کوفه ده الهام اولوندی ساجدِ آلِ عبایه
دفن ایدولّه شاهِ دینی سنده گَل گیت کربلایه
گون قباقینده قالوبدور پاره پاره گول بدنلر
چولقیوب کرب و بلا دشتین شمیمِ مشک و عنبر
گیت حسینی قوی مزاره، بیله دور امرِ مقرّر
گر چه دفن ایتماق آتانی امرِ مشکلدور بالایه
تاپشور عمّن زینبِ مظلومیه آلِ عبانی
آچ دو شاخه گردنوندن سال یره زنجیرِ پانی
دولدوروب فوجِ ملایک دسته دسته کربلانی
خسروِ دین دفنیدور بو نشر اولوبدور ماسوایه
رمزیله تا بو کنایه اول شهِ والایه گلدی
جوش ایدوب درد و ملالی اشکِ غم سیمایه گلدی
تاپشوروب غم کاروانین زینبِ کبرایه، گلدی
طرفةُ العِین ایچره گلدی وادی محنت فزایه
وارد اولدی کربلایه گوردی فخرُالسّاجدین
کربلا نه کربلا، عنوانِ فریاد و انین
یار و انصارین یغوب اطرافینه سلطانِ دین
انبیانی دعوت ایلوب شاهد اولسونلار وفایه
عاشق اوز معشوقینه یتدی تاپوبدور مدّعاسین
گوردی مکبوبا" سالوبلار بیر چوخور یرده باباسین
سایماق اولمور پیکرینده نیزه و خنجر یاراسین
جلدسیز قرآن کیمی اوراق اولوبدور آیه آیه
قصد ایدوبدور محضریندن ایلیه تحصیلِ کام
خاک و خون آلتدا گوروب مستوریدی نعشِ امام
گوز یاشین توکدی یوزه سسلندی بابا السّلام
ای قالان نعشی قوم اوسته ای گیچن باشی جدایه
خسروِ مُلکِ هدایت، واضح اولدی مسئله
حق و باطل کیمدی ایستردون اونی عالم بوله
منده ویرّم شام ایچینده زینبیله ال اله
حقّون اثبات ایلروخ عالمده هر شاه و گدایه
ای شهیدِ راهِ حق سن ایلدون اخذِ مرام
راضیم منده، بو یولدا هر بلا گلسه وارام
سرپرستم اهلِ بیته قیزلارین تک قویمارام
عمّمه تاپشوردوم ایندی گلمیشم ختمِ عزایه
شکرلله اولدی بو گلماخ عجب قسمت منه
ناخوشام خاکِ شفادور قانلی بو تربت منه
گلمیشم دفن ایلیم تا اولماسون حسرت منه
قالماسون نعشون یر اوسته گلمَسون زهرا نوایه
ظاهراً دفنِ امامه گر چه اول سَرور گلوبدور
عالَمِ معناده گوردی جدّی پیغمبر گلوبدور
فاطمه سارا خدیجه مریم و هاجر گلوبدور
گه ویرولّر تسلیت زهرایه، گاهی مصطفایه
سویلدی اهلِ قبیله، آگهم مقصودیزه
گلمیشم منده سیزی ارشاد ایدم منطوریزه
سیز معین اولساز اگر بیر بیر نشان ویرّم سیزه
کوفه دن گلدیم دیارِ محنته بو مدّعایه
من سیزون بو نصرتوزدن بی نهایت دلخوشام
یورقونام یول گلمیشم زنجیریدن قورتولموشام
محنتیم چوخدور عزادارم مریضم ناخوشام
شاه ئولندن بیز اسیروخ کوفه ده اهلِ جفایه
سیز اولون دفنه مهیّا من ویروم بیر بیر نشان
من نشان ویردوقجا سیزده ایلیون حفرِ مکان
بو ئولنلر کیمدی اسم و شهرتین قیلّام بیان
اوزلرین تسلیم ایدوبلر دین یولوندا هر قضایه
بو حسین ابن علیدور جان ویروب توپراقلار اوسته
اوغلیَم من بو غریبون اولموشام چوخ زار و خسته
کوفیانه دستگیرم ناقه اوسته دست بسته
کیمسه یوخدور تسلیت ویرسون بو درده مبتلایه
بو جوان که حُسنده چوخ بنزیری پیغمبره
فرقتی لیلانی مجنون تک سالوبدور چوللره
قارداشیم اکبردی یخمیش سرو تک اعدا یره
حق نما آیینه دور بو جدّی ختمُ الاَنبیایه
سود امر طفلی گورورسوز گون قباقینده سولوبدور
غنچه گُلدور آچمامیشدی تیریله خندان اولوبدور
تاپمیوبدور اوزگه ساتر باجسی زلفین یولوبدور
تارِ زلفیله بو طفلون نعشی اوسته سالدی سایه
قارداشیم اصغردی بو توپراق اولوب گهواره سی
چوخ سیزیلدوردی سوسوزدان گوردولر یوخ چاره سی
ویردیلر سو تیریله دلدن سالوب اوخ یاره سی
حشر اولونجا آغلاماق عنوانیدور اهلِ عزایه
اولدولار اهلِ قبیله اولشهه یار و معین
بیر به بیر ویردی نشان هر بیر شهیدین پیکرین
یغدیلار شه باشینه مخصوص اولان سرلشکرین
ایتدیلر دربان حبیبی خامسِ آلِ عبایه
ایستدی امّا قویا قبره اوزین اول سرورین
نعشین اطرافین دولاندی تاپدی بارماقین الین
بیر یره جمع ایتدی اعضاسین او باشسیز پیکرین
حسرتیله چولقادی زهرا عزیزین بوریایه
بوردا بعضی روضه خوانون بیر گوزل تقریری وار
بولمورم من هانسی مقتلده بونون تحریری وار
وار گمانیم سوز دوز اولسون قلبه چوخ تأثیری وار
بیر اورک اولماز یقینا" یانماسون بو ماجرایه
ذکر ایدوللر ایستدی قبره قویا اول سَروری
گوردی بیر سس گلدی تک قویما اوغول بو پیکری
گیت گتور قوی سینم اوسته شیرخواره اصغری
قبرین اوستونده قولاق ویر بیر صدای لایلایه
بیرمزار ایتدی معیّن اوچ وجودِ انوره
اولدی شه آغوشی مدفن شیرخواره اصغره
ویردی یر پایینِ پاده شاهزاده اکبره
اوردا ایللّر توسّل بارگاهِ کبریایه
قبرین اوستون خاک ریز ایتدی دوروب اول مقتدا
بارماقیله یازدی هذا قبر ابنُ المرتضی
گوردولر ایله پوزولدی سسلدی ایوای بابا
عمروم هر قدر اولسا گلّم بو مصیبتده نوایه
سویلدی اهل قبیله، وار قالان آیا گینه
قویمیاخ قالسون یر اوسته تاپشوراخ اوز قبرینه
یوز قویوبلار حسرتیله نهرِ علقم سمتینه
امر ایدوب بیر خیردا مدفن قازدیلار صاحب لوایه
خیردا قبر اولماز اوجا قامتلی صاحب منصبه
حجّت الله اذن ویر علّت دیوم بو مطلبه
بند بند ایتمیشدی اعدا جسمینی وای زینبه
اولدی چوخ مشکل بو محنت یادگارِ مرتضایه
دفن قورتاردی زیارت بابینی ایتدی ادا
ایتمیوب بیله زیارت هیچ آتانی بیر بالا
آرزو میز وار اورکده اولسا قسمت کربلا
بو طریقیله اولاخ زائر شهیدے کربلایه
السّلام ای نعشینی عریان قویان اهلِ جفا
السّلام ای جسمینی قبره قویان اهلِ قُری'
السّلام ای باشینه منزل اولان نوکِ جدا
ای گیدن مهمان یارالی باشیله مطبخ سرایه
ای «رجایی» وار گناهون گر چه بی حدّ و حساب
ناامید اولما گورورسن خالقون توفیقی وار
گیتمیوب فرصت الوندن ایندیکه وار اختیار
جدّیوه ایله توسّل، توبه قیل، یالوار خدایه
- دوشنبه
- 16
- مرداد
- 1402
- ساعت
- 22:58
- نوشته شده توسط
- یوسف اکبری
ارسال دیدگاه