آناجان مشرّف ایدوب عجب ، بو گجه بو منزله گلمیسن
نیه قویموسان بئلوه الون؟ ندور علّتی بیله گلموسن؟
سنه زحمت اولدی بو گلماقون ، منی ایلدون ولی سرفراز
سنی گوردوم آتدی خجالتیم ، ایلینمدیم سنی پیشواز
گوگل آلچاق ایلماقون سنون ، منه ویردی عالی بیر امتیاز
اوزیوی شکسته دوتوب اودور ، بیله پَست ، محفله گلموسن
بولوسن واریمدی جراحتیم ، یارالار سیزیلدیری ناخوشام
سنی گورماقیله گیدوب غمیم ، آنا قلبیدن مین ایله خوشام
سنه من نه خدمت ایدیم نئدیم ، تالیوبدی دشمن ، الی بوشام
بو قدر اوزاق یولی اوغلووی ، یقین ایتماقا صله گلموسن
دئ گوروم نه حالیده دور باجیم؟ نجه دور بو چرخیله سازیشی؟
او یتیمه قیزلاریم هاردادور؟ نجه دور اولارا نوازیشی؟
سویولوندا خوردا اوشاقلاریم هارا یتدی زینبیمون ایشی؟
دئ گوروم علیلیمی گورموسن آنا بندِ سلسله گلموسن
نیه یوز گوزون بلشوب قانا؟ دئ گوروم آنا نه گلوب سنه؟
رهِ قتلگاهه دوشوب یولون ، اودی گلمیسن بیله شیونه
الیمی کسنده او بیحیا ، نقدر جفا ایلدی منه
ائیلین زمانیده ساربان ، منیله مُجادله گلمیسن
آغاران ساچوندا او قان ندور؟ نیه ساچلارون بویانوب قانا؟
ندور علّتی بیله آغلوسان ؟ منه دردیوی قیل عیان آنا
هانی زینبیم گلوب اوخشیا ، سنه آغلیا منه ده یانا
آنا آغلاماقه بویور گوروم ، منه هانسی نسگله گلمیسن
اوزوم آگهم بیله یاتماقیم ، دگولی طریقِ رهِ ادب
ولی سن اوزون بولوسن منیم ، بیله یاتماقیمدا ندور سبب
یورولوب چوخ اینجموشم بو گون ، کسیلوب باشیم آنا تشنه لب
بولوسن واریمدی شکایتیم ، سنه ایتماقا گله گلمیسن
بو کول اوسته یاتماقا دلخوشام ، آناجان اوز حالیمه یانمورام
ایکی گوزلریمه دولوبدی کول ، یوخ الیم سیلم ، گوز آچانمورام
بیله بولمه ایسّی کول اوسته من ، سنه ناز ایدوب بیر اویانمورام
دیمه دیندیرور سنی فاطمه ، نیه بس حسین دله گلمیسن
نه عجب حسینوی نصفِ شب ، بیله وقته یادیوه سالموسان
باشوا دوروم دولانوم سنون ، باشیمی کناریوه آلموسان
دئ گوروم نیه بوکولوب بیلون ؟ نیه بس بو گونلره قالموسان؟
بیر الون قابورقاوا قویموسان ، بیر الون آنا بیله ، گلمیسن
هامونون جهانیده (عاصیا) بیله آستانه ده وار گوزی
خوش اولار او کیمسه نون حالینه اونی انتخاب ایده شه اوزی
سنه لطف و مرحمت ایلیوب ، شه اوزی یازاندا همین سوزی
آناجان مُشرّف ایدوب عجب بو گجه بو منزله گلمیسن
جواب
باشون سراغینی آلموشام من اوغول بو منزله گلموشم
سنون اُلماقون بئلیمی بوکوب اودور علّتی بئله گلموشم
بولوسن نقدری بو چوللری باشوون دالنجه دولانموشام
یارالی جنازه وی گورموشم اودی قلبدن بئله یانموشام
بو همان او قاندی که ساربان الوی کسنده بویانموشام
داخی قتلگهده دورانمادیم باش آچوق بو محفله گلموشم
نقدر جهان وار اوغول گرک سنه من گئجه گونوز آغلیام
باشیمی آچام ساچمی یولام ، بو یانقلی قلبیمی داغلیام
سن اُلنده گوزلریوی حسین منه ممکن اولمادی باغلیام
اوغول ایستماقلقا معذرت من همان او نسگله گلموشم
او یانان خیامده زینبون سنه بیر بساط عزا قوروب
ولی نه چراغ و نه فرشی وار اوزی شمع آهینی یاندوروب
بالالار سیزیلدیسی بو گئجه بو یانقلی قلبیمه اود ووروب
یانوری وجودیم الولاشور اودی نی کیمی دلهل گلموشم
بولورم کسنده باشوی شمر سنی خنجر آتدا چوخ اینجیدوب
او جفا سالوب سنی نطقدن او قدر وروب یارا قان گئدوب
ائیلیوب همان یری بحرِ خون ، بدنون اوغول قانا غرق ائدوب
یارالی وجودون او بحردن چکوب ایندی ساحله گلموشم
گوروب ایندی فاطمه جدّینی گوزی یاشلی باشی آچوق گلور
الینی قویوب بئلینه علی گلوری گهی ، گهی دنجلور
حسنیم حسین دیور آغلوری یوزه گوزیاشین سو کیمی الور
ائده جاق دئدیم گنه پنج تن اولی که مباحله گلموشم
بولورم ئولوب علی اکبرون ، ستمیله قلبی شکسته سن
ستمِ عدودن اوسانموسان غم و درد و رنجیله خسته سن
دور اماندی سینمه گل اوغول بئله یاتما ایسّی کول اوسته سن
من اوزومده خسته وجودیله بولوسن بو منزله گلموشم
بولوسن یاناندا قاپوم اوغول نقدر جفایه دایانموشام
یتشوبدی صدمه وجودیمه شررِ مصیبته یانموشام
هم اوغول قابرقالاریم سینوب ، همی سینه دن یارالانموشام
اودور علّتی که اوغول حسین الیمی قویوب بئله گلموشم
نولور قانلی گوزلرون آچ گیلن ائیله بر مشاهده حالیمی
دانیش آل اورکده کی دردیمی گور اوغول بو صورتِ آلیمی
یوخ الون دییم که منیمده سن سیل اوزومدن اشگِ ملالیمی
نه دیوم بو مطبخ خولیه من اوغول نه حالیله گلموشم
دیوری حسین نه ایتم دیوم سنه نوکرم بئله دم وروم
هله (عاصیم) بئله بابده نه جسارتیله قدم وروم
دگی صرف نحوده مسئله او بیانه من نه قلم وروم
یتوروب کتاب مطوّلی باشا من رسائله گلموشم.
- دوشنبه
- 16
- مرداد
- 1402
- ساعت
- 23:15
- نوشته شده توسط
- یوسف اکبری
- شاعر:
-
مرحوم حسن عاصی تبریزی
ارسال دیدگاه