ای جوان اوغول سنیدون مونس شفیق لیلا
دورما گیت ملالون اولسون قبره دین رفیق لیلا
حلقه حلقه زلفون ایتدی من غریبی حلقه بر گوش
نظمیله گوز اوسته مژگان صف چکوبدی دوش بر دوش
گیزلنوبدی آب حیوان لبلرونده ای لب نوش
چشمه حیاته دوشسون قوی علی طریق لیلا
شش جهتدی عشقِ حُسنون باشه بیله شور سالدی
عشق ششدرینده لیلا شاهزاده مات قالدی
قلعه ی دل حزینی لشکر محبّت آلدی
کارگر اولانمادی بو فکرت عمیق لیلا
حسّدن دوشوب قُوالر شور عشقیدن وجودیم
بی وجود اولوبدی لیلا قالمیوب مگر نمودیم
باطنا یانار وجودیم مجمری و لیک دودیم
آتش محبّتونده وار عجب حریق لیلا
نوردیده گیتمه گوزدن گیتمه سون بو دیده نوری
ای سرور قلب واردور سنله قلبیمون سروری
بولمورم نیدیم من آخرچوخدی حسرتون وفوری
ساکت اولدی دوشدی دلدن بو دل شفیق لیلا
جان قویوب سنون یولوندا شوق اوزیله جان و دلدن
جان کیمی بو سرو قدّون سینم اوسته بَسلدیم من
بیله وقتیده آناوی ترک ایدوب نَدَن گیدورسن
قانه دوندی باغریم آخر گیتمه ای رفیق لیلا
ای عزیز اوغول فدا بو حالیوه ذلیل جانیم
بو نه شوردور باشوندا باشیوه سنون دولانیم
باخ یوزومه گور بولورسن نه زماندی بو زمانیم
بو سبب آخار گوزوندن اشک چون عقیق لیلا
سر حد کماله یتدون گیچدی حدّدن کمالون
یاخشی وقتیده یتیشدی دادیمه اوغول وصالون
مرحبا وفاده اولسون اَمدیقون سودون حلالون
حقّیمی حلالون ایدیم صدقیله صدیق لیلا
یا اوتور یانیمدا مندن رَم یِمه ای آهوی رام
یا یری باخوم بویوا بلکه قلبیم اولسون آرام
حیف اولا سنون طویوا قالدیم حسرت ای دل آرام
دولدی درد حسرتیله سینه شهیق لیلا
دردیمی ایدوم سنه من هانسی دللریله ظاهر
یاندورور اوغول اُلومی اولسادل نقدر صابر
یاتمیوب گوزوم گیجه لر چکمیشم جفاوی آخر
سن کیمی یقینا اولماز بیر نفر عتیق لیلا
تیز اثر ایدر اوغول چون اوغلونا آنا دعاسی
ایلرم دعا که گلسون جانیمه بُویون بلاسی
سالموسان بویون فداسی بوینوا اُلوم لباسی
مرگیوه سنون دوزنمز بو دل رقیق لیلا
#هندی قیل تمام آغلا اکبره صباح و شامی
حق اجابته یتورسون دلده کی اولان مرامی
لیلی نون دلینجه بیرده سویله مطلع کلامی
ای جوان اوغول سنیدون مونس و شفیق لیلا
- سه شنبه
- 17
- مرداد
- 1402
- ساعت
- 0:6
- نوشته شده توسط
- یوسف اکبری
- شاعر:
-
مرحوم هندی تبریزی
ارسال دیدگاه