او کَسلَری که حُسینی سُووَر بُو عالَمدَه
دُوتار عَزا هامی عُمرین، نَه تَک مُحَرّمدَه
خیالیلَه مُتَصوِّر دَگُول جَلالِ حسین
تَمامِ فِکر و خیالی پُوزار خیالِ حسین
بَشردی گر، بُو جَلالَتدَه کیم گُوروبدی بَشر
بَشر گر اوُلماسا مُمکُن دَگُول مَقالِ حسین
پِیمبَر اوُغلیدی بُو مین خَلیل و نُوح و کَلیم
جَلال و رُتبَه دَه اوُلمازلا بیر بِلالِ حسین
او گُونکه سسلدی مِن یَشتَری بِاَنفُس و مَآل
تَمامِ عالمَه مَحبُوبِ بی مِثالِ حسین
اَلی اَل اوُستَه دُورُوب مُشتَری دِیُوب لَبَّیک
فَدادی عالَمِ عِشقُوندَه نَفس و مالِ حسین
غَریبَه عالَمیدی اوُلماز اِیلَه داد و سِتَد
که اِیلیُوبدی حُسینیلَه لایزالِ حسین
مَبیع مامَلکِ حَقّ و مُشتَری شَهِ دین
ثَمَن حُسینیدی اوُل بِیعه هَم عَیالِ حسین
مَجاز اَهلینَه گُوستَردی اوُز حَقیقَتینی
مَرامِ حَق اوُلوب عِلّت او دور وِصالِ حسین
یازُوبدی لُوحِهء حِکمَتدَه کَاتِبِ قُدرَت
گَرک فَنایَه گِئدَه نَفس و مال و آلِ حسین
قُویُوب اوُ صفحیَه اَرواحِ اَنبیا اِمضاء
مَقامِ عِشقیدَه مَعلوم اوُلوب کَمالِ حسین
نِفُوذِ عِشقیلَه تَفویض اوُلوندی عِینِ مَرام
اوُلاندا ذاتِ خدا حَقّدَن سُوالِ حسین
قَبُول اِئدوبدی اؤزون خونبَها حُسینه خدا
که ظاهر اوُلسُون او گُون شُوکَت و جَلالِ حسین
دُولاندی دُورهء دُوران یِتشدی عاشُورا
اوُلوب او عَهدیدَه بیر اِمتحان خیالِ حسین
وِیرُوب حَبیبینَه بیر بیر کَمک لَرین قُربان
تاپُوب عُذارینَه یُول گُوزدَن اَشگِ آلِ حسین
اِیشیقلی گُون کیمی اَکبَر یُوزی اِئدوبدی کُسیوف
سِنُوبدی باغِ اِمامَتدَه نُو نَهالِ حسین
سُو اوُسته هَر اِیکی اَلدَن گُوتُوردی اَل عَبّاس
گُورُوب او حالی او ساعَت پُوزُولدی حالِ حسین
سُو وِئردی بیر سُولی پِیکان علیِّ اَصغرینَه
سِپهِرِ غَمدَه غُروب اِیلدی هِلالِ حسین
ئولوب کُمکلَری یالقُوز قالوب تاپُوب جُرأت
اَل آچدی اوُستونَه اَعدای بَدِ خِصالِ حسین
قِلجلیُوب باشینی مالِک اِبنِ یُسرِ لَعین
دُوزَلدی ظُهر یِتُوب گُون کِیمی زَوالِ حسین
اوُلوب مَعاینَه شقُّ القَمَر آخُوبدور قان
بُویاندی قانَه قزل گُل کیمی جَمالِ حسین
خیالی اِئتماقیدی اوُجِ وَحدَتَه پَرواز
خَدَنگ لَر پِر آچُوب اوُلدی پَرّ و بالِ حسین
اَبُوتُراب عَزیزی دُوشُوب تُراب اوُستَه
بَلَشدی قانیلَه تُوپراقَه خَطّ و خالِ حسین
دِیدی اِلهی گُواه اوُل بُو قُوم عُقیدَه سینَه
بُو چُولدَه واجِب و لازم دُوشُوب قِتالِ حسین
تَمامِ ما مَلکیمدَن بُو چُولدَه گِئچدیم مَن
ازَل کی عَهدیدَن اوُلمُوبدی اِغتِفالِ حسین
یِتُوبدی عَهدِ اَلَستیم باشا قالُوب بیر باش
بُو بارَه دَن بُلوسَن واردی اِنفِعالِ حسین
سَنُون حُضُوروَه لایِق دَگُول بُو تُحفه لَریم
قَبُولَه لُطفیلَه وار لِیک اِحتِمالِ حسین
#حسینی فَخر اِئدَه سَن ساکنانِ نُه طاقَه
سالونسا چِگنوَه نُوکَر آدِیلا شالِ حسین
- شنبه
- 14
- مرداد
- 1402
- ساعت
- 23:32
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه