اِسارَتیلَه اوُزوم
جَهانیانَه سَنُون کُفرُون اِنتشار اِیلَرَم
مَعاوِیَه قُوران اوُضاعِ کُفری مَن پُوزارام
یَزید سَلطَنَتین جُملَه تار و مار اِیلَرَم
حُسینِیم آیَه اوُخور، مَندَه باشلارام خُطبَه
علی تَکلّمِینی خَلقَه یادگار اِیلَرَم
سِکُوتَه اَمر اِیدَرَم، خَلقی نِطقِدَن سالّام
جَرس صَداسین آلُوب جُملَه اِنتظار اِیلَرَم
یانیقلی سُوزلَریلَه اِهلِ شَهری یاندِیرّام
که دُوست و دُشمنی مَحزُون و دِلفِگار اِیلَرَم
نَه عالی جامَه، نَه رَختِ حَریر آختاریرام
نَه فِکرِ مَعجرِ زَر دوز و زَر نِگار اِیلَرَم
یَزید کُفرینی دُنیایَه اِنتشار اِیلیُوب
اوُزیمی پَردهء عِصمَتدَه اِستِتار اِیلَرَم
نَعوذُ باالله اَگر شِمر آلسا مَعجَریمی
بُو دودِ آهیمی مَن، حایِلِ عُذار اِیلَرَم
جَمالیمی گُورَه بُولمَز گُروهِ نامَحرَم
حِجاب آیَه سینِین حُکمین آشکار اِیلَرَم
باخاندا خَلق مَنه، مَندَه نِیزیَه باخارام
حُسینیمِین یارالی باشینَه نَظار اِیلَرَم
او خَلقی نِیزَه دَه مَشغُول اِیلَر اوُز سَسینَه
سِنِق کِجاوَه دَه مَن، سِیرِ رَهگُذار اِیلَرَم
رقَیّه شِمرَه دِئدی باغلاما مَنیم قُولومی
که زُلفِ اَکبَرَه بَندَم، دِیمَه فَرار اِیلَرَم
جِدا باشندا باشی گِیتسَه هر یِرَه، مَندَه
او باش دالِنجا دُوشوب، طِیّ کُوهسار اِیلَرَم
عَبث دَگُول دُوزَرَم تازیانَه زَحمَتینَه
نَه ذِکرِ شِکوَه، نه اِظهارِ اِضطِرار اِیلَرَم
گُورَندَه اَکبریمُون ماه طَلعَتین هر دَم
نَه مِیلِ باغ و نَدَه مِیلِ لاله زار ایلرم
او گُل اَگر گُله، مَن آغلارام نَوائیلَه
تَمامِ عالَمی بیر گُلشنِ بَهار اِیلَرَم
گَلَندَه نالیَه شُوریلَه، دَشتی دُولُدورّام
چَمَندَه بُلبُلِ نالانی شَرمسار اِیلَرَم
اَسیر اوُلاندا نُولُور، شاهزادِیَم گِینَه مَن
صَغیر اوُلاندا نُولُور، غُصّهء کُبار اِیلَرَم
اَگر بُو دَردین اَلیندَن یاخام خِلاص اوُلسا
اوُزیمَه #شأنی کیمی شِعری مَن شُعار اِیلَرَم
التماس دعای فرج
- شنبه
- 14
- مرداد
- 1402
- ساعت
- 23:18
- نوشته شده توسط
- یوسف اکبری
- شاعر:
-
مرحوم حسین شانی تبریزی
ارسال دیدگاه