بو نه حالدیر کی سالیب سان اؤزیوی آی قارداش
ثؤپراقین اوسته قؤیوبسان یوزیوی آی قارداش
نه گلیب گؤر باشیما آش گؤزیوی آی قارداش
یاندیریب اکبر منی سنده داهی یاندیرما
سیندیریب دشمن منی ، سنده داهی سیندیرما
(( یالواریرام دؤنه دؤنه آی قارداش ))
(( قؤیما منی یامان گونه آی قارداش ))
آی قارداش ۳
جان جان آی قارداشیم آی صبریمی الدن آلانیم
بئلیمی سیندیرانیم ، آی منی درده سالانیم
قؤلسوز بو پیکریوین قؤی باشینا بیر دؤلانیم
هانسی قارداش بو حالی گؤرسه وئرر جان یارالی
قان دؤلان گؤزلریوه قارداشین قربان یارالی
(( یالواریرام دؤنه دؤنه آی قارداش ))
(( قؤیما منی یامان گونه آی قارداش ))
آی قارداش ۳
یانسین اوچ شعبه اؤخی بو گؤزیوه ووران سنین
بیر آغیر عمودیله بو باشیوی یاران سنین
آشیب حتدن گؤرورم چؤخدو اخا یاران سنین
یئری وار سسلیه سن زهرا آنان گلسین اخا
بو ساغالماز یاراوا بلکه چارا قیلسین اخا
(( یالواریرام دؤنه دؤنه آی قارداش ))
(( قؤیما منی یامان گونه آی قارداش ))
آی قارداش ۳
قلبیمی ائیلمه توش چاره سیز آلامه اخا
گؤروسن دشمنیمیز دای یئتیشیب کامه اخا
قؤیما (نالان) منی چؤخ دور گئداخ اخیامه اخا
قؤیمارام قیزلاری سو صحبتینی آشسین اخا
عطشیندن بالالار سس سالیب آغلاشسین اخا
(( یالواریرام دؤنه دؤنه آی قارداش ))
(( قؤیما منی یامان گونه آی قارداش ))
آی قارداش ۳
کیچیلن بو قدیوه یئر گؤیه سلطان آغلار
من تک آواره قالان زار و پریشان آغلار
یانار هجرینده اخا زینب نالان آغلار
دییَر ایوای داغیلان جاه و جلالی قارداش
بورویَن عالمی بو درد و ملالی قارداش
(( یالواریرام دؤنه دؤنه آی قارداش ))
(( قؤیما منی یامان گونه آی قارداش ))
آی قارداش ۳
بیلیردین کی اؤخ آتان دؤره ده دشمن چؤخدو
گینه قؤرخو اؤرگینده سنین اصلا یؤخودو
سنی دیلدن سالان اول مشکه دَیَن بیر اؤخودو
دئیمه سئیدی اونا اؤخ کیمسه ییخانمازدی سنی
ال تاپیب دشمن سنه ، درده سالانمازدی منی
(( یالواریرام دؤنه دؤنه آی قارداش ))
(( قؤیما منی یامان گونه آی قارداش ))
آی قارداش ۳
سنه من فخر ائده رم کان شجاعت سن اخا
سن حیا اولدوزوسان ، سن خود غیرت سن اخا
سن منه شان و شرف سن منه عزت سن اخا
سنه چؤخ ظلم اولونوب قؤی دئییم عالم بیلسین
قاپیوا گلسه بیری قؤی بئله (نالان) گلسین
(( یالواریرام دؤنه دؤنه آی قارداش ))
(( قؤیما منی یامان گونه آی قارداش ))
آی قارداش ۳
- یکشنبه
- 15
- مرداد
- 1402
- ساعت
- 15:8
- نوشته شده توسط
- یوسف اکبری
ارسال دیدگاه