حقّ اوسته باتان قانه دوزن جبره حسین وای
امر ایلین اوز عترتینی صبره حسین وای
تابوتی جدالر باشی جسمی قالا عریان
ایوای کفن سیز قویولان قبره حسین وای
بو فضل اللهیدی ئولنلرده شهیده
ایتمزله کفن شرعِ پیمبرده شهیده
قان غسلی، کفن رختیدی هر یرده شهیده
رحم ایلر اگر عور اولا، کافرده شهیده
ایوای کفن سیز قویولان قبره حسین وای
تکفینِ شهیده بودی قانونِ شریعت
اگنینده اولان رختینه ایللّه قناعت
بو شرطیله اگنینده قالا، اولمیا غارت
سویموشدی حسینون بدنین اهلِ شقاوت
ایوای کفن سیز قویولان قبره حسین وای
ایجاد ایدندن بو جهانی حقِ یکتا
عریان قویولا قبره بیری یوخ گورن اصلا
امّا قویولوب قبره کفنسیز شهِ بطحا
واردور یری جنّتده دیسون حضرتِ زهرا
ایوای کفن سیز قویولان قبره حسین وای
ای بادِ صبا ایله خبر شیرِ خدایه
گلسون کفن ایتسون بالاسی میرِ هدایه
گُل جسمینی اعدا داغیدوب دشتِ بلایه
شأنینجه کفن لازمه دور شاه و گدایه
ایوای کفن سیز قویولان قبره حسین وای
گَل هارداسان ای عصمتِ حق، امّ ابیها
تکفینه گتور سُندُس و استبرق و دیبا
عریان قالا قویما داغیلان گُل کیمی اعضا
سجّاد آتاسین قبره قویور یوخ کفن اصلا
ایوای کفن سیز قویولان قبره حسین وای
ای مُنتقمِ منتظَر ای سَرورِ دوران
گورموبدی داخی گورمییجاخ عالَمِ امکان
بی غسل و کفن دفن اولا بیر پیکرِ عریان
دفن ایتدی کفنسیز آتاسین عابدِ نالان
ایوای کفن سیز قویولان قبره حسین وای
بیله بویوروب صادقِ اولادِ پیمبر
قبریندن او گونکه دوراجاق خلق سراسر
محشور اولاجاق اوز کفنیله بو ئولنلر
عریان گلجاق محشره آیا شهِ محشر
ایوای کفن سیز قویولان قبره حسین وای
کیم قبره قویار تابعِ قرآنی کفن سیز؟
کیم دفن ایلییب بیر تنِ عریانی کفن سیز
دفن ایتمیوب ایتمزله مسلمانی کفن سیز
دفن ایتدیلر امّا شهِ عطشانی کفن سیز
ایوای کفن سیز قویولان قبره حسین وای
دعواده اگر ئولسه بیری خوار اولی یاسی
ایلله کفن رختین اونا اوز رفقاسی
تحقیریله انجام تاپار دفنی، عزاسی
امّا گینه اگنینده اولار قاره لباسی
ایوای کفنسیز قویولان قبره حسین وای
چوخ بولبولی گلچین آییروبدور چمنیندن
چوخ باشلاری دشمن سالیب آیری بدنیندن
چوخ میّته ایلوبله کفن پیرهنیندن
امّا دیلیم عاجزدی حسینون کفنیندن
ایوای کفن سیز قویولان قبره حسین وای
یابن الحسن عالَمده بیله بیر محن اولماز
بیر سن بولوسن سرّینی اوزگه بولن اولماز
جدّون کیمی دنیا بویی مظلوم ئولن اولماز
ایوای کفن سیز قویولان قبره حسین وای
سجّاد گوروب گول کیمی خنداندی آتاسی
نه باشی بدنده، نه الی وار نه لباسی
صدچاک ایدوب جسمینی اوخ نیزه یاراسی
بیر سس گلوری اوخشوری زهرایه صداسی
ایوای کفن سیز قویولان قبره حسین وای
عرض ایتدیله تدفینه گلن خسته علیله
قیل چاره کفن یوخدی بو محبوبِ جلیله
فرمایش ایدوب بسدی حصیر آلِ خلیله
سس چکدیله آغلاشدیلار افرادِ قبیله
ایوای کفن سیز قویولان قبره حسین وای
بیر شاه که شاهنشهیدی شاه و امیره
بیر شاه که باش اگمزیدی تاج و سریره
بیر شاه که طنّازیدی دیبا و حریره
ییغدی اونون اعضاسینی اوز اوغلی حصیره
ایوای کفن سیز قویولان قبره حسین وای
اذن ایستدی افرادِ قبیله ایده شرکت
سجّاد دئدی وار کومگیم یوخ سیزه حاجت
هم جدّی گلوب هم آتاسی شاهِ ولایت
سسلور آناسی فاطمه خاتونِ قیامت
ایوای کفن سیز قویولان قبره حسین وای
مظلوم آتانین قیلدی او مظلوم نمازین
تاپشوردی مزاره بدنین شاهِ حجازین
چون ژاله یوزه توکدی دُرِ نرگسِ نازین
بو کلمه دیلینده اگیلوب اوپدی بوغازین
ایوای کفن سیز قویولان قبره حسین وای
چوخ غنچه نی سولدوردی خزان غنچه چاقیندا
چوخ بولبولی لال ایتدی فلک گول بوداقیندا
هانسی آتانین دل یاراسی گوز قاباقیندا
قبره قویولوب سود امری اوز قوجاقیندا
ایوای کفن سیز قویولان قبره حسین وای
هر کیمسه (حسینی) بو حسینه ایده خدمت
مأجور ایده جاقدور آناسی روزِ قیامت
عهد ایله اگر اولسا مزاری سنه قسمت
سن بو سوزی دئ سس سسه ویرسونله جماعت
ایوای کفن سیز قویولان قبره حسین وای
- دوشنبه
- 16
- مرداد
- 1402
- ساعت
- 22:57
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه