جدّیُوی یابن الحَسن قُومِ ظُلام ئولدوردُولَر
دَعوی دین اِیتدیلَر اَمّا اِمام ئولدوردولر
قُومِ ظُلام ئولدوردُولر
اَهلِ کُوفه عالَمِ اِمکانی مَحزون اِیتدیلَر
قَلبِ عالَم قَلبینی چون لاله پُر خون اِیتدیلَر
نِینَوا دَشتیندَه بیر لِیلانی مَجنُون اِیتدیلَر
بیر جَوان شِبهِ نَبی ماهِ تَمام ئولدوردُولَر
گُوردولَر شیرِ خدایه بَنزورَی عَبّاس شیر
حیلِه اِیلَه کَسدیلَر سَر پَنجَه سین قُومِ شَریر
تاپدی رُوبَه طَبعلَر جُراَت وُوروب چوخ تیغِ و تیر
تیغِ تیزَه اِیتدیلَر جِسمین نِیام ئولدوردُولَر
بَسکه آهن دِللّرین دُوتمُوشدی قَلبین زَنگ لَر
دین و اِیمان شیشه سین سیندیردیلار دِل سَنگ لَر
ووردولار بالمَرّه نَنگه پُشت پا بی نَنگ لَر
صاحِبِ شأن و مَقام و نَنگ و نام ئولدوردُولَر
اوُلدولار بیر نُوعیلَه جامِ مِیّ ناحَقّه مَست
اِیتدیلَر پیمانهء پیمانِ اِسلامی شِکست
دینِ حقّی یخماقا اوُل فرقهء دُنیا پَرَست
اِیتدیلَر دینیا هَواسیلِه قیام ئولدوردُولَر
اِیلیَن قرآن حَمایل آدلاری قرآنیان
چَکدیلَر یاسین و طاها وجهینَه تیغ و سِنان
اِیتدیلَر قرآنِ ناطق قَلبینی تیره نِشان
ووردولار بیر سینیَه دُورت مین سَهام ئولدوردُولَر
فاطمه مَهریّه سیدی قان اوُلان آبِ فَرات
سُو یانندا یاندیلار اَمّا عَطشدَن طاهِرات
دُونمدی قانَه ندور عِلّت سَراسَر سایِلات
صاحِبِ آبِ فَراتی تَشنَه کام ئولدوردُولَر
بَسدی بیر اِیل بیر قَبیلَه اَهلینَه بیر داغِ دِل
اوُلمادی سفیانیان اَمّا بُو اِیشدَن مُنفَعل
اوُلسُون اوُلادِ اُمَیّه هر اِیکی دُنیا خَجِل
اِیتدیلَر آلِ مَنانی قَتل عام ئولدوردُولَر
اوُن اِیکی آیدان اِیدوب قرآندا حَیّ لایَنام
دُوردینی شَهرُ الحُرُم قان تُوکَماقی اوُندا حَرام
اَشهَرُ شَهرُ الحُرُمدَن دور مُحرّم لا کَلام
اوُز حَبیبین عاشِر شَهرُ الحَرام ئولدوردُولَر
اُمّته اَمر اِیلمیشدی حَضرتِ خِیر الاَنام
خانهء اِسلام تَعمیریندَه قِیلسُون اِهتمام
عاقّ اوُلوب پِیغمبَرَه گُوستَردیلَر عَکسِ مَرام
اِیتدیلَر تَخریب دینَه اِهتمام، ئولدوردُولَر
ساخلا اَل، وِیرمَه #حسینی مَطلَبَه بیر بِیلَه طُول
کَائناتی اِیلدی بُو ماجَرا زار و مَلُول
بَسدی بُو مَصراع اِمامِ عَصر اَگر اِیتسَه قَبُول
جَدّیُوی یابن الحَسن قُومِ ظُلام ئولدوردُولَر
- یکشنبه
- 15
- مرداد
- 1402
- ساعت
- 13:39
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه