ختم اولدی امرقتل شهنشاهِ تاجدار
سعد اوغلی ویردی لشکر ایچینده چکیلدی جار
واردور نقدری لشکرِ اشراریدن ئولن
جمع ایلیون بو چولده اولا داخلِ مزار
قالسون حسینون هم اوزی، یار و یاوری
توپراقلار اوسته صفحه ی میداندا خوار و زار
بو حکمیله داغیلدی او صحرایه قومِ کین
بیر بیر تاپوب گتوردوله هر نه جنازه وار
گودال قازدیلار هاموسین خاکریز ایدوب
دفن ایتدی اوز ئولنلرینی قومِ نابکار
امّا تاپولمادی بیری یاصاحب الزّمان
جدّون حسین جنازه سینی ایلسون کنار
آیریلدی نچّه سنگدل اشرارِ شامیدن
چوخ سرعتیله آتلارینا اولدولار سوار
گولدن لطیف جسملر اوستونده غیظیله
آت گزدیروبله فرقه ی بی شرمِ روزگار
نه حاله دوشدولر او مقدّس جنازه لر
زهرادن ایلرم بو مصیبتده اعتذار
ممزوج اولوبدی بیر بیره لحم و عظاملر
اعضالر اولدی سمّ سمندیله خاکسار
اوچ گون و یا که بعضی روایتده یدّی گون
گونلر ایوینده قالدی او اجسامِ زخمدار
باتمیشدی قانه بسکه خط و زلفِ مشگبو
اولموشدی کربلا چولی بیر خطّه ی تتار
بادِ صبا دگنده او گول تک بدنلره
مملوّ اولوردی عطریله میدانِ کارزار
قوشلار هوا یوزونده چاتوب باش باشا تمام
ویرمیشدیلر قنادلارین سایه بان قرار
خوف و هراسِ لشگرِ بی ننگ و نامدن
قتلادن ایلنمزدی بیر نفر گذار
آگاه اولوب او حاله زنانِ بنی اسد
اسبابِ دفن حاضر ایدوب خُرد و هم کبار
صاحبلرین مخاطب ایدوبلر مذّمته
دل آچدیلار او نچه وفادارِ دین شعار
قالسون نه وقته تک قوری یرلرده بیکفن
ابدانِ نازنینِ شهیدانِ کوی یار
سیزلر حیا اگر چه پیمبردن ایتمیسوز
وار بیزده لیک فاطمه دن شرم و ننگ و عار
بیرده سیزیله ایلمروخ بیز معاشرت
اولدی حرام الفتیمیز لیل و هم نهار
ایتدی اثر بو سرزنش اهلِ قبیلیه
جوش ایتدی بحرِ غیرتِ مردانِ هوشیار
دفن ایتماقا او دوغرانان عریان بدنلری
یوز قتلگاهه قویدولا محزون و دلفکار
امّا یتوب نگوردیله بی نفخ صور اولوب
هنگامه ی قیامت او صحراده آشکار
باشسیز جنازه لر توکولوب قوملار اوستونه
یکسر اولوبلا گول کیمی پامالِ نوکِ خار
بعضیلری نه باش بدنده، نه اللری
نه جسملرده جامه نه آثارِ استتار
حیران قالوبلا کیمسه تشخیص ایدنمدی
هانسی سپهدی هانسی سپهدار و شهریار
بیر نور ظاهر اولدی او دم سمتِ کوفه دن
سرعتله گوردیلر گلوری بیر نقابدار
گلدی یتیشدی اهلِ قبیله کنارینه
آچدی او شاه نطقِ گهربار و درّ نثار
فرمایش ایتدی شکّده سیز قالمسوز اگر
من لیک تک به تک تانورام کیمدیلر بولار
بیر قطعه قطعه دوغرانان اعضا گتوردولر
باخدی امام او نعشه چکوب آهِ شعله بار
سسلندی بو جواندی حسینون بلین بوکن
جدّیم شبیهی اکبرِ ناکام و گلعذار
مجنون ایدوب غریب آناسین چوللره سالان
حشره کیمی قویان دلِ لیلانی داغدار
دوتموش علاقه رأیی حسینون بو مطلبه
پایین پای شهده ایده کسبِ افتخار
یرده دولاندیلار او چولی بیر بدن تاپوب
اولدوز کیمی یارالاری بیحدّ و بی شمار
فریاده گلدی توکدی یوزه قانلی گوز یاشین
سلب اولدی صبرِ حجّتِ خلّاقِ کردگار
سویلوب که بو امامِ حسن یادگاریدور
آتلار ایاقی آلتدا اولوب جسمی تار و مار
دامادِ کربلادی اله قان حنا یاخوب
قانیله ایلیوب بو بیابانی لاله زار
دفن ایتدی پاره پاره اولان نعشِ قاسمی
گودالِ قتلگاهه گلوب دیده اشکبار
بیر تلّ گوردی خنجر و زوبین و تیریدن
بو هولناک منظر آلوب الدن اختیار
داش نیزه اوخ قیلیجلاریلان اهلِ کین چکوب
بیر پاره پاره پیکرین اطرافینه حصار
بوینون قویوبدی چیگنینه قویننوندا اللری
عرض ایتدی السّلام ای بابِ تاجدار
ای غملری بتول اورگین قانه دوندرن
ای ایلین پیمبری جنّتده سوگوار
گلدبم یارالی پیکریوی دفن ایدم بابا
حیران قویوب ولی منی بو جسمِ پاره پار
قرآن کیمی یر اوسته داغیلمیش ورق ورق
سر سوره ی اطاعت و سرمشقِ اعتبار
خنجر، قلج سینیخلارین اوخ نیزه یاره سین
چکدی ایدوب او گول بدنی زینتِ کنار
اهلِ قبیلیه دیدی سیز آختارون تاپون
قالدی عَموم جنازه سی توپراقلار اوسته خار
مختصّ دور منه بو غریبون جنازه سی
لازمدی بیر کفن بونا بر وجهِ اختصار
تاپدی بنی اسد گتوروب کهنه بیر حصیر
سجّاد گوزلرینده ایشیق گوندوز اولدی تار
یغدی همان حصیره حسینون جنازه سین
جنّتده ساچلارین آناسی یولسا حقّی وار
قویدی یارالی سینه سینه اصغرین دئدی
یاتسون گرک آتا قوجاقیندا بو شیر خوار
پایینِ پاده اکبری دفن ایلدی تاپا
ششگوشه قبر گون کیمی عالمده اعتبار
دفنیندن اولدی فارغ آتا قبری اوستونه
یازدی بو قبر صاحبی شاهِ فلک تبار
آدی حسیندی، آتاسی علی، جدّی مصطفی'
امّا سویوز کسوبله باشین فرقه ی شرار
عرض ایتدیلر بنی اسد ای شاهِ غم حشم
بو مشکل امر، ایتدی بیزی مین غمه دچار
قولسوز کنارِ نهریده بیر پهلوان دوشوب
بو دشتِ غم فزانی ایدوب قانی آبیار
اوخدان آچوبدی پر بدنی شاهباز تک
نخلِ وجودینی بزیوب تیرِ جانشکار
قطعه به قطعه آیریلوری بندبندیدن
هر عضوینه ووراندا ال ای معدنِ وقار
یردن گوتورماق اولموری ممکن او پیکری
قالسا اگر او حالیله مشکلدی ناگوار
دیلدن ایله پوزولدی او دم فخرِ ساجدین
توکدی عذاره اشگینی چون دُرّ شاهوار
گَلدی او دوغرانان بدنه سالدی بیر نظر
آز قالدی مرغِ روحی قفسدن ایده فرار
بیر آه چکدی سویلدی بو بند بند اولان
سقّای اهلِ بیتیدی، عبّاسِ نامدار
بیر مشک سو یولوندا الیندن ال چکوب
قویدی سکینه گوزلرینی یولدا انتظار
ایتدی بونون فراقی حسینین بلین شکست
قالدی الی بلینده او بی یار و غمگسار
بیر جانفشانلوق ایلدی پیغمبر اوغلونا
بیر اسم و رسم قویدی بو عالمده یادگار
ظاهرده باتدی بیدقی، اولدی قلم قولی
باطنده ایتدی بیدقِ اسلامی پایدار
قبری دوشن یرینده قازیلدی، اولوندی دفن
رشکِ بهشت اولدی او جسمیله شوره زار
«صحاف» ایدر او روضه ی غمناکین آرزو
وجهی بودور همیشه چکر ناله چون هَزار
بو آرزوده قورخورام آخر اجل گَله
اولسون نه وقته دین بو یانان دلده اصطبار
گلّم فغانه شام و سحر یانّام آغلارام
بلّم سیلر بو اشکِ بصر قلبیدن غبار
- دوشنبه
- 16
- مرداد
- 1402
- ساعت
- 23:3
- نوشته شده توسط
- یوسف اکبری
- شاعر:
-
مرحوم صحاف تبریزی
ارسال دیدگاه