بو غُربت ئولکَه دَه من زار و ناتوان ئولورَم
یُوخومدی حالیمَه بیر کَس باخُوب یانان ئولورَم
آتام رضا کیمی گِیزلین وِیروبلَه زَهر مَنه
ستَملَه باغریم اوُلوب مِثلِ لاله قان ئولورَم
حَیاتِ گُلشنیمُون نَخلی گُل کیمی سارالُوب
بَهارِ عُمریم اوُلوب ظُلمیلَه خَزان ئولورَم
آدیم تَقی کیمی شُغلیم اوُلوب تَقیّه مَنیم
نه قَدرَی دُشمنی اِیویندَه اِیدوب مَکان ئولورَم
جَواد و حَیّ و قُدیمین حُضورینَه گِیدورم
بُو قان اوُلان جِگریم اَلدَه اَرمَغان ئولورَم
اَگر چه ظاهرِ صُورتدَه بیر یارام یُوخدی
اِیدوبدی قَلبیمی مین زَخمِ کَین نِشان ئولورَم
اَلیم اوُرَکدَه یُوزوم تُوپراق اوُستَه جان وِیرورَم
بُو حَسرتیلَه خدایا مَنِ جَوان ئولورَم
اِیدوب مَعاملَه کالی بَکالی مَنلَه رَقیب
وِیروبدی زَهر آپاروبدی بَهارِ جان ئولورَم
شَهادَتیم منَه بیر سُود اوُلوب بُو غُربتدَن
غَریب ئولماقیمی بُولمُورَم زِیان ئولورَم
مَنه بُو ظلم اِیدَه نی من دُوشَن گُونَه دُوشسُون
تاپُولماسُون گُوروم اَحوالینَه یانان ئولورَم
یُوزیمَه باغلی قُویُوب چاره یُولّارین بُولورم
عَلاج دَردیمَه یُوخدی داخی گُمان ئولورَم
بُو یالقُوز اِیودَه گرک جان وِیرَم نه حَسرتیلَه
گُوزوم قالا قاپُودا هر نَفَس هر آن ئولورَم
مَدینَه شَهری دَگُول جَمع اوُلا بَنی هاشِم
آلا کَناریمی اِئل اَقربا یِکان ئولورَم
مَگر آتاسی ئولن نُوجَوان آتا نَعشین
اوُغول گَلوب گُوتُومَز جان وِیرَن زَمان ئولورَم
اوُغول نُولور مَنی جان وِیرمَه میش گَلوب گُورَه سَن
گُورم او گُل یُوزون اِی سَروِ بُوستان ئولورَم
آتا بالا نُولی بیر قُول بُویُون اوُلاق مَنیلَه
اوُرکدَه قالمیَه حَسرتلَریم نَهان ئولورَم
شکسته قَلبیلَه #وافی سَنُون اَلون دُوتارام
جَزا گُونی سَنی تَک قُویمارام اِینان ئولورَم
- یکشنبه
- 15
- مرداد
- 1402
- ساعت
- 13:42
- نوشته شده توسط
- یوسف اکبری
- شاعر:
-
مرحوم وافی تبریزی
ارسال دیدگاه