نه دلنشینیدی لحن قرائتون یارالی
نه دلنوازیدی صوت تلاوتون یارالی
ندای‌حقدی‌نه‌جان‌بخشدورسسون‌قارداش
صفای قلبدی سبک عبارتون یارالی
بوحسن صوتیله داود آل یاسین سن
گتوردی روحیمی شوره فصاحتون یارالی
عجیبدور قویوب اصحاب کهفی حیرتده
سنون بو غصه لی غملی حکایتون یارالی
فضای عشقی بِکُلّی مسخر ایلموسن
قناد آچوبدی همای سعادتون یارالی
غلام اولور سنه عشق عالمینده یحیالر
بهشت جوانلارینا وار سیادتون یارالی
کلیمی جذب ائلین نورسن تجلاده
دوشوبدی کوفیه نور هدایتون یارالی
آتام آتالیق ائدن ملته اوخی قرآن
جدانون اوسته بولونسون جلالتون یارالی
آیردی خولی سنی بیزدن عصرعاشورا
دیال کوفیه دوشدی اقامتون یارالی
فلک منه باشوون سایه سینده چوخ گوردی
چوخ اولدی غملی باجوندان مسافتون یارالی
یاتان یرینده آنام اوغلی اولما کول واریمیش
پوزولموسان نه پریشاندی حالتون یارالی
باجوندا نصفی یانان خیمه ده صباح ائلیوب
یوروبدی روحینی صحن شهادتون یارالی
گلنده هئچ دئمدون کوفیه قوناق گیدورم
خصوصی اولدی نه علت ضیافتون یارالی
عجب‌یتیشدون‌حسین‌دادیمه‌داریخمیشدوم
همیشه زینبه واردور کرامتون یارالی
اسیروم منه باش چکمسیدین ئولموشدوم
مریض عشقی دیریلتدی عیادتون یارالی
شکسته دل باجوون قلبینی گتوردون اله
اوجاتدی باشیمی لطف وعنایتون یارالی
خیالیدن آتورام غصه می ئورکلنیرم
دوشنده باشیمه ظل حمایتون یارالی
باشوی وئرسه عدو کعبه تک طواف ائدرم
نصیبیم اولموری نیلوم زیارتون یارالی
سنی قوناق چاغور‌انلاردی باشوه داش آتور
گزوی آچماقا یوخدور فراغتون یارالی
شل اولمادی باشوی سنگسار ائدن اللر
باشوندا تازه لنوبدور جراحتون یارالی
همیشه خوار ائلیوبدور بیزی بوکوفه لیلر
صفاسی یوخدی سنه بو ولایتون یارالی
سنیله کوفه نون اهلی نیه عداوت ائدور
سنونکی یوخدی بیریله عداوتون یارالی
یاراوی خشک ائلمور بی وفا مسلمانلار
وفالی راهبه قالدی طبابتون یارالی
باشیمی محمله چالدوم یاریلدی درک ائده لر
باجوندی عاشق بی صبر و طاقتون یارالی
جسارت ایلمرم باغلا یاره می سن ئوزون
یارووی باغلیانا واردی حاجتون یارالی
ولی گلین قیزیوون دیندیر حالینی خبرآل
گیدوب خزانه گل با طراوتون یارالی
توجه ائتمیوسن اکبرون آناسینه
واروندی لیلیدن اولما خجالتون یارالی
رقیه دن نگران اولما نازینی چکورم
یاتوبدی سینه مون اوسته‌امانتون یارالی
▫️◽️◻️⬜️⬜️◻️◽️▫️
جواب حضرت اباعبدالله الحسین (ع)
مناسبیدی حسین نیزه ده ائده گفتار
یورولما قوی باشا یتسون ریاضتون یارالی
ئوزینی قیزلاریم ئولدوردی چاره قیل ئوزوه
یارووی باغلا،گیدر استقامتون یارالی
محاسنیم کیمی غمدن نه تز آغاردی باشون
نه تز خم اولدی فراقیمده قامتون یارالی
باشوی یاردون اولا آشنالره سرمشق
باشوندا چوخ گوزل اولدی علامتون یارالی
باشیم دالیجا گلوب باخما طعن اغیاره
داریخما صبرائله خوشدور نهایتون یارالی
خوش اولدی بزم جفایه یارالی گئتمگیمیز
عجب سفرده خوشیمیش رفاقتون یارالی
یامان گونون آز اولور عمری آغلاما زینب
حضور جدیمه قالسون شکایتون یارالی
همیشه قلبی سنقلار سنق کجاوه مینر
اگرچه واردی روان تخته عادتون یارالی
شکسته دل گرک اولسون شکسته منزلده
روان کجاوه سی اولماز اسارتون یارالی
غم ائتمه مشتری یوخدور بوشهریده سوزووه
سوزوی دئ اولا روشن اصالتون یارالی
باشووا کول توکن اشخاصه ایلمه نفرین
وورولماقا گرک اولسون رضایتون یارالی
گوزوی یوم باشیما داش وورانلارا باخما
مقام غصه ده اولسون شهامتون یارالی
مسیح عشق اولانی دارون اوسته داشلادیلار
رفاهی اولماز اسیر عدالتون یارالی
نه داش نه کول هله من خیزرانه مشتریم
سنونده واردی قاباقدا قیامتون یارالی
ئورکلی گئت باجی ابن زیاد مجلسینه
سخلما خلقه بولونسون شجاعتون یارالی
ائله دانیش ایشیدن سویلسون علی دانشور
ائله دانیش اولا واضح لیاقتون یارالی
ائله دانیش باجی فرض ایله ئولمیوب عباس
دوروب یانوندا او کان رشادتون یارالی
ائله دانیش اولا مغلوب والی کوفه
نه سوز دئسون دئ واروندی وکالتون یارالی
چاغورسا مجلسه جلاد ایلمه پروا
آماندی قویما آزالسون متانتون یارالی
سن آغلاسان بالاجا قیزلاریم ئوزون ایتورر
گلر نوایه پریشان جماعتون یارالی
سو وئرسه کوفه نون اهلی یو قانلی ساچلاروی
آنام بتوله چتیندور بوحالتون یارالی
- دوشنبه
- 16
- مرداد
- 1402
- ساعت
- 22:42
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه