کاش اؤلئیدی سن اؤلونجه علی بختی قاره نَنَن
گؤرمییئیدی گولدن لطیف بوغازیندا یاره نَنَن
رنگین بالا سارالیبدی ندن وئرموبله سنه سو
توزا بلشیب تئللرین نه وضع و نه حالیدور بو
مگر نه ایدی گناهین کیمدن ائدیم من پرس و جو
اولسون فدا علی بالا پژمرده رخساره نَنَن
منسیز نئجه دؤزدون علی بو فراقه تاب ائلدون
نییه مندن کوسدون بالا نیزه اوسته خواب ائلدون
ائله یاندیردین کی منی شمع تکین آب ائلدون
خوش گونلره حسرت قالیب بو اؤره گی یاره نَنَن
کور اولئیدی اؤ حرمله سنی نشان دوتان یئرده
شل اولئیدی اؤ اللری سنه اوخو آتان یئرده
ننون اؤلئیدی سو دئییب اؤز قانیوه باتان یئرده
نه ائتسون کی تاپانمادی دردیوه بیر چاره نَنَن
عؤمور بویی یانارام بو نیسگیل منه چوخدور بالا
نیزه ده دور باشون نییه بس بدنون یوخدور بالا
سنی بو حالته سالان یانسین نئجه اوخدور بالا
لعنت اوخور گونده مین یول بئله ظلمکاره نَنَن
یادیما دوشدوقجان علی بوش بئشیگین قوجاغلارام
اوغلی اؤلن ننه لرین سینه سینی هئی داغلارام
ایتیب بیر زادیم ائله بیل هئی آختاریب هئی آغلارام
گونده بلکه مین یول دوشر حالِ احتضاره نَنَن
اؤلر هر کیم وئرسه الدن سنین کیمین ماه پاره سین
شان شان اولموش جگرینون کیمسه گورنمز یاره سین
هر اوغلی اؤلن ننه نی گؤرسه سوزوشار چاره سین
دردینه درمان آختارار مثلِ بو بیماره نَنَن
سندن سورا بو سینمده هردن بیر اوتلو سوت گزه ر
ائله بیللم سن آغلیسان گوزلریم هر یانی گزه ر
سیزیلتیوون گلر یئری قلبیمه ائیلویر اثر
بیر گل نوایه ائشیدسین سسیوی دوباره نَنَن
بیر ده یئتسه الیم سنه دؤیونجا بیر قوجاخلارام
من کوفه لی لر دگیلم قوناقی یاخجی ساخلارام
گلسن بیرده بو سینمه علی یاراوی باغلارام
باغلامارام دای اللرین قربان بو دیداره نَنَن
علی حتی بیر گئجه ده سنسیز راحت یاتانمارام
سنه باخما بی وفاسن منکی سنی آتانمارام
حیف اولا دای مین آختارام سنون تایین تاپانمارام
نه دیل ایله ناله ائتسین بئله روزگاره نَنَن
اولمیوب اولماز نا امید هیچ کیمسه بو درگهیندن
باب الحوائیج آدیندان ، گوزل عالی منصبیندن
او قیامت عرصه سینده شفاعت ایسلرم سندن
(نالانی) ده دئه تاپشیرسین زهرای داغداره نَنَن
- دوشنبه
- 16
- مرداد
- 1402
- ساعت
- 22:21
- نوشته شده توسط
- یوسف اکبری
ارسال دیدگاه