دوشمُوشمم مدّتدی بیر دردَه دوا مُشتاقیّم
غصّه دی خشکیده نی تک مین نَوا مُشتاقیّم
مَحبسِ غمدَه وجودیم آز قالوب پامال اوُلا
بیر محلّ خوش صَفا و خوش هَوا مُشتاقیّم
یتمُوری دامانِ پاکِ یارَه پا لَنگم اَلیم
عَرضِ حال اِئتماقلیقا بادِ صَبا مُشتاقیّم
بی وَفا اَغیار اَلیندَن لاله تک دِل داغلیم
بیر نگاهِ دِلرُبا و با وَفا مُشتاقیّم
قُلزُمِ حِیرتدَه وورّام شُوطَه هر صُبح و مَسا
من او غَواصّم که دُرَّ پُر بَها مُشتاقیّم
آختارار پَروانه شَمعی بُلبلِ شِیدا گُلی
من طَوافِ مَرقدِ پاکِ #رضا مُشتاقیّم
بیر جَماعَت حَسرتِ جَنّتلَه گُوز یاشی تُوکر
من خدا عالِمدی #ایوان_طلا مُشتاقیّم
باغریمی مُدّتدی سَمّ عِشقیلَه قان اِئتمُوشَم
ظُلمیلَه مَسمُوم اوُلان بیر پیشوا مُشتاقیّم
سَرفَراز اوُللّام قویام یُوز بیردَه پائین پائینَه
پیشِ رو بالای سَر پائین پا مُشتاقیّم
آرزومندَم دورام بالای سَردَه عَرض اِیدم
اِی قَتیلِ زَهرِ کین سَندَن عَطا مُشتاقیّم
اِیستَه دَرگاهِ خدادَن اِیلسُون قسمت مَنه
جَدّیُون قَبرین که هر صُبح و مَسا مُشتاقیّم
اِئتمَرم مُدّتدی من فِردوسِ اَعلا حَسرتین
بیر فَراته تَشنهِ اُم بیر #کربَلا مُشتاقیّم
روز و شَب وِردیم حسین، ذِکریم حسین، فِکریم حسین
من حسین بیماریَم خاکِ شَفا مُشتاقیّم
اوُل وِجُودِ نازنینون اوُل مُقدّس بُقعه دَه
حَسرتِ پابُوسیَم من اِی خدا مُشتاقیّم
شأنی اَکبر، آدی اَصغر بَستری شَه سینَه سی
کُوکَبِ صُبحِ شَرف اوُل مَه لَقا مُشتاقیَم
آلتی گیوشَه بیر مَزارِ پاکه یُوز قُویسام اَگر
اَکبرِ شَه زادهء گُلگُون قَبا مُشتاقیّم
خِیمَه گاهین فِکری صَبریم خیمه سین تاراج اِیدوب
بیر حَنالی خِیمَه دَه نُو کدخدا مُشتاقیّم
رُوضهء باب الحَوائج حَضرتِ عَبّاسدَه
قُورماقا بیر جُمعیلَه بَزمِ عَزا مُشتاقیّم
مَشگِ چِشمیم اوُخلانان سُو مَشگی تَک سُو ساخلاماز
تَشنه لَر سَقّاسی بیر صاحِب لَوا مُشتاقیّم
آه او ساعَتدَن که گِیتدی صاق اَلی صُولدا قلج
سَسلنُور اَهلِ وِلایم مَن بَلا مُشتاقیّم
یُوخ ئولومدَن باکیم اَصلاً اِی گُروهِ کینه تُوز
اوُلماقا ئوز دِینیمَه بُو گُون فَدا مُشتاقیّم
صاقیمی سالدوز صُول اَللّی اِیلرَم دینَه کُومَک
بُو وَظیفَم دور یِتیشسَه هر جَفا مُشتاقیّم
وِئردیقیم اَل شاهِدیم دور چَکمُوشَم جانیمدن اَل
نه جَهانه طالبَم من نَه هَوا مُشتاقیّم
عُمردَه سَعییم بُو دور سُو مَشگیمَه اوُخ دَگمَه سُون
سینه مَه دَگسَه اَگر یُوز مین یارا مُشتاقیّم
چون حسین اِبنِ على اَطفالینُون سَقّاسیم
اِئتماقا بُو مَنصبین حَقّون اَدا مُشتاقیّم
گُوزلوری هَشتاد اِیکی لَب تَشنه بُو مَشگین یُولون
بیر دُولی سُو مَشگی بیر آلِ عَبا مُشتاقیّم
صُول اَلیندَه اِئتدی بیر دَستِ ستم پیشَه قَلم
سَسلنُوب بُو ظُلمَه دَه اولّام رِضا مُشتاقیّم
گلدی بیر اوُخدا دَگوب سُو مَشگینَه آخدی سُویی
حال یأسیلَه دِیدی دارِ بَقا مُشتاقیّم
بُولمُورم نَه ظُلم اوُلوب آتدان یخلدى مَقتلَه
عَرض اِئدوب قارداش جَمالون گُورماقین مُشتاقیّم
گَل گُوروم بیردَه جَمال اللهء جان تَسلیم اِیدُوم
جِلوهء وَجهِ خدانُون یا اَخا مُشتاقیّم
ساخلا اَل یازما #شهابا خَتم قیل بُو نُوحَه نی
عَرض اِیله مُدّتدی من قَبرون شَها مُشتاقیّم
قَبریم اوُسته نَصب اِیله اوّل گِجَه قانلو عَلم
اوُل عَلمدارِ دیارِ نِینَوا مُشتاقیّم
بَسدی بیر دَفعه بُویُورسان نوکریم دور بُو #شهاب
اَللّی اِیلدی نُوکرَم بیر بُو نِدا مُشتاقیم
- یکشنبه
- 15
- مرداد
- 1402
- ساعت
- 14:0
- نوشته شده توسط
- یوسف اکبری
ارسال دیدگاه