بابا وحشتیله بو چولده من دئمه کی سیاحته گلمیشم
یارالی قوم اوسته یخیلماقون ائشیدوب عیادته گلمیشم
سن ئوزون مراموه چاتموسان منه چوخ چتیندی شهادتون
قوری یرده سن ، دلی داغلی من نجه شرح ائدیم غمِ فرقتون
بولورم که اجرِ جزیل آلار کیمه قسمت اولسا زیارتون
بابا فوزِ اعظمه چاتماغا بو گجه زیارته گلمیشم
دولانوب تاپونجا بو جسمیوی بابا ال حیاتیدن اوزمیشم
یریوب قاچوب یخیلوب دوروب نجه رنج و زحمته دوزمیشم
توخونوب ایاقلاریما تیکان یوزه اشک آلیمی دوزمیشم
سنه عرضِ حال ایلیم بابا اولونان اهانته گلمیشم
او قدر یارا ورولوب سنه بدنونده یوخدی شمارشی
نه بدنده باش نه الون قالور ، نه لباسی وار نه ده بالشی
منیده اوقدر وروبدولار گوزومون دونوب قانا بارشی
بابا اشکِ مرحمی سالماقا بو قدر جراحته گلمیشم
بابا شوقِ وصلتون اختیاریمی آلدی من یاتا بولمدیم
ولی خوفِ قمچینی گوزلیوب بو مرامه تئز چاتا بولمدیم
یاتیشوب حرایمِ عصمتون ، قوری یرده من یاتا بولمدیم
دوشنَم بو یاره لی سینوه ، یتم استراحته گلمیشم
باتا باتدا گون نئجه عرض ائدوم بابا جان نه نوع سویولموشوق
بابا جان گوزوندن ایراق سنون سویولوب همیده دویولموشوق
الده قمچی بی رحم کوفیان ، او قدر قووبدیلا یورولموشوق
دیل آچوب بابا سنه شمردن ایلیم شکایته گلمیشم
بابا گر مدینیه من گئدم داخی قیزلارا قاریشانمارام
دئسه لر نولوب آتا قارداشون بس هانی عَمون دانیشانمارام
یره دوشسه گر بو سوزوم منیم کوسرم داخی باریشانمارام
بابا قوی دییوم گجه یاریسی قاپووا نه حاجته گلمیشم
بابا سویگلی قیزووام اگر ایستوسن که چوخ ناله ائتمیوم
سنی فاطمه گَل ایله دعا داخی من مدینیه گئتمیوم
یا ئولوم بو یئرده یا شامده ، وطنه دوباره قئیتمیوم
بولورم کی سن ایله سن دعا یتیشر اجابته گلمیشم
سن شهید اولاندانصورا بابا اشقیا خیامی تالاتدیلار
اود ایچیندن هر بالا قیز چیخوب اونی آت قباقینه قاتدیلار
کوفه نین اراذل جماعتی اهلبیتون اوسته داش آتدیلار
اکبریم آلان گوشواره لرده گیدوبدی غارته گلمیشم
توکولنده خیمیه کوفیان بیزه بسکه شدّت ایدوب عطش
آلیشان زمانیده خیمه لر بابا نچه قیز ایلمیشدی
غش
بو سپاهِ کوفه بیزیله چوخ معجر اوسته ایلدی کشمکش
ولی معجرین ویرن اولمادی باباجان بشارته گلمیشم
سنی عمّه مون جانی آی بابا عمل ایله بیرجه بو خواهشه
بو یارالی سینوه هی آخان باباجان گوزومده کی بارشه
یوزی قاره (نادمه) وئر شفا ، گوزینی تیکوب بو گذارشه
ئوزی عاصی ، آدی حسینچیدور اودی من شفاعته گلمیشم.
شاعر : مرحوم سیروس مناف زاده #نادم
- دوشنبه
- 16
- مرداد
- 1402
- ساعت
- 23:56
- نوشته شده توسط
- یوسف اکبری
ارسال دیدگاه