مَسمُوم اِیلیُوبلَر جِگریم قاندی اِلهی
یُوخدور سُو وِیرن دِل دُوداقیم یاندی اِلهی
اوُز مَحرمیم آخِر مَنه اوُز اِیتدیقُون اِیتدی
بیلَه بُولور ئولدوردی مَنی مَقصَدَه یِتدی
دُنیادَه هم عُقبادَه اوُنُون عِزّتی گِیتدی
گُوگُلوم کیمی اُمّید اِیوی وِیراندی اِلهی
بیر ظُلمیلَه ئولدوردی مَنی دُخترِ ماُمُون
مِثلین نه گُوروبدور نَه گُورَر دِیدهء گَردُون
مَقصودی وُورا تُهمَت اِیدَه دَردیمی اَفزُون
مَعصومَه بُو تُهمت مَگر آساندی اِلهی
قَلبیمدَه اَلیم، گُوشهء مَنزلدَه جِگر خون
شَرمندَه سِرشکیمَدَن اوُلا وار یِری جِیحُون
دِیواریدَه قالمُوش یُوزوم اِی خالقِ بیچُون
دِل آتَشِ حَسرتدَه الولاندی اِلهی
عَمّیم حَسنی اِیلدی اوُز مَحرمی مَسمُوم
اَمّا منِ مَظلُوم تَک او اوُلمادی مَظلُوم
آچمیشدی باشی اوُستَه باشین زِینَب و کُلثُوم
یِر گُوی او غَمَه اِیمدیدَه گِریاندی اِلهی
غَربتدَه یانیمدا نَه آنام واردی نَه خواهَر
اَل قَلبیدَه، گُوز یُولدا، گُوزی یاشلی مُکُدّر
دُشمَن مَنه هر ظُلم اَلیندَن گَلَه اِیلر
هرگز دِیمز آخِر بُو مُسلماندی اِلهی
بیگَانَه اَگر ظُلم اِیلیَه سَهل اوُلی سانماق
مُشکلدی وَلی ظُلم اَحبّایَه دایانماق
حَقیّتیمی داندی نِگاریم نِجَه دانماق
حَق دشمنینین قُولینَه تُولاندی اِلهی
مَن جان وِیرورَم بی کس و ماُیُوس اوُز ایویمده
یوخ بیر نفر اولسون منه مانوس اوز اِیویمدَه
اوُز مَحرمیم اِیلوب مَنی مَحبُوس اوُز اِیویمدَه
بُو اِیو منَه بیر گُوشهء زنداندی اِلهی
آهیم شَرَریندَن یِری وار اوُدلانا دُنیا
ئولدوردی بُو مَلعونَه مَنی اِیتمدی پَروا
باغلُوب قاپُونی قُویدی بُو اِیودَه مَنی تَنها
فکر اِیلَمَدی جان وِیرور عَطشاندی اِلهی
اوُز ئولماقیما آغلامارام اِیتمَرَم اَفغان
جان اوُسته فَغان اِیلرَم اوُز جَدّیمَه هر آن
گُون اِیسّی یارالی بَدَنیلَه اوُزی عَطشان
عِشق اَهلینَه عِشقی عَجَب عُنواندی اِلهی
یخدی بَدَنین کَرب و بَلا خاکینَه دُشمَن
سانسیز یارا وُوردی بَدَنِ پاکینَه دُشمَن
دُورت مین وُوروب اوُخ سینهء صَدچاکینَه دُشمَن
باخمازدیلا گُل پِیکری شان شاندی اِلهی
مَاُمُونِ لَعینُون قیزی اوُل جَعدهء ثانی
مَسمُوم اِیلدی حَضرتی یاندوردی جَهانی
تا حاصِل اوُلوب مَعتَصَمین کامِ نَهانی
بُولمَم بُو نِجَه کینهء پِنهاندی اِلهی
تُوهین اِیلیُوب جِسمِ هُمایُونِ اِمامَه
اَمر اِیتدی چخاتسُونلا اوُنُون نَعشینی بامَه
بام اوُستن آتُوبلار بَدَنین مَعبَرِ عامَه
بیر کس دِیمدی حُجّتِ یَزداندی اِلهی
یِر اوُزره قالوب اوُچ گِجَه گُوندوز او بَدَن زار
نَه آغلیانی اوُلدی نَه بیر کیم سَه عَزادار
وارِث اوُلوب اوُز جَدّی حَسینَه او دِل اَفکار
مَظلومِ جَهان شاهِ شَهیداندی اِلهی
اوُچ گُون بَدَنی قالدی حُسینین قُوری یِردَه
خار و خَس و خاشاک چَکوب جِسمینَه پَردَه
بُو مُحنَت عُظمی گَتیروب زِینَبی دَردَه
قارداش بَدَنین گُوردی که عُریاندی اِلهی
اِی خالقِ بی مثل و بَدَل قادِر و #صابر
دَربارینَه سائل به کَف اَشراف و اَکابِر
قویما اوُلا دُنیادَه ذَلیل اَهلِ مَنابِر
ظاهردَه بُولار دَینَه نِگهباندی اِلهی
- یکشنبه
- 15
- مرداد
- 1402
- ساعت
- 13:43
- نوشته شده توسط
- یوسف اکبری
- شاعر:
-
مرحوم صابر تبریزی
ارسال دیدگاه