صبر ایله علی عهدووَه پیمانووَه قربان
بیرلحظه دایان جانیم اولاجانووَه قربان
زَهرایَه گَلین گلدی نَنون بَختوَر اوُلدی
دنیادَه اوُغول سایه سینه مُفتخَر اوُلدی
امّا بِله آیریلماق ئولومدَن بتَر اوُلدی
درماندی آدون دَردیمَه درمانووَه قربان
تَقدیر اَلی بوچُولده روا دور دونَه اوُغلوم
اوّل من ئولَم عازم اوُلام مَدفنَه اوُغلوم
قرآن اوُخیا قبریمُون اوُسته مَنه اوُغلوم
گَل اِیندی اوُخی نَغمهء قرآنووَه قربان
تَجهیزِ سِلاح اِئتدی اَزلدَن سَنی داوَر
کِیپریکلَرون اوُخ بو اِیکی قاشلار اِیکی خَنجر
میدانَه گِئدورسَن نَه شتابان اوُغول اَکبر
صَف صَف دوزولَن لَشکرِ مُژگانووَه قربان
شَهلا گُوزوون گردشی مَعنای وِجاهَت
وِئردی باخیشُون نَرگسِ جادویَه خَجالَت
بیر دُون مَنه باخ قُوی آپاروم فِیضِ زیارت
قاره گُوزووَه زُلفِ پَریشانووَه قربان
مِصرَه گُوزلیم دوشسَه یُولون اِی مَه لِیلا
طعنَه وِراجاق یُوسفَه بُو قامَتِ رعنا
گُورمیش بُوجَمالی بُو قَدی هاردا زُلیخا
لَعل لَبووَه چاه زَنخدانووَه قربان
او یُوسف کَنعانیدی سَن یُوسفِ خِلقت
یَعقوب ئوزیدَه گُورسَه سَنی اِیندی بو ساعَت
یاددان چیخادار یُوسفی تا صُبحِ قیامت
لِیلایَه دِیر گُورمَلی قُربانووَه قُربان
مُنشیّ قَضا لُوحِ غَمه اِیلدی اِنشاد
من بَختی قَرا گُورمِیَم آخر سَنی داماد
مانع دَگولَم گِئتملی سَن گِئت اِئوین آباد
اوُزدوم اَلیمی گِئت علی جانانووَه قُربان
#نادر بو تَمنادَه یانار صُبح و مَسادَه
مَعشوقینی اِیستر گُوره تا کَرب و بَلادَه
نَهر اوُسته قاچا آغلاماقا پای پیادَه
اِی کَرب و بَلا شاهِ شَهیدانووَه قُربان
- یکشنبه
- 15
- مرداد
- 1402
- ساعت
- 13:56
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه