ایدوب منی گینه سودای عشق دیوانه
چکر خیال جنونیله عقلی هر یانه
مگر بو اهل روایت ذی علوم دگل؟
یقین که صاحب مدرکدی بی علوم دگل
اگر بولوبدی که ایرادی وار یازوب بو سوزی
بو یازماقین هدر اولماقلقین بیلوبدی اوزی
ایدوب اوزینده دگلمش بو نوعیله تحریر
قصوری وار بلی معفودور بیله تقصیر
دیسم که آنلامیوب گر یازوب بو نوع کتاب
اولور که سهو ایلیوب وقت کتبده کتاب
ننوعی سوزدی که هر سوز باشندا وار مین عیب
که سس چکر بیزه عیبین دییر لسان الغیب
نه سوزدی السن افواهده اولوب مشهور
نه سوزدی خاطر اشتباهده تاپوبدی ظهور
بولار نه سوزدی منه اولدی بیر مقام درنگ
که رنگ رنگ دی چون آسمان مینا رنگ
محل فکر و تاملدی جای بهت و سکوت
باشیمدان هوش کنار اولدی قالمیشام مبهوت
بو سوزلری ایده بولمم من اوزلیقمدا قبول
که فعل فعله باخان دمده گورسنور معقول
سالوبلا خلق آراسیندا بولار نه سوزدی دله
امامه لایق اولان نکته لر گرک دییله
بولار نه سوزدی کی معلوم اولور خبرلردن
چوخالدی درد و غمیم ، آز دیون بو سوزلردن
دل آچمیوم نجه من ، ایلیوم نه نوعی نگاه
که شمره عجز ایلیوب یالواراردی آل الله
دیمه بونی که اسیر اولدی اهل بیت خدا
خدا رضاسنه گور اولور خدایه روا؟
دیسن بونون بو سوزی کردگاره شرکتدور
سن ایله آنلا ولی نکته بی شراکت دور
اگر اسیردی سجاد کوفه دن نجه بس
قایتدی گلدی گنه کربلابه اول بیکس
آتانی دفن ایلدی یازدی قبری اوسته گواه
که بو حسیندی جگر گوشه رسول الله
ایاقی آتدا قویوب شاهزاده اکبرینی
که حکم شاه اونادور ایستینده لشگرینی
یغوب صحابه لرین دفن ایدوب جوارنده
که پاسبان یاتا لازمدی شه کنارنده
علی اصغری دفن ایتدی گوز قباقینده
که گلسون حشره علی اصغری قوجاقنده
حبیبی ایلدی دربان او سید نالان
محالدور اولا شه آستانی بی دربان
بیوردی اهل قبیله گلون که اودلاندیم
عموم خیالیمه دوشدی دوباره دن یاندیم
گلون گلون که عموم عباس بی کفن قالدی
گلون گلون که الیمدن قراریمی آلدی
گلون گلون که عموم بیر عزیز دوراندی
نه باشی وار نه قولی گون ایوینده عریاندی
یتوب فرات کنارینده گوردولر ناگاه
دوشوبدی بیر یارالی چکدیلر جگردن آه
بنی اسد کمک اولدی امام بیماره
درست قیلدیلا بیر قبریده علمداره
عمونی قبره قویوب بارماقیله کتب ایلدی
بو قبر صاحبی عباس دور علی ولدی
اسیر اولاندادا بو اقتدار و قدرت اولور؟
بو قدر تاب و توان بیله صبر و طاقت اولور؟
اسیر اولانلارا جسم ایچره بیرده جان اولماز
اسیر اولان داخی بو نوع حکمران اولماز
نجه اسیر رعیتدی ، واقعاً شهدور
اگر اسیریدی قدرتده قدرت اللهدور
بو نوعی کیم گوروب آخر اسیرده جراءت
اولا دقیقه سیرینده بیر بیله سرعت
گله آتا عمونی توپراقا سپرده ایده
بیر آن واحد ایچینده گینه قیده گیده
آدی اسیر ، مجرادی ایتسه هر فرمان
بیله اسیره جهان و جهانیان قربان
قولوندا ایپ او بوینوندا کی آغیر زنجیر
ایدوب قیامته تک اهل عالمینی اسیر
اسیر اولسادا وار اوزگه بند بوینوندا
قالوبدی اللری مین سری وار قوینوندا
دئمه اسیردی ، حبل المتینه بسته دی بو
سینیخدی قلبی ، اودور بیله دلشکسته دی بو
آتاسی عموسی ئولوبدی خانمانی ویراندی
اودور که بیله گوزی یاشلی زار و حیراندی
اسیردور ولی وار قولاریندا اوزگه طناب
سبب بو نوع قویوبدور مسبب الاسباب
که یانماسون اودا محشرده شیعه حیدر
او گونکه بیر کسه ممکن دگل بیر اوزگه مفر
طنابه باغلانا ممکندی عروه الوثقی
محال امریدی سجادی لانفصام لها
دگل اسیر یقینمدی ایلسونلر بند
اسیر اولاندا بو نوعی اولار رشادتمند؟
اسیر اولاندا یقین بیل بو اقتدار اولماز
اسیرده بیلورم بیله اختیار اولماز
کیمون جسارتی وار گوستره بیله حجت
بو قدر یول گله بیر گوز یوموب آچیم ساعت
مگر ایشتمه میسن کیم علی قیزی زینب
گیرنده کوفیه نه نوعی باشلادی مطلب
آتاسی حیدر کرار تک دل آچدی سوزه
نقاب سان آغاران ساچلارینی سالدی یوزه
بلالی باشینی ایتدی کنار محملدن
دل آچدی سالدی او ناکسلرین دلین دلدن
اوزی ویرن دلی ، اخذ ایتدی قالدیلار دلسیز
وجود نخل لری گورسنوردی حاصل سیز
آلندی حکم نفس ، دوشدی حسدن انفاس
گوروب بو عالمی گزلتدی سسلرین اجراس
گیدن دایاندی ، گچن دوردی ، یاندی حیرتدن
پوزولدی هر یتنون حالتی بو حالتدن
او دم که باشین اشاقه کجاوه دن اگدی
تمام کوفه و شام اهلی بیر بیره دگدی
بیوردی چوخ اوجا بیر خطبه فصیح و بلیغ
باباسی تک ایلدی خلقه ، حق سوزین تبلیغ
یانخلی دللریله حق سوزین ایدردی بیان
اولوردی گوز یاشی سیلاب تک یوزینه روان
ایدردی غملرینی خلقه بیر به بیر تقریر
او داش اورکلره ایتمزدی ناله سی تاثیر
ز بسکه عاقبت اودلاندی سینه زاری
چوخالدی اودلاری یاندیردی قلب کفاری
گلوب تموجه آرتدی گوزونده قان یاشی
او نوعی آغلادی ، آغلاتدی داغیله داشی
دیدوقجا یاندی دلی ، دوتدی خاطرین آتش
یانا یانا اوزینی آخر ایتدی آتش وش
نفس اود اولدی ، سوزی یاندیروردی آتش تک
بساط شهر پوزولدی بو عالمی گورجک
گوروردی اود ویرولوب نی لره ، چراغاندور
دیردی سنده نفس ، ایله شهری اودلاندور
اولان زماندا کنار هر نفسدن اودلی نفس
تمام کوفه ده قالمازدی یانمیان بیر کس
یوزینه سیل سرشکین او نوع باغلاردی
که سس ویروب سسینه ناقه لرده آغلاردی
دیردی بیزلر عیال رسول اطهاروخ
نه دیلموق، نه فرنگوخ نه روم و تاتاروخ
دیردی بیزلره نازلدی آیه تطهیر
بیزوخ او آییه داخل ، هامی صغیر و کبیر
بیزوخ که واردی رسول خدایه نسبت میز
بیزوخ که واجب اولوب اهل شرعه حرمتمیز
بیزوخ که نص کلام خدای لم یزلوخ
بیزوخ که علم خداونده معتبر مثلوخ
بیزوخ عبارت اسماء ، حکمت اللهوخ
همان او سر انا اللهدن بیز آگاهوخ
بیزوخ بو کونده ارزاق کایناته سبب
بیزوخ وجودوزه باعث ، بیزوخ حیاته سبب
رموز غیب هاموسی آشکار اولور بیزدن
تمام فیض ، جهانه کنار اولور بیزدن
بیزوخ او اجر رسالت که ایستوبدی رسول
ندن بیزی ایدیسوز بو قدری غمین و ملول
سوره شوری
مگر حساب ایلمورسوز بیزی او قربادن
کنار ایلمسوز اوز یانوزدا معنادن
بش ایل تمام بو شهر ایچره گورموشم عزت
روا دگل منیم حقیمده بو قدر ذلت
بو شهر یوخسا همان کوفه خراب دگل؟
بو بیر بولوک مگر اولاد بوتراب دگل؟
ایا جماعت کوفه منم همان زینب
که دائماً منه ساخلاردوز احترام و ادب
دیردوز اوندا که غم مشگله سالوردی سیزی
آچار بو مشگلی حلال مشکلات قیزی
گچنده کوچه لروزدن سپردوز عطر و گلاب
خوش آرزوئیدی دللرده ذکر کنت تراب
نولوبدی ایمدی منی بیرجه دیندیرن یوخدور؟
و حال آن که بولورسوز مصیبتیم چوخدور
(یومون گوزوزی بیزه باخمیون مسلمانلار
نه مشرک و نه مجوس و نه اهل زناروخ
یورولموشوخ بیزه بیر یر ویرون اولاق راحت
یول اهلیوخ ، گیدیروخ شامه بی پرستاروخ
قوجاقیمزده یاتوب خورداجا اوشاقللریمز
که یول گلوب گجه نی صبح اولونجا بیداروخ
ندن بیزی بو قدر آج سوسوز دولاندیرسوز
اگر چه بیر سوری آهو کیمی گرفتاروخ
گلون دیاخ هاموموز لا اله الا الله
که تا یقین ایده لر اهل دین اقراروخ)
مگر دگل بابامیز مصطفی امیر عرب
و یا که من دگلم فاطمه قیزی زینب؟
ندن بیزی بو قدر ظلم اودیله یاندیریسوز
حجاز اهلنی خوار ایلسوز دولاندیرسوز
نه ایتموشوخ سیزه بیز بیلمروق نه واردی مگر
بیزی دولاندیریسوز کوفه ده گذر به گذر
او قدر اصل و نسب قیلدی ظاهر ایتدی بیان
اوجالدی کوفه ده سسلر قیامت اولدی عیان
ز بسکه ایلدی اتمام حجته دقت
تانیمادیم داخی بیر کیمسیه دگل حجت
داخی ایدنمدیلر شان زینبی مستور
ظهوره گلدی او گون کوفه ایچره شور و نشور
خبر ویریلدی عمر سعده کی زنازاده
علی قیزی گتوروب گور نه کوفه نی داده
نه نوعی گور آییدوب خلقی ایلدی آگاه
چخوبدی منبرمنبره گویا علی ولی الله
دئدی اماندی علاج ایلیون بو محنتمه
که آز قالوب یته رخنه منیم ریاستیمه
یتوب او حالده خولی گوروب بو غوغانی
دوباره درده گتوردی آناسی زهرانی
دئدی او زینبون ایمدی قرارینی آلام
نه تک قرارین آلوب بلکه نطقدن سالام
بیر اوجا نیزه اله آلدی ، یتدی منظوری
دوباره قیلدی زبان بند او زار و رنجوری
ووروب جدایه حسین باشینی ، گوتوردی قدم
بلالی زینب ایچون تازه لندی محنت و غم
ایشتدی باجی گنه قارداشی اوخور قرآن
دئدی سسون گلور هاردان ؟ باجون سنه قربان
باخاندا نیزیه نه گوردی گورمسون گوزلر
که اگلنوبدی جمال الله اوسته خاکستر
یوزی گوزی باشی خولی ایوینده خوش بزه نو
اولوب تنور یری ، توپراقه کوله بلنوب
گورنده باجیسی بو حالتیله قارداشینی
حسین حسین دئدی ، ووردی کجاویه باشینی
یاریلدی باشی آخوب قانی گوزلری دولدی
محبت اهلی بولر حالی باجینون نولدی
آلشدی جسمی گوگل گلدی تازه دن درده
دل آچدی حال دلین عرض قیلدی بی پرده
سرشک دیده سی فاش ایتدی صورت حالین
بیلندیروب ایکی صورتله باطن احوالین
تمام راز دلی اولدی صورتا اظهار
گوگلده آلدی هامی سری محرم اسرار
گنه قضای خداوندی سالدیلا یاده
دایاندیلار باجی قارداش مقام معناده
او نیزه اوسته بو محملده اولدیلار تسلیم
بو سری بولمدی غیر از خدای حی و قدیم
قلم اود آلدی داخی (صافی) ایلمه تحریر
اود آلا صفحه اولور بیله آتش ، عالمگیر.
- دوشنبه
- 16
- مرداد
- 1402
- ساعت
- 22:53
- نوشته شده توسط
- یوسف اکبری
ارسال دیدگاه