دفن ایلدی بی کس آتاسین سیّد سجّاد
قبر اوسته بو نوعیله ایدوب ناله و فریاد
دنیاده بابا سن کیمی مظلون اُلن اولماز
بیر نعشه حصیر پاره لریندن کفن اولماز
بیر پادشهون سن کیمی پرگاری پوزولماز
بیر صاحب باغون بیله گلزاری پوزولماز
هیچ جان ویره نون نعشینون آثاری پوزولماز
آت دیرناقی آلتیندا داغولموش بدن اولماز
سن تک بابا کیم حقّه بو نوعی سپر اولدی
صحرالره اطفالی دوشوب در به در اولدی
هانسی یارالی نعش بیله جلوه گر اولدی
دنیاده سنون مثلیوی هرگز گورن اولماز
عشق آتشینه سن کیمی پروانه ده یانماز
هیچ کیم بو قدر درد و غمی سهل سانامّاز
هیچ کیمسه مرامینده بیله سخت دایانماز
سن تک لب دریاده سوسوز جان ویرن اولماز
هر یرده جفا موجه گَلوب صاحله داشماز
بو رخت بلا قامت هر شخصه یاراشماز
بیر باغ و چمنده بو گوزل لیقدا گُل آشماز
بیر یرده بو وصفیله پوزولموش چمن اولماز
ویر اذن ایلیوم بیر غمه بو یرده اشاره
اود ووردولا، اودلاندی خیم، دوتدی شراره
اوددان منی عمّم چیخادوب چکدی کناره
عمّم کیمی قارداش بالالارین سُوَن اولماز
صبر ایلدی عمّم اونا هر نه ستم اولدی
بازار محبّتده خریدار غم اولدی
زلفی آغاروب، قامت موزونی خم اولدی
عمّم کیمی دنیاده بلایه دوزن اولماز
بو چولده یتیملوخ توزی رخساره سپیلدی
سندن صورا اطفالیوون آرامی کسیلدی
هر آغلیانون گوز یاشین عمّم اوزی سیلدی
گوز یاشین آتاسیز بالالارین سیلن اولماز
هر یرده که بیر طفل یتیمی گورر آغلار
ایتامه سنون لطف لرون یاد ایدر آغلار
عمّم آتاسیزلار باشینا اَل چکر آغلار
بیچاره یتیملر باشینا اَل چکن اولماز
سیر ایلمیسن تک، سفرونده حضرونده
سیر ایلوری باشلار هاموسی دور سرونده
خوش ساخلاموسان لشکری تحت نظرونده
هیچ یرده بیله نظمیلی بیر انجمن اولماز
قمتاز اولونوب حق نجه، باطلده سِچیلدی
بو چولده عجب سو یرینه قانلار ایچیلدی
عبّاس عمومون قامتی بیر نوعی کیچیلدی
بیجا یره قامتلی بدن خورده تن اولماز
بلبل دوزر بُلمز گُلینی خار سویاندا
قولّاری بویاندا عمومون نعشی اویاندا
گَلدی کمک ایتدی آتاسی قبره قویاندا
چون گوردی اوزی گَلمسه دفن ایلین اولماز
- دوشنبه
- 16
- مرداد
- 1402
- ساعت
- 22:48
- نوشته شده توسط
- یوسف اکبری
- شاعر:
-
مرحوم سیّد حسین کهنمویی
ارسال دیدگاه