تل زینبدن نلر گوروب آلیب زلفون اله
گوزده قان یاش دیلده قارداش وای قاچیب دیر مقتله
نه دئمک اولار مگر اوره گی داشدان قاتله
بیلموری نه ائیله سین مین بیر فیکیرده دیر هره
چوخ چتیندیر قان ایچینده گوره باجی قارداشون
بو غمِ عظما ائدیب شان شان اؤره گینین باشون
زینبین وای حالینا ، گره ک ائده قان ، گؤز یاشون
نئینه سین گؤرن مَسه باجی بیر ایش برادره
باش یارا بدن یارا دوشوبدی بی رحم الینه
پیکری اوخشور خزان یئلی داغیتمیش بیر گوله
نیزه دن اوخدان سورا یوخ کیمسه امداده گله
مین قوشون انصاف دئیل حمله ائده بیر نفره
آهِ آتش بارینی داغلی اورکده بسلدی
یوز دوتوب گوی سمتینه حقدن اؤلومون ایسلدی
یاندیم آی قارداش دئییب زینب ، آناسین سسلدی
دئدی تئز گل آی ننه بیر باخ فرزند حیدره
گور نئجه طوفان سالیب دشمن بو جنگ میدانینا
گؤر نئجه قصد ائیله ییب مظلوم بالاوون جانینا
گور نئجه قاتیب گوزوم یاشین جگریم قانینا
گور قیزبن زینب قالیب نئجه یامان دردسره
وورمیون اوغولسوزی بسدیر دییه یوخدور بیری
بسدی دای یاندیرمیون بو زینب غم پروری
نئجه ظلم ائدیب عدو یوخ بدنینده صاف یئری
قربانام اؤزوم دئدی بئله یارالی پیکره
یئری وار قان آغلیا یئرلر منه گویلر منه
دوشمیوب منیم کیمی هیچ کیم بئله یامان گونه
گل چتین لحظه دئدی بوندان بئله دی آی ننه
باخ شقی بو جلادین الینده قانلی خنجره
تا وارام قؤیمام دئدی بو پرچم غیرت یاتا
قوم کین غوغا ائدیب مرامینه فوری چاتا
ال آتیب شمشیرینی اُول قهرمان زینب دوتا
اؤلمویوب زینب هله دئدی فرصت دوشه شمره
بو غم عظماده سن داییم یانیب یاش الیسن
سنده یا زهرا دئییب آه و نوایه گلیسن
بیر طوفان قؤپدو ایا صاحب زمان سن بیلیسن
نه چکیب عمه ن زینب نه ظلم اولوب اؤ بی یاره
آدیوین عاشقی یوخ ، گول یوزیوین حیرانی یوخ
گوز آچاندان لوطفیوین سفره سینون مهمانی یوخ
دئییروخ صاحب زمان غصصه لرون قربانی یوخ
ایندی قان آغلور گوزون یارالی باشسیز پیکره
کئشمه کش دوشدو بتر ، قیامت ده اولماز اوجور
سالدی الدن زینبی هیچ درد و غم سالماز اوجور
قارداشین نعشی اوسته هیچ باجی باش یؤلماز اوجور
زینبین ایوای سسی ، افغانی قاخدی گؤیلره
دئدی کی قارداش حسین قسمت بوییمیش گوئی یا
دهریده گره ک چکم من بینوا چوخلی جفا
چوخ جسارت ائیله دی او شمر دون بی حیا
ائیله بیر ایشلر گؤروب دونیانی ووردو بیر بیره
بی مرووتدی آقا جددون حسینون قاتلی
باخمادی سوسوزلوقدان یانیبدیر آغزیندا دیلی
سوسوز آییردی باشین اولئیدی شل ایکاش الی
چوخ مصیبت لر چکیب باخ زینب ده اولان صبره
گورمه سین هیچ باجیلار دشمن الینده قارداشون
آتدیم آی قارداش دئدی دای بو یاشاییشین داشون
گؤردی شمرون الینده حسینون او کسیک باشون
ائتدی ناله ال آتیب زهرا عدنده معجره
قان اولار بو قلب لر هر محرم آیی آقا
جدیوین حتدن آشیب یاراسینون سایی آقا
بو غمده آغلار قالیب زینب عؤمور بؤیی آقا
کیم دوزر زینب دوزوب بو ستمه جور و جبره
بو آغیر مصیبتی آخی نئجه گتدیم دیله
یا صاحب زمان آقا قلبیم یانیب دؤندی کوله
نئیله سین (نالان) یازیخ اولسا جسارت عفو ائله
بو قلم قان آغلادی یئتنده سؤز چوخور یئره
کیمده وار جرأت زینب تک استقامت ائیله سین
باطلی گوزدن سالیب حقدن حمایت ائیله سین
تاپشیر عمن زینبه بیزه عنایت ائیله سین
او جواب وئرنموین لحظه انکیر و منکیره
- یکشنبه
- 15
- مرداد
- 1402
- ساعت
- 15:28
- نوشته شده توسط
- یوسف اکبری
ارسال دیدگاه