چکمه خنجر باتما قانه توکمه ناحق قان یره
اولما باعث عالم لاهوت دگسون بیربیره
معدلت دیوانی وار روز جزاده ای شقی
گر حسین ئولسه خیال ایتمه باتار دین بیرقی
حق اوزی حامی اولار دینین چوخالسون رونقی
رونق دین بسته دور رأی خدای اکبره
هر مسلمانه گرکدی دین یولوندا جان ویره
نه اؤزون بلکه هامی وابسته سین قربان ویره
دین یولوندا ئولماقین عاملره اعلان ویره
دین یولوندا ئولماق عادتدور بیز آل حیدره
من عزیز حیدرم کفر اهلنه رام اولمارام
ذلته تن ویرمرم عالمده بد نام اولمارام
گر باشیم نوک جدایه گیچسه آرام اولمارام
ایلرم تبلیغ قرآن نیزه ده عالملره
وار نه ظلموز ایلدوز بو گونده حقیمده بروز
ایندی که عازمسن ئولدورماقه ئولدورمه سوسوز
بیر ایچیم سو ویر منه یاندی دلیم ای کینه توز
هم دوداقیم هم دلیم یاندی سوسوزدان یکسره
لیک فکر ایتمه حسین عطشاندی سویلور العطش
گرچه ظاهرده سوسوزدان جلدیم اولموش منکمش
مقصدیم احیای دیندی ایتمه منله کشمکش
بولموسن ظالم آتام ساقیدی حوض کوثره
باخما هر دم بوحسین سو ایستیور ای بی مرام
التماس ایتمز حسین ایستور اولا حجت تمام
میلیم اولسا حوض کوثردن گتورموش سو آتام
تشنه دور بو حنجر تشنه ولاکن خنجره
دین حق قربانیم حاشا ایچم من بیرده سو
ایلدیم بیر آز قباق قانیله تجدید وضو
تا اولونسون جدّیمون احکامی اجراء موبمو
سن نه حرمت دینه قویدون نه بابام پیغمبره
من حسینم فاطمه دلبندی سلطان حجیز
سن که ناحقّیله حقّه ویرمدون بو گون تمیز
قانیم الله قانیدور اللهیله ایتمه ستیز
توکمه ثاراللهی اولما یاغی حیّ داوره
سینه ایکه سن چخورسان حق دوتوب اوردا قرار
کیم گوروب بیر یرده ناحقّیله حقّی همجوار
جایگاه حقّه چخما ایتمه ظلمون آشکار
ویرمیوب حق جایگاه پاکینی کافر لره
وورموسوز بیر اوخ مکان لامکاندان قان آخور
وورموسوز بیر اود او اود عالملری ناره یاخور
نحس ایاقون سینمه قویما آنام زهرا باخور
چوخ چتیندی بو غم عظما او غملی مادره
ئولدورورسن سن منى فکر ایتمه قدرت سنده دی
ئولمرم نام حسینی تا قیامت زنده دی
بیر قیام ایتدیم قیامیم تا ابد پاینده دی
ایلدیم محصور دور ظلمه چکدیم دایره
ایسته سن دائم #حسنی خلق ایچینده صبح و شام
بیر گوزل آدون قالا سندن صورا یا خوش کلام
شعر یاز آغلا حسینه ایتگلن خدمت مدام
غملرین اول شهریارین اشگیله یاز دفتره
- یکشنبه
- 15
- مرداد
- 1402
- ساعت
- 14:27
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه