او اوخ آتان که سنی قانیله خضاب ایلیوب
اوخون آتاندا ، منیم قلبیمی کباب ایلیوب
او اوخ یخوب ایویمی روزگاریمی چووروب
سَنی اگر چه فرات اوسته کامیاب ایلیوب
او اوخ نجه اوخوموش بولمورم ، دیولّه ولی
همان اوخون تایی سقّانی دلکباب ایلیوب
دوشر خیاله هاچان که او اوچ پر اوخ دئیرم
نه خاطره سَنه ده اوچ پر انتخاب ایلیوب
یتیشمیشم بویره فکریمی اولوب راحت
مقام عشقده بیر قهرمان حساب ایلیوب
گه آغلورام سنه گاهی باخوب فرحلنیرم
یوزونده نور خدا گور نه بازتاب ایلیوب
او قان دولان گوزیوه گوزلریم اولا قربان
دوباره قانلی باشون نی ده انقلاب ایلیوب
صبا آلور گوزل عطرون مشامیمه یتیرور
خمار و نشئه، منی عطر و بوی ناب ایلیوب
مشامیمه یتیشن عطریوه اوزوم قربان
او اوچ پر اوخ گولومی ایله بیر گلاب ایلیوب
اوجاتموسان باشیمی عرشه سن ایوین آباد
منی شهید آناسی هر گورن خطاب ایلیوب
ولی ئورکده منیم نچّه نیسکیلیم واردور
خدا بولور که نجٓه فکریمی خراب ایلیوب
بیری بودور کی سو اوستونده باغلادوم اَلیوی
آنان خیال ایلیردی اوغول ثواب ایلیوب
اودم سودوم یوخودی ناعلاج قالمیشدوم
دیمه آنام اَلیمی بسته طناب ایلیوب
گلوبدی سینمه سوت ایندی منّتون چَکیرم
سالوبدی جانیمه اود، قلبیمی کباب ایلیوب
وریدیلر او باشی سینم اوسته ساخلاردوم
هزار حیف اولا که خصم دون جواب ایلیوب
نّئیون یوخوندی عتیقا بو دار فانی ده
بو بس کی اصغر آدی دیده وی پرآب ایلیوب
- دوشنبه
- 16
- مرداد
- 1402
- ساعت
- 22:34
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه