قُورتولدی روزگاریم دِل داغدار قالدى
صِیقل شکست اوُلدی آئینه تار قالدى
نه نُوع تُوپراق آلتدا ریشه قالار آقاجدان
گِئتدیم دِلیمدَه آرزیم تاپدی قَرار قالدى
وار هانسی مهربانیم دُوتقون بو قَلبی آچسُون
دِل داغلی لاله لَر تَک دِل داغدار قالدى
بو عُمرِ پَنج روزه چون باد بَرق گِتدی
دَرد آشنا اوُرکدَه دَردیم هِزار قالدى
بیر گُون دوتار یَقین اِئت قانیم سَنی ستمگر
من گِتدیم اِنتقامین دورِ مَدارَه قالدى
دنیانین عِشرتیلَه مندَن داخى آلینماز
آلنیمدا یار اِیویندن کیم بو غُبار قالدى
من عاشقم اِیله بیر مَعشوقه یُوخدی مَرگی
ئولسَم دَه دِلدَه زِنده عشقِ نِگار قالدى
من عاشقِ حُسینم مَعشوق سَرمَدی دور
جاوید عشق اوُندان بیر یادگار قالدى
عشق اوُسته گِچدی باشدان عشق اوُسته دُویدی جاندان
دِللّردَه گُل آدی تا وار روزگار قالدى
گُلزارِ دینه قاندان سُو وِیردی اِیتدی سیراب
کرب و بلادَه اوُندان بیر لاله زار قالدى
اوُردا خَزانِ دینی دوندردی نُو بَهاره
گُلزارِ دین و قرآن دائم بَهار قالدى
یِتمیش اِیکی شَهیدَه اِیچدیردی بادهء عشق
هر تَک تَکی یخیلیدی مَست و خُمار قالدى
گُلزاردَن اَل اوُزدی اِسلام باغبانی
نه گُل قالوب نه بلبل نه شاخسار قالدى
صَحرای کربلایَه گلمیشدی بیر اِئلیلَه
اِئل کُوچدی گِتدی دوشدی اِئلدن کنار قالدى
قُول باغلى شامَه گِیتدی بیر شیر خوار آناسی
سُود سُوز آنادان آیری بیر شیر خوار قالدى
هَشتادَه دِین اَسیری سینه یارالی گِتدی
یِتمیش اِیکی شَهیدین تَن زخمدار قالدى
سَر نِیزیه وریلدی یِتمیش شَهید باشی
تُوپراقلار اوُسته نَعشِ هر سَربِدار قالدى
قان اِیچرَه دوشدی یُورقُون اِسلام سَر قطاری
زِینَب اوُنُون یِریندَه بیر سَر قَطار قالدى
میندیردی اِهلِ بِیتی یِردَه قالوب اوُزی تَک
بیردَه امامِ ساجد بیمار و زار قالدى
شَرم و حَیالی زِینَب صاق و صُولا باخاردی
سُویلردی نه مُعینیم نه غُمگُسار قالدى
یارَب اَسیرِ قومِ بی شَرم و بی حَیایم
بی شَرم اَلینده شَرمِ کامل عَیار قالدى
یُوخ محرمیم دِییم تا اِیتسُون سَوارِ ناقه
نامحرم اِیچرَه بیکس بو دِلفگار قالدى
سَجاد او حالی گُوردی جُوش اِیتدی غِیرتیندَن
نه صَبر اِیدَه بُولوب نَه دِلدَه قَرار قالدى
فَرمایش اِیتدی عَمّه ئولمُوب هَلَه بُو سَجاد
بیر بِیلَه گُوندَه سَن تَک بی یاره یار قالدى
قیلّام سَوار اؤزوم من اِی آبروی عِفّت
تا سانماسُونلا یِردَه روحِ وِقار قالدى
بُوکدی دِیزین قُویاندا زِینَب قدَم یخیلیدی
قارداش بالاسی عَمّه بی اِختیار قالدى
میندیردی عَمّه سین چوخ رَنج و مَشَقّتیلَه
یِردَه اوُزی پیادَه اوُل شَهسوار قالدى
- یکشنبه
- 15
- مرداد
- 1402
- ساعت
- 14:26
- نوشته شده توسط
- یوسف اکبری
- شاعر:
-
صادق تائب
ارسال دیدگاه