یخلدی شاهِ لَب عَطشان او دَمکه قَتلگَهَه
او وَقته حالِ وَلَه وِئردی سَنگدِل سِپهَه
باخُوبلا بیر بیرینین یُوزلَرینَه چوخ حِیران
اوُلوب وِجودلَری بَرگِ بِید تَک لَرزان
بیری دِیردی بُو دور پادشاهِ یُومِ نَشُور
گُورَون نَنُوعِیلَه پَروردگاریلَه دانشُور
آچوبدی حَقّه دِلین چوُخ خدا خدا سُویلُور
یَقین که جَدّینین اُمّتلرین دُعا اِیلور
بیری دِیردی سُولوب گُللّری یانُوب باغی
که وار اوُنُون اوُرگیندَه جَوان اوُغول داغی
گُوروب او حالتی سَعد اوُغلی مَطلَبی بُلدی
دُونُوب اِمامَه طَرف باخدی طَعن اِیدوب گُلدی
دِیدی که اِی قُشُون اَهلی مَگر نَه فکر اِیدوسُوز
حُسینین اَمری تَمام اوُلمامُوش هارا گِیدوسُوز
دایانَمِیُون تُوکُولون تِئز کَسون اوُنُون باشینی
نِجه که قَتلَه یِتُوردوز بُو چُولدَه قارداشینی
جَواب وِیردیلَه بُو اَمرَه اِئتمُروخ اِقدام
اوُنُون بو حالی بُو دِللّردَن آلدی صَبر و قَوام
بُو سُوزدَه گُوردیلَه گَردِ عَظیم گُورسندی
باشیندا جَمعی قُشُون گلدی یَعقوبِ کَندی
چاغُوردی زادهء وَقاص اونُی بَرابَرینَه
دِیدی که دِیر گَلوب سَن بُو کَربَلا یِرینَه
بُو گُوندَه وار گُنَهون مُوردِ مُواخِذَه سَن
که سَن یُوبانماقوا اِیسته سَن عَوض اِیدَه سَن
دایانما دِلدَه کی قَصدُون اَمیریُوه بُلدور
او تُپراق اوُسته دُوشَن تَشنه کامی گِیت ئولدور
دِئدی مَنی اِیلیُون سیز بُو سرّیدَن آگاه
که اوُل یارالیا سیز ثابِت اِئتموسُوز نَه گُناه
جَواب وِئردی اِمامِ زَمانَه چون اولُوب عاق
ثَوابی دور اوُنی بُو گُوندَه تَشنه ئولدورماق
اِئشیتدی تا بو سُوزی سُویلدی بِفُوریَت
اِمامیمُون اِیدرُم اَمرینَه بُو گُون طاعَت
آقام اِمامِ حُسینَه اَگر اوُلوب دور عاق
بُو دَمدَه من اوُنی ئولدورماقا وارام مُشتاق
بیو گُون بُو عَرصَه دَه قیلّام اوُنا حَیاتی حَرام
گِیدوب مَدینَه دَه آلام حُسینیدَن اَنعام
اِمامَه عاق اوُلانون باشینی گِئدوب کَسرَم
کُسندَه باشینی فَریادِ یا حسین چَکرم
مَدینَه شاهی حُسین دور اوُلوم اوُنا قُربان
که کِیمدی دَهریدَه اوُندان صُورا اِمامِ زَمان
اَلینَه خَنجر آلوب یُوز وِیروبدی شُور و شَعف
یُوگُوردی هُولیلَه گُودالِ قَتلگاهَه طَرف
یِتُوب باش اوُستونَه گُوردی سیزیلدوری او غَریَب
اوُنُون سیزیلدیسی اَلدَن آلور قَرار و شَکیب
دُوتُوب گُویَه یُوزینی عَرض اِئدور خداوندا
بُو یِردَه دِینیوی قانیملَه اِیلَرم اِحیا
بُو گُونگُه گُوندَه وارام وَصلیوه سَنُون شایِق
گَتُورمَدیم وَلی اوُل بَزمَه تُحفهء لایِق
اوُلار که مُمکنیدی هر نَیه گَلوردی گُمان
سَنیون یُولوندا تَمامین من اِیلَدیم قُربان
سُوسُوز فَدالَری گُوردوقجا مَندَه کام آلدُوم
سَنُون او فِدیُه لَرینَدن اوُزوم گِئجه قالدیم
مَنیم بُو حالتیمَه رَحمتیُوی قیل مَشمُول
بُو آز فَدالَریمی دَرگهوندَه اِیله قَبُول
بُو قَتلگَاهیدَه گُوستَر تَفضّل آثارین
مَنه بَغیشلَه خدا اُمّتین گُنهکارین
یُولوندا تَشنه لَب ئولماقَه نَه هَراسیم وار
تَفضّل اِئتسَن اگر بیر جَه اِلتماسیم وار
گُوروب بو حالتی یَعقوب اوُلوبدی چوخ دِلگیر
دِئدی که اِی یارالی سَندَه واردی نَه تَقصیر
که اِیلیُوبلَه سنین قَتلیوه منی مأمُور
یَقین که اِیمدی گُناهُوندان اوُلمُوسان معذور
دولاندوروب یُوزینی حَضرت اوُل جَوانَه باخوب
باخا با خا یُوزینَه گُوزدَن اَشگِ چشمی آخوب
بُویُوردی من بُلورم اِشقیای دورِ زَمَن
سَنه دِیُوبله مَنیم باشیمی بو گُون کَسَه سَن
سالوب عُمَر سَنی آیری خیاله خوش گَلدُون
که یُولّیُوبدی بُو اَمرِ مَحالَه خوش گُلدُون
خَزانِ جاندی وَلی نُوبَهارَ اِیماندی
چیخوبدی گُلشنِ وَصلوندَه لاله خُوش گَلدُون
اَلیوی ساخلا جَوان خَنجریُوی قُوی یِرینَه
تأمّل اِیله گَلوم بیر جَه حالَه خُوش گَلدُون
سَنی قَضا قَلمی یازمِیُوب مَنه قاتِل
اِیدوبدی قَتلیمَه شِمرِه حَوالَه خُوش گَلدُون
اَلیندَه خَنجَری دوتما باخُور سَکینَه قیزیم
که تاب اِیلمَه سَن اِئتسه نالَه خُوش گَلدُون
دوروبدی خِیمَه قَباقیندَه قرخادِین عُورت
تَرحّم اِیلَه او اَهل و عَیالَه خُوش گَلدُون
اوُلوبدی گُل یُوزینَه کَربَلا غُباری نِقاب
سالوبدی قان بُو خَط و خالَه هالَه خُوش گَلدُون
وَفا سِپهرینین اوُلدوزلاری اِیدوبدی غُروب
یِتوبدی شَمسِ اِمامَت زَوالَه خُوش گَلدُون
گُورونمِیُوبدی که یَعقوب یُوسف ئولدورسُون
یِتندَه مِصریدَه بَزمِ وِصالَه خُوش گَلدُون
اِئشتدی بُو سُوزی یَعقُوب چَکدی دِلدَن آه
دِیدی اؤزیُوی نِشان وِیر مَنه سَنی الله
یانقلی سُوزلَریلَه قَلبیمی اَریتدُون سَن
آدون بَیان اِیله آندور مَنه گُوروم کیمسَن
بُویُوردی حَضرت اوُنا اِی جَوانِ غَرقِ مُحَن
بُو گُوندَه صُبح زَمانی چیخاندا اِیودَن سَن
آنان سَنه دِیدی کَشف اُیدوم سَنه او سُوزی
تَعجُب اِیلدی یَعقُوب شَه بُویُوردی اوُزی
دِیدی که صُبح اِیُویندَن چیخان زَماندا جَوان
آنان قباقیُوی کَسدی اَلینده بیر قرآن
دِیدی قُسم وِیرورَم بُو عَزیز قرآنه
اوُنُون دالینجا اوُغول گِیسُوی پَریشانَه
گُوتُورمَرم اَتگّوندَن قیامَتَه کیمی اَل
حَلال اِیلَمُرم اِی اوُغول سَنی تِیز گَل
عَلاج اِیلُه بُو یانان قَلبیمُون حَرارتینَه
آپار مَنی قِییدندَه حُسین زِیارتینَه
دِیدی یارالی سِنیق قَلبی یاخشی شاد اِیلدُون
اوُلوم حُسینیمَه قُربان حُسینی یاد اِیلدُون
کَسوب باشُیوی عُمر سَعدَه خِیر خُواه اوُلام
حُسین زیارتینین خَرجینی تَمام آلّام
بُویُوردی قانیمَه اِی نُوجَوان چوخ سُوساما
یُوبانما بُوردا دو گِت رَحم اِیلَه غَریب آناوا
داخی لِزوم دَگُل جانِبِ حِجازَه گِیدَه
باشیمی گَل کس آپار تا آنان زیارت اِیدَه
سَنه زیارت آناندان قباقجا اوُلدی نَصیب
عَزیزِ حَضرتِ زَهرا مَنم حُسینِ غَریب
اِئشیتدی بُو سُوزی یَعقُوب خَنجَری آتدی
سرشگِ چشمینی خونابهء دِله قاتدی
اؤرک دوگُوندی جگر داغلی حُولیلَه دوردی
قزاردی رَنگی اِیکی اللّی باشینَه ووردی
اوُزینی سالدی اِمامِ حسین قَدملَرینَه
وِیروب اِجازه او دَم اشگِ دیدهء تَرینَه
دِئدی که کُور اوُلیدی منیم گُوزوم اِی کاش
سَزادی گر یُوزیمَه دیده دَن آخا قان یاش
منی گُذشت اِیلَه اِی من سَنه بَلا گَردان
قُصوریمی سَن اوُزون عَفو قیل سَنه قُربان
تانیمادیم سَنی من هَتکِ اِحترام اِیلدیم
جَسارَتیلَه سَنین قَتلیوَه قیام اِیلدیم
مُقصّرم منی عَفو اِیله اِی شَهِ ازَلی
سَنه یارا وورانُون من گُوروم شَل اولسُون اَلی
بو قَدر یاره که جسمِ چاک چاکه دَگُوب
عَلاوه تیرِ سِه شُعبه بُو قَلبِ پاکه دَگوب
نِجَه بدندی بو قَدری یارایه تاب اِئتدی
مَنیمدَه قَلبیمی بو سُوز دِل کباب اِئتدی
سَنه فَدا اوُلا جانیم اَیا شَهِ مَدنی
نَقَدر اوُلسا قُصُوریم گُذشت اِیلَه منی
اَیا شَهنشَهِ دوران عَزیزِ خَتمِ رُسُول
مَنیم بو عَرضیمی گل لطف اوُزیله اِیلَه قَبُول
خدادَن اِیسته منی اِیتمَسُون جَهاندا ذَلیل
گلُوب بو دَرگهه سالدیم اوُزیمی مَندَه #دخیل
- یکشنبه
- 15
- مرداد
- 1402
- ساعت
- 14:18
- نوشته شده توسط
- یوسف اکبری
ارسال دیدگاه