گُوردی حسین خَطردَه کِتابِ اِللّهِینی
ناچار قالدی تَرک اِیلدی زادگاهِینی
بِدعَت لَر آشکاریدی مِیخواره حُکمران
اِبقای دِینَه قیلدی فَدا اوُز رِفاهینی
سَنگیندی تَعهّدی یُومِ اَلستیدَه
نا دِیده دُوتدی عالَمُون اِجلال و جاهِینی
خُورشیدِ دِینی دَرک اِیدَه بُلمُوردی چِهرَه تار
زایِل اِیدوبدی تُودِهء اَبرِ سیاهِینی
جِسمِ حُسیندَه واریدی چُون رُوحِ مُرتضی
بی واهمَه دِیوردی یَزیدُون گُناهِینی
حَقّیندَه جَدّی لَحمَک لَحمی دِییَن حُسین
جان نَقدی اَلدَه قَصد اِیلدی عِشق راهِینی
پِیغمبَرُون مَدینَه سینی قُویدی بی صَفا
سَعی اِیلَدی اَلَه گَتُورَه دِل بِخواهِینی
ظُلمت گِئجَه چِخُوبدی اِیویندَن بُو نِیّتَه
اِیثارِ ثاریلَه تاپا عِشقین پِگاهِینی
سِیرَه چِخُوبدی یا للعَجَب نَصفِ شَبدَه گُون
هَمراه اِیدوب نِجُومِ دِرخشان و ماهینی
قُویدی بَتُول یُوسفی حِیرتدَه یُوسفی
چِخدی او چاهدان بُو گَزور عِشق چاهینی
سَسلَندی باغلانان قاپیلار گِئتمَه یا حسین
سُلطان بیو نُوعی تَرک اِیلَمَز بارِگاهِینی
صُغرانُون آغلاماقِینَه بیزدَه دَوام یُوخ
آرام اِیلَه بُو غَملی اِیوِین بی پَناهِینی
یاددان چِخُوب اوُزی گُوزی اَکبر گُوزیندَه دور
یُورقُون مَریضَه نُون نَظره آل نِگاهِینی
کِپرِیک سانی آخُور یُوزینَه گر چِه گُوز یاشی
اَشگی چَتین خَمُوش اِیلیه سُوزِ آهینی
غَملی حَبیبَه اَل چَکه بُلمُور حَبیب دَن
ناخوش قیزی نیَه آیُورورسان طَبیب دَن
پَروَردِگانِ مَعرفَت و عِفّت و کَمال
اَگلَشدی اوُز مَحامِلینَه آلِ ذُوالجَلال
سَس سیز مِینُوبلَه مَحمِلَه سَس سیز اُوتُوردلار
مَنزلّریندَه قَطع اوُلوب آوای قِیل و قال
قاسِم سَریّه مَحمِلینَه پاسدار اُولوب
لِیلایَه حافِظ اَکبرِ خُوش خُلق و خَدّ و خال
عبّاس عَلّیه زِینَبنی اِیتدی جابجا
مَن نُوکَرَم دِیدی سَنه اِی فاطمَه مِثال
گُون گُورمین یُوزیوی گَرک آیدا گُورمَسُون
تَختِ رَوانُویون باجی جان پَردَه سندَه سال
اَطرافِ مَحملیندَه سَنُون اِی مُحَجّبَه
ورّام عُقاب مِثلی مَنازلدَه پَرّ و بال
آخر نَفر که چخدی او اِیودَن رُبابیدی
آغُوشِ مِهردَه تَزَه مُولودِ نیک فال
آی پارچاسی کیمی یاری قَرخ اُولمیان بالا
عُمری مُسافِرَتدَه وَلی اُولدی نیمَه سال
تا اِیستدی کُوچَه قاپُوسندان چِخا رُباب
باخدی حَیاطِ مَنزلَه حَسرَت او خوش خِصال
گُویا دِیدی گُوگُل قُوشُونُون آشیانی سَن
اِی صَحنِ خانَه عِزّتیُوَه یِتمسین زَوال
اَلآن که چُوللّرَه دُوشُورَم سینَه دَه بالام
عِشقیلَه آستانُوی ئوپَرم گَر اُولا مَجال
باجادی سَس گَلِیدی هَمان صَحنِ خانَه دَن
اِی هَمسَرِ مُؤَدّبۀ مَفخرُ اَلرّجال
اِی کاش گِئتمَگُون کیمی اُولسُون قِیتمَگُون
یُوز وِیرمَسُون سَفردَه سَنَه غُصّه و مَلال
دَستِ خَطر یِتیشسَه اَگر دِیلسِیز اُوغلوا
اِمکانُون اُولسا گَلمَه خانم کَربلادَه قال
گَلسُون عَزالی گِچمیجَک سَن اُطاقُوَه
اوُلماز دَوام مندَه سَنُون آغلاماقُوَه
مُلکِ وِلا خَدیوی حسین میرِ کاروان
گُوردی رُبابی مَضطَرِب حالَتدَه ناگِران
فَرمایِش اِیلدی اِیوَه حَسرتلَه باخما چُوخ
اِی با وَفا یُوبانما اِیلَه تَرکِ خانمان
سَن غَملی سَن عَزیزیم اَگر مَندَه غَملیَم
تأخیرَه سالما گِتملی دور غَملی کَارِوان
صیّادلَر اَلندَن اَمان اُولسا گَر قُوشا
اَمرِ مَحالی دور اِیلسُون تَرکِ آشیان
ناراحت اُولما سَن قِیدَرسَن بُو مَنزله
زِینَت تاپار دُوبارَه سَنیلَه بُو دُودمان
شایَد حُسینی کُوفه لی لَر ساخلیا قُوناق
گُوز یُولدا مُنتظردی مَنَه نامه لَر یازان
غُربَتدَه قالسام اَصغری دَه وِیرمَرَم سَنه
تازه آچان گُلونی چُوخ اِیستُور بُو باغبان
صُوددَن دُویُور گُوزَل بالامی قُویما آغلیا
سَرمایَه دور یامان گُونه بُو طِفلِ بی زَبان
بیر گُون قباقُوَه گَله شایَد صُود اُولمیا
پِستانُوَه بالام اَل آتا دِرناقندا قان
بی اِعتباری دور بُلورَم گَردِشِ فَلَک
بیر سُوز دِیُوم یادوندا سَنُون قالسُون هر زَمان
چُوخ اُچونی فَلک قُولی قُوَتّلی اِِیلیُوب
چوُخ جَیرانی یِخوب یِرَه بیر تیر و بیر کَمان
تَختِ رَواندَه یِریُوی راحت اِیتمیشَم
اَحوالون آلمیشام نَظره چون اُوشاقلی سان
الله سَنی اوُزی اِیلسُون عاقبَت بِخِیر
شَخصاً کِجاوَه وَه اوُزومَم یُولدا پاسبان
یُوخ شَرح و بَسطه حاجَتی فَهمیدَه سَن رباب
آخر سُوزی سنه اِیدُورَم رَمزیلَه بیان
تاب اِیلَه گر چه چُوخدی گِیدندَه اَذیّتُون
امُا گَلندَه فِکر اِیدُورم آزدی زَحمَتُون
صُغرا اؤتوردی اَشگِ تَریلَه گِیدنلَرین
هِِجران داشی شِکست اِیلدی قُوش کیمی پَرین
اَگلشدی صَحنِ خانه دَه باخدی اُطاقلارا
فِکره گِیدوبدی بیربیرینَه وُوردی اَللّرین
دُوتدی یُوزین سَمایه طَرف گَلدی شِکویَه
بیر سادَه سُوز دِیدی وَلی مَعنا سی چُوخ دَرین
باغلاندِی دُودِمانِ علی دِینجَل اِی فَلک
سُوندی یانان چِراغلاری اوُلادِ حِیدَرین
آی آسمانی زِینَت اِیدَن خُوش سِتاره لَر
شَهرِ نَبی اِیتُوردی نِجومِ مُنوّرین
سیزدَه آخون مَنیم آخان اُولدُزلاریم کیمی
قاره گِیوبدی خانه سی خَتمِ پِیمبَرین
ظُلمَت اِیدُون سَمانی قَرانلُوق اِویم کیمی
گُوز داغینَه تَوان یُوخودی چُون بُو مُضطَرین
اِی بادِ نیمه شَب اوُد آلُوب یاندِیر عالَمی
قَلبیم دُوتوبدی اوُد نَه اَسُورسَن سَرین سَرین
داخل اُولُوبدی مَنزیله دِیزلَر اَسَه اَسَه
باشدان اَیاقَه دُوتمیشیدی رَعشَه پِیکرین
خامُوش اِیدُوب اُطاقیدَه شَمعِ شَبانَه نی
بیر گُوشیَه سِخلیدی او قز آچدی مَعجَرین
گُوردی اوُزین غَرِیب اِیوی اُوخشاتدی غُربَتَه
غَم غُصّه سُولدران یُوزینَه تُوکدی تِل لَرین
سَسلَندی اِی مَنیم اِیکی آغلار قالان گُوزُوم
چُوخ آغلِیُون دِیُوم سیزَه هَر لَحظَه آفَرین
چِخدی واریم یُوخا بُو گِیجَه وَر شِکستیَم
سَرمایَه دور دِل اَهلینَه دِیداری دِلبَرین
دِل پیچ و تاب اِیدور آلا گُوز دِلبریَم گِیدُوب
یُوخ طاقَت اَللّریمدَه سیلَه آلنیمُون تَرین
عَجز اِیلدیم آپارمادی بُو مُونسِ غَمی
کُول باشیمَه اوُخومادِی دِلبَر عَریضه می
گُونلَر گِچوب او ناخوشا تَنگ اُولدی روزگار
مُشکلدی مَرگَدَن بَلی اَحبابَه اِنتظار
فِکریمدَه وار تَخیّلی بیر مَنظَره یازام
شاعِر تَصرَفات اِیدَه شِعریندَه حَقّی وار
زِندانَه دونمشیدی بَنی هاشم اِیولَری
هِر اِیودَه واریدی نِچَه اُفتادَه اَشگبار
جُغدِ عَزایَه مَسکنیدی مُسلمُون اِیوی
مُسلم دِیُوب باجی لاری اِیلوردِی آه و زار
بیردَه عَلینون اُوغلی ابُوالفَضل مَنزلی
دُوتموشدی بام و رُوزَن و دِیوارینی غُبار
الله جَهاندا هِیچ اِیوی بی صاحِب اِیتمسُون
بی سَرپَرست اِیوین اُولار اِجلالی تار و مار
آبادِیدی اَگر چِه ابُوالفَضل مَنزلی
اُمّ البنین گُوزیندَه وَلِیکن خَرابَه وار
عبّاسُون اوُغلی بیر آناسی بیردَه هَمسَری
اوُچ چارَه سیز قالان هَر اوُچی مِین غَمَه دُچار
اوُچ مُینجی او اِمامِ حَسن دُودمانی دور
صُغرا و اُمّ سَلمَه او مَنزلدَه بی قَرار
سنّی کِئچن بیر عُورتیلَه بیر مَریضه قیز
دَر بَسته اِیودَه هر اِیکیسی وَصلَتَه خُمار
گُویا تَصادُفی او قُوناق گَلمیَن اِیوِه
عَبدللَهیلَه اُمّ بنین وارد اُولدولار
بیربیر لَرینَه باخدیلار آغلاشدیلار بیر آز
هَر کَس اِیدوب اُورکدَه اُولان دَردین آشکار
صُغرا باخُوب عَم اُوغلوسی عَبدللهَه دِیدی
ای قامَتی اُوجا عَموما زِندَه یادگار
رَنگُون سُولوب شَبیهدی بی باغبان گُله
اُولما وِیرور زَمانه سَنَه من کیمی فِشار
وِیرم قَسم گُوزل عُمُوما گُوندَه گَل بیزه
قُربانُوم داریخما کِچر دورِ روزگار
دَرک اِیلین زَماندا مُحبت مَقالنی
عبّاسُون اُوغلی باشلادی اوُز شَرحِ حالنی
غَم غُصّه لَر مَنی گَتُوروب زارَه عَم قیزی
جَبرِ زَمان اِیدوب بیزی بیچارَه عَم قیزی
آواره سَن نِجَه بُو بُیوک دُودماندا سَن
مَندَه او اِیودَه قالمشام آوارَه عَم قیزی
اوُلسون قَسم عَم اوُغلوم او قارَه گُوز اَکبرَه
سَن تَک اوُلوب مَنیمدَه گُونُوم قارَه عَم قیزی
چُوخ غَملی دور بُیُوک نَه نَه می تَک قُویانمُورام
چُوخ مایلم گَلَم سِیزَه دِیدارَه عَم قیزی
یُوخ فَرقی اِیولَرین بیزیم اِیودَه سِیزُونکی دور
قیدِ وَفانی اِیلمَرَم پاره عَم قیزی
بیر کارِوان مُسافریمیز گِئتدی حِیف اُولا
تاپشُوردُولار بیزی دَر و دِیواره عَم قیزی
اُوغلانلارا نَه هَمسفَر اِیتدی اوُلار مَنی
نَه قُوشدولار سَنی بالا قیزلارَه عَم قیزی
مَسجددَه بُوش قالوبدی بَنی هاشِمُون یِری
نِسگلدی رُوحِ اَحمدِ مُختارَه عَم قیزی
بیر نامَه یُولّا سِیدی گِیدَنلَر قالانلارا
تَسکین اُولاردِی دَردِ دِلِ آزارَه عَم قیزی
کُهنه لباس دَه مَنَه بیر عُمدَه دَرد اُولوب
سیرَه چخاندا کُوچه و بازارَه عَم قیزی
باشدان عَمامَه می گُوتُورُم سَندَه مَعجر آچ
عَجز اِیلیک خُلوصیلَه دادارَه عَم قیزی
یُوخ دور اُمیدیمز وَلی الله کَریم دور
وار اِلتفاتی عِترتِ اَطهارَه عَم قیزی
گَلسَه اَگر گِیدنلَریمِز دُودمانینَه
دُونسَه مَدینَه مِیز گِینه گُلزارَه عَم قیزی
تازَه لِباس آلاندا مَنَه مِهربان آتام
عَرض اِیلرَم آلار سَنَه گُوشورَاه عَم قِیزی
#انور سَنه یِِتیشدی خدانُون تَفضّلی
بُو سُوزناک نُوحَه نی یازدُون تَخیّلی
- شنبه
- 14
- مرداد
- 1402
- ساعت
- 23:40
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه