گُوزَل عَبّاس دُولوب گُور نِجَه قان گُوزلَریوَه
هَر باخش خُوشدی حُسینُون دِیسَه جان گُوزلَریوَه
بَدرِ کَامِل دُوتولُوبدور گُورونُور آی پاراسی
قانُویلَه هُوورلُوب کَیپری گَیلَه قاش آراسی
بِیلَه اِحساس اِیدُورَم بیر گُوزیُون وار یاراسی
یُوخسا دولمازدی عَزیزیم بِیلَه قان گُوزلُریوَه
خُوش کِچُوب حُسنُوَه باخدُوقجا گُونُوم آئیم اِیلیم
نَه گَلُوب گُوزلَریُوَه دَردینی لازمدی بِیلیم
قُوی اوُزُوم لَختَه لَنَن قانینی آهِستَه سِیلیم
سَنی اَکبَر جانی سَن وِیرمَه تَکان گُوزلَریوَه
وار عَجَب غُصّه لی بیر مَنظَرَه سی گُوز قاشُوین
کاسه سی آهَن عَمُودِیلَه سنُوبدور باشوِین
قَلبی بُو چُولدَه جَوان داغی گُورَن قارداشُورین
اَبر تَک هَر گُوزی آغلور یُومُولان گُوزلَریوَه
تَنگه دُوشدی بُلورَم گَردِشی اوُلدُوزلاری مُون
عَلَمُون یاتدی یاتار بَختی آدامسیزلاری مُون
اَلدَه سُو جامی خیامی دُولانان قزلاری مُون
نِگَران گُوزلَری قُربان نِگَران گُوزلَریوَه
عالَمِ عِشقدَه هِیهات اوُلا خَستَه حُسین
مَست اوُلور باخدُوقجا سَن کیمی سَرمَستَه حُسین
بُو اُمیدیلَه گَلوبدور باشوِین اوُستَه حُسین
وُورا بیر بُوسَه على بُوسَه وُوران گُوزلَریوَه
قَلبیم اِیستُور سارالان رَنگیمَه قارداش باخاسان
نِجَه گُوزلَردَن آخُور صُورَتیمَه یاش باخاسان
نِچَه لَحظَه سَنَه اِمکان اوُلا اِیکاش باخاسان
چاغُرام تَشنَه اوُشاقلار وِیرَه سان گُوزلَریوَه
یُوزُوین قاننی سُولمُوش یُوزیمَه باخدوقجا
دَردیم آرتُور نِلیُوم اَشگِ تَریم آخدُوقجا
شاد اوُلاردیم اِیکی زِیبا گُوزیُوَه باخدُوقجا
باخُورام حَسرَتیلَه اِیندی هَمان گُوزلَریوَه
بُو اوُجا قامتَه حِیرانیدی هَر سَروِ رَوان
خَم کَمَر گُورمَمشیدی مَنی دَه دورِ زَمان
اَل اَله وِیردی بُو گُون دُوز اوُخولان اَیری کَمان
اوُلدی بیر اِیش باخُورام قَدّی کَمان، گُوزلَریوَه
زِندَگیدَه سَنیدُون لَذّتی رُوز و شَبیمُون
دادی گَئتدی سَنه قُربان دِیلیمُون هَم لَبیمُون
تَک مَنیم یُوخ، گُوزی سَندِیدی گُوزَل زِینَبمُون
قُویدی حَسرت باجوی جَبرِ زَمان گُوزلَریوَه
سِندِیرُوب دَرد و غَمُون اِئتدی مَنی اَفتادَه
رَغبَتیم قالمادی بُو دِیرِ خَراب آبادَه
یاشاسِیدیم مَن اَگر نُوح کیمی دُنیادَه
اِیلیردُوم سَنُون هَر لَحظه فَغان گُوزلَریوَه
#جواب_حضرت_ابولفضل_علیه_السلام
آچماقا گُوزلَریمی یُوخدی دِئدی چارَه آقا
بیر گُوزُوم تیرِ جَفائیلَه اوُلوب یارَه آقا
بیر گُوزُوم دَه اوُتانُور باخسِین او رُخسارَه آقا
وُورما اوُز باخمارام اوُل اَشگ فِشان گُوزلَریوَه
گر چِه کَامِ رُخِ یار آلماقی خُوشدور گُوزُومُون
کِپریگین بیر بیرینَه چالماقی خُوشدور گُوزُومُون
دَردُون آرتار یُومُولی قالماقی خُوشدور گُوزُومُون
عاشقم یُوخسا بُلورسَن آقاجان گُوزلَریوَه
اوُلوب اوّل باخشیم روزِ تَوَلد دَه سَنَه
بُلُنُوب مَعرفَتیم سَندَه کِی وَجه الحَسنَه
آخریم گُور هارا مُنجَر اوُلوب اِیوای دِئ مَنَه
باخا بُلمُور قوجاقوندا گُوز آچان گُوزلَریوَه
- شنبه
- 14
- مرداد
- 1402
- ساعت
- 23:23
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه