آه او گُوندَن ساکنانِ عَرش دِل رَنجوریدی
تُو کماقا ثاراللهی بیر عیسوی مأمُوریدی
آدلاری اِسلامیان قَتلیندَن اِئتدی اِجتناب
اِئتدیلَر شُورا کیم اِئتسُون فاطمه قَلبین کباب
رأی آلندی مَجلسِ شُورادَه چخدی اِنتخاب
بیر نَصارایه که دینِ حَق اوُنا مَنظُوریدی
اوُل سَعیدَه وِیردی سَعد اوُغلی ریاست وَعدَه سی
بو یارالی سُویلَدی ئولدی یَقین گلمُور سسی
سَن گِئدوب باشسیز اَگر قُویسان بُو شاهِ بیکسی
سَر سپه لیق اِسموَه شاماتدَه مَسطُوریدی
قَتلی واجبدور بُونُون شرعاً وِیروب فتوا فِحُول
چون عربدور، قَتلینَه اَعراب او دور اِیلور نِکُول
پُورِ تَرسا قربةً لِله اِیدوب آخر قَبُول
خَنجَرین آلدی اَلَه بو اَمرَه چون مَجبُوریدی
قَتلِ ثاراللهه اوُز قَلبندَه چَکدی دایرَه
قَتلگاهَه یُوز قُویوب وُورسُون جَهانی بیربیرَه
عالَمِ عُلویدَن عیسی باش آچوخ گلدی یِرَه
گُوردی فکر اُمّتی حَق، فِعلی حَقدَن دوریدی
اَلغَرض نَصرانی گلدی قَتلگاهه دِلفکار
بیر یارالی گُوردی قان اِیچرَه دوشُوب بی اِختیار
نیزه و خَنجَر ووروبلار بَسکه قُومِ نابکار
قانیله آلاتِ حَرب آلتدا بدَن مَستُوریدی
وَجهِ وَجه اللّهی دوتمُوش پَردَه پَردَه لَختَه قان
لَمعه لَمعه نُور اوُلور قانلو جَمالیندَن عَیان
نَحر مَنحُوری اِئدور سِرّ اَنَااللّهی بَیان
مَعنی اللهُ نُور اوُلموش سَراسَر نُوریدی
گُون کیمی اوُلمُوش وِجودی کِسوَتِ کِثرتدَن عُور
سِرَّ وَحدَت کِثرتِ عشقیندَن اِیلوبدی ظُهور
جِسمدَن آخدوقجا قانی یِردَه یا حَق نَقش اوُلور
گر چه اوُخدان پِیکری چون خانهء زَنبُوریدی
عیسوی گُورجَک بو حالی اوُلدی پابَندِ مُحَن
سُویلدی کیمسُن یارالی گُوزلَرون قُربانی من
سَن اگر عیسی اِبنِ مَریم سَن بُو صَحرادَه ندَن؟
پِیکرون اِنجیل تَک اوُراق اوُلوب مَنشُوریدی
چرخِ چارمدور یِرون عیسی اَبنِ مَریم سَن اَگر؟
پَرتُو نُورِ خدا اوُلمُوش بُو چُولدَه جِلوَه گر
مَحو اوُلوبسان جَذبهء دلداره مُوسی سَن مَگر
لَن دِیُوب اَرنی جَوابیندَه بُو صَحرا طُوریدی؟
گُوزلَرین آچدی بُو سُوزدَه شَهریارِ نُه قُباب
زادهء تَرسایه قیلدی حالِ ضَعفیلَه خِطاب
قُدرتیم یُوخدور وِیرم بیربیر سُؤالاتَه جَواب
رَمح و سَهمیلَه گُورورسَن نَحریمی مَنحُوریدی
یِر یوزیندَه من بُو گُون مِصباحِ نُورِ سَرمَدم
حِیدرِ کرّار آتامدور شِبلِ نَسلِ اَحمدَم
سُویلَمَه عیسی مَنه من وِیرمیشم عیسایَه دَم
بُل آنام مَریم دَگُل اِنسیّه آدلو حُوریدی
من نه مُوسایم وَلی اوُنلان واریمدور سابقَه
عیسیِ گردُون نِشین خادمدی مَندَن لاحقه
کاتِب قُدرت یازوبدور کلُّ نَفسٍ ذائقَه
اُول سَبَبدن زَخمَدَن سینم بِئلَه مَکسُوریدی
نُقطه نُقطه عِلمِ کان و مایَکُونَه آگهم
صاحِب تاجم رِبُوبیّت سَریریندَه شَهم
عیسی عَبدالله دور من لِیک اَباعَبداللَّهم
کُوفیان گُورمُور بَصیرت گُوزلَری چون کُوریدی
فارقلیط اِسمی دِیه لَّر جَدّیمَه قُومِ یَهُود
حَق یازوب اِنجیلیدَه اِسمِ شَریفین مُودمُود
قارداشیم هاشندی هُوشینَم اؤزوم دَریای جُود
من شُبیرَم قارداشیم آدی شَبَر مَزبُوریدی
آختاروردُون یاری مُرآتِ حَقیلَه دِیردَه
اوُلمادون اِرشاده نایل سَن وِصالِ غِیردَه
بو مَقامی آختاروردُون نچّه مُدّت سِیردَه
وَصلِ مَعشوقَه یِتن عاشق بُو گُون مَسروریدی
گَل عَجب دَمدَه گَلوبسَن فکرِ وَصلِ یاریلَه
صُورتاً گر چه گلوبسَن صُورتِ زنّاریلَه
تا کی اوُلسُون اُلفَتُون آئینه دَه دِلداریلَه
آت بُو زُنّاری فَضای عِشق چُوخ پُر شُوریدی
سُویلدی عیسی سَنه رؤیادَه با قَلبِ فِکار
اَنبیا اِیچره منی اِئتمَه اَماندور شَرمسار
گُوردوقُون رؤیانُون اوُلدی اِیمدی سِرّی آشکار
سَن مَنی ئولدورسَن عیسی فِعلیوَه رَنجُوریدی
خَنجَرین آتدی بُو سُوزدَه اوُل جَوانِ پاک ذات
سُویلوب اِی لِعلِ لَبی خِضره وِیرَن آبِ حَیات
سندَه که وار بو جَلالَت بو مَقامِ عالیات
جِسمیوَه غُسلون ندَن قان تُوپراقُون کافُوریدی؟
من دِیلون قربانی تَعلیم اِیلَه حَق دینی مَنه
آخر عُمریمدَه منی یاخشی یِتُوردُون اِیمنَه
اذن ویر شاها ایدوم حمله صفوف دشمنه
اِیمدی روحیم جِسمیمَه بر وَصلهء ناجُوریدی
کلمَهء اسلامی تَعلیم اِیتدی مَحبوبِ جَلیل
یُوز قُویُوب مِیدانه دَعوا اّیلدی اوُلدی قَتیل
حَضرتِ زَهرانی شاد اِیلوب تاپُوب اَجرّ جَزیل
ساغَرِ عِشقِ حُسینیلَه زِ بَس مَخمُوریدی
اِی «#حسینی» دُوت حُسینُون دامنیندَن صُبح و شام
مُطلقاُ سرمایهء عِزّتدی بِیلَه اِعتصام
اِیلسَه خِدمَت حسینه هر کیم عالَمدَه مُدام
حَضرتِ زَهرا اَلیلَه حَشردَه مأجُوریدی
- شنبه
- 14
- مرداد
- 1402
- ساعت
- 23:25
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه