مُحَرّم دیر، خانیم زِینَب عَزاسی
بیزی سَسلَر حُسینین کَربَلاسی
یُولی باغلی قالیب دُشمَن اَلیندَه
داها زوّارینین یُوق سَس صَداسی
بُوگُون کَربُ بَلا ویران اوُلوب دِیر
حُسین اوُز قانینا غَلطان اوُلوب دِیر
چاغیر شاهِ نَجَف گَلسین هَرایَه
جَهادیلَه آچاق یُول کَربلایَه
علی نین ذُوالفقاری دادَه چاتسین
حُسین قُربانلاری گَلسین مِنایَه
بُوگُون کَربُ بلا ویران اوُلوب دِیر
حُسین اوُز قانینا غَلطان اوُلوب دِیر
جَهاد مِیدانی دِیر، مِلّت دایانسین
مُسلمان خوابِ غَفلَتدَن اوُیانسین
اوُجالسین نَعرهء اَلله اَکبر
گَرک کَافر جَهنَم اِیچرَه یانسین
بُوگُون کَربُ بَلا وِیران اوُلوب دِیر
حُسین اوُز قانینا غَلطان اوُلوب دِیر
گَلیب غِیرت گُونی، هُمّت زَمانی
اوُجالداق باشدا آذَربایجانی
گِئدَه ک صَدامِ کافرلَه جَهادَه
ییخاق بُو بی مُروّت اِئو ییخانی
بُوگُون کربُ بَلا وِیران اوُلوب دِیر
حُسین اوُز قانینا غَلطان اوُلوب دِیر
حُسین زَوّاری نین قُورتاردی صَبری
قیراق بُو قُوردلاری، کَافتاری، بَبری
آچاق یُول کَربلایَه، کاظمینَه
چَکَکَ آغُوشَه او شِش گُوشَه قَبری
بُوگُون کَربُ بَلا وِیران اوُلوب دِیر
حُسین اوُز قانینا غَلطان اوُلوب دِیر
گَرک دین اوُلماسا، دُونیانی آتماق
شَرَف، عِزّتلی بیر دُونیا یاراتماق
سَعادت دِیر حُسین قُربانلاری تَک
شَهادتلَه لَقاء اُللهَه چاتماق
بُوگُون کَربُ بَلا ویران اوُلوب دِیر
حُسین اوُز قانینا غَلطان اوُلوب دِیر
مُسلمان صَف چَکیب دَعوایَه گَلسین
چاغیر عَبّاسی تاسُوعایَه گَلسین
قیزی زِینَب اوُزی صاحِب عَزادیر
چاغیر زَهرانی عاشُورایَه گَلسین
بُوگُون کَربُ بَلا وِیران اوُلوب دِیر
حُسین اوُز قانینا غَلطان اوُلوب دِیر
آنا اوُغلون شَهید اوُلدی مُبارک
شَهادتلَه سَعید اوُلدی، مُبارک
اُمیدِ جَنّتین تاپدین، دا سَندَن
جَهنَم نا اُمید اوُلدی، مُبارک
بُوگُون کَربُ بَلا وِیران اوُلوب دِیر
حُسین اوُز قانینا غَلطان اوُلوب دِیر
بئله طوی کیم گؤروب دنیاده قاسم
طویی یاسه دؤنن شهزاده قاسم
آتا اوغُلون علی اَکبر فَداسی
طُویی قاسم کیمی اوُلموش عَزاسی
دُوروب جَنّت قاپُوسیندا گؤزتلیر
که گَلسینلَر آناسی لَه، آتاسی
بِئلَه طُوی کیم گُورُوب دُنیادَه قاسم
طُویی یاسه دُؤنن شَهزادَه قاسم
بُو گُون کربُ بَلا وِیران اوُلوب دِیر
حُسین اوُقانینا غَلطان اوُب دِیر
- شنبه
- 14
- مرداد
- 1402
- ساعت
- 23:51
- نوشته شده توسط
- یوسف اکبری
- شاعر:
-
محمد حسین شهریار
ارسال دیدگاه