اوندا که عصرین امامی عالمه سلطان اولار
دین اولار اسلام دینی دولت قرآن اولار
بو امام عصره تابع دور حقیقی شیعه لر
عامل احکام قرآن ملت ایران اولار
معنی قرآنی امّت بیلمسه نادان اولار
معنی قرآن بیلنلر خرّم و خندان اولار
بوجهانی که گورورسوز هرج و مرج و بیقرار
هیچ کسون یوخ اختیاری هامّی دور بی اختیار
اهل دین و مذهبه هر بیر طرفدن وار فشار
گر ظهور ایتسه امام، آسوده لوخ امکان اولار
دوندرر اهل جهانین فکرینی اندیشه سین
محو ایدر دست عدالت ظلم و جورین ریشه سین
مردم دنیا دوتالّار دین و قرآن پیشه سین
بیر چتین قالماز جهاندا هر نه وار آسان اولار
حیف اولا دینی اولان معنای دینی قانموری
مغزی، باطل سوزلریله خشک اولوب، ایسلانموری
دین و قرآنه عقیده ایلور اصلاً دانموری
بیلمور عمری بو طریقیله گچوب پایان اولار
ایستوری هر ایشده عادت وار اونی ترک ایتمسون
هر عبادتدن که عادتدور کناره گتمسون
قورخوری ترک ایتسه عاداتی مرامه یتمسون
دیندن چون خارج اولدی تابع شیطان اولار
بیلموری وار هر عملدن اوتری قرآندا سند
هر نه ایش گورسه گرگ قرآنه ایتسون مستند
حکم قرآندان چخان کافردی بی دیندور عَنَد
روز محشرده قاچانماز واصل نیران اولار
پرچم اسلام ایدن گون بو جهاندا اهتراز
شیعهء پاک علی دور هر طرفده سرفراز
لشکر اسلامی مؤمنلر ایدللر پیشواز
مطلقاً مُجریدی هر بیر حکم اولار فرمان اولار
ای مسلمانلار قَوی دیندور بو دینوز آتمیون
چوخ بھالی دینیدور اسکیک بهایه ساتمیون
صاحب دینوز گلر، بیدار اولارسوز، یاتمیون
دورهء امن و امان و صلح و اطمینان اولار
اوندا که عصرین امامی عالمه اولدی امیر
هر نه لامذهب اولا مطلق اولولار دستگیر
فرقهء باب و بهائینی امام ایلر اسیر
هر نه حزب اولسا جهاندا سربسر ویران اولار
اوندا که عصرین امامی اولدی سلطان جهان
کشف اولار مؤمنلره هر گونه اسرار نهان
تابع امر ولی عصر اولار کون و مکان
اهل دل خوشحال اولور زنده دلِ انسان اولار
اوندا که عصرین امامی ائتدی دنیاده ظهور
روی دنیانین دوتار سرتاسرین آثار نور
محو اولار هر یرده اولسا مرکزِ کِبر و غرور
زندگان لوخ ایلینلر عامل قرآن اولار
ای حسینیلر عزادارلوخ بیوک دستور دور
محضر پاک امام عصرده منظوردور
خوش او دستوره که او قرآنه دینه جوردور
رد اولار هر بیر عمل که اوندا بیر نقصان اولار
سعی ایدون اعمالوزی تطبیق قرآن ایلیون
تا حسینون خدمتین دنیایه اعلان ایلیون
دینسیز بیگانگانی سیز مسلمان ایلیون
گورسه هر کس دوز مسلمان صاحب ایمان اولار
#کهنموئی بو عمللر چوخ بیوک آثار دور
حیف اولا ملت یاتوبدور روحیده بیمار دور
دوره دن اسلام دینین آختاران بیدار دور
خوار ایدن دینی نظرده پیرو نادان اولار
- یکشنبه
- 15
- مرداد
- 1402
- ساعت
- 13:58
- نوشته شده توسط
- یوسف اکبری
- شاعر:
-
مرحوم سیّد حسین کهنمویی
ارسال دیدگاه