کوفیه یوللاندی قارداش کاروانیم ، دور گئداخ
جانیوه قربان حسین یورقون بو جانیم ، دور گئداخ
دور گور آی قارداش نئجه من باغزی القان گئدیرم
باغلانیب دیر قوللاریم گور نه پریشان گئدیرم
اؤلمه دیم بیلمم نیه اما یاریم جان گئدیرم
قویما یالقیز باجیوی ای دین ایمانیم ، دور گئداخ
قوی سنه نیسگیلیمی بیر بیر دئییم سای گئدیرم
کیم ایله گلمیشیدیم گؤر کیم ایله دای گئدیرم
آدی قاراشلی اولوب قارداشسیزا تای گئدیرم
گؤیلره چیخیب حسین آه و فغانیم ، دور گئداخ
چوخ مصیبت گتیریب باشیمیزا شمر و ثنان
بیلیرم یول اوزونو قان آغلادار بیزی هر آن
یوخدور هیچ کیمسم منیم قورخولی بو چولده اینان
بیر سنه گلیر حسین تکجه گومانیم ، دور گئداخ
قویمادی دشمن سنه دویونجا آغلیام گئدم
نعشیوین اوسته حسین سینمی داغلیام گئدم
لالقل گوزلریوی بیر لحظه باغلیام گئدم
اولمادی سن بیلیسن هیچ نه امکانیم دور گئداخ
نئیلیوم کی عشقیمی حدسیز ائدیب سنه خدا
سندن اؤتری جانیمی آزدیر نقدر ائتسم فدا
سنسن ای باشسیز بدن عز و وقاریم متلقا
هم دینیم ، هم مذهبیم ، همده قرآنیم ، دور گئداخ
باشیوین عشقی منی بو چوللره سالیب حسین
بیرده باشسیز پیکرون قراریمی آلیب حسین
اودور کی زینب باجون دل نگران قالیب حسین
یارالی یاتما بئله کسمه امانیم ، دور گئداخ
چؤخ آغیر سفردی بو ، گوررم یقین حدسیز بلا
اودور کی اندامیمه لرزه دوشوبدور بر ملا
قیلمادی وفا بیزه ازل گوندن بو کربلا
ای منه آرام جان ، روح و روانیم دور گئداخ
هاردادی اوزون قوللو ابالفضلیم چاغیر گلسین
زینبی شامه گئدیر دئه المین اله آلسین
دشمنه اسیر اولان باجیلارین یؤلا سالسین
قورتولوب قارداش حسین تاب و توانیم ، دور گئداخ
سن کیمین گؤرمه میشدیم اهل عیالون گوزدن آتان
زینبون تئز قؤجالدان اِی گوز یاشین قانه قاتان
یارالی ای قلبی قان بو گون ایستی سینده یاتان
کفن سیز توپراق اوسته جسمی عریانیم ، دور گئداخ
گلستان ائیلمیسن کرب و بلا دشتین حسین
حسرتدن اوزارینه چوخلار توکر اشگین حسین
شهدا سندن دادار شهادتین عشقین حسین
اذن وئر باشیوه من بیرده دولانیم ، دور گئداخ
حالیوه (نالان) اولوب یئر گؤی بوتون دوتوب ماتم
معناده جان جان دئییر یانیر پیامبر خاتم
هئی گلیر قولاقیمه شیون و ناله دم به دم
آغلوری اول مادر قدی کمانیم ، دور گئداخ
- یکشنبه
- 15
- مرداد
- 1402
- ساعت
- 15:34
- نوشته شده توسط
- یوسف اکبری
ارسال دیدگاه