چو عزم رزم ایدوب اول شیردل غضنفر تک
قدم رکابه قویوب حیدرانه حیدر تک
عقاب اوسته آچوب شاهباز تک پر و بال
خدنگ تیر و کمانی ، سنانی شهپر تک
نهال قد دل آراسی تک ، النده سنان
کمان ابروی مژگان ، خدنگ خنجر تک
کمند زلفنی چین چین ایدوبدی دورت شقه
دوتوبدی دورت طرفی بوی مشک ، عنبر تک
ویروب قباقجه بیر دسته پیش جنگ قرار
دوزوب یمین و یساره سواره لشکر تک
دالندا دسته زلفی اولوب سر افکنده
علی دالندا بعینه غلامی قنبر تک
یوزی صحیفه قرآن ، خطی کلام الله
ایکی طرفده سیه زلفی خط مسطر تک
متانتیله خرام ایتدی سمت میدانه
آت اوسته قامت رعناسی بیر صنوبر تک
یتوب او عرصه ده بیر گردش ایتدی چون پرگار
دایاندی مرکز میداندا قطب محور تک
جدایه تکیه ایدوب لحظه ای دوروب خاموش
ثباتی کشتی بحر بلایه لنگر تک
حصار جسمی ویروب سد آهنین ترتیب
برابر صف یاجوجده سکندر تک
علی یوزونده پیمبر جمالنون نوری
تجلی ایتدی او دم آفتاب انور تک
دوشوب تحیره لشکر سکوت حالنده
تمام عرصه حیرتده مات ششدر تک
شل اولسون اللریمیز گر قلج چکاق یوزینه
اگرچه شعله چکه برق تیغی آذر تک
بولوب عقیده قومی خطاب قیلدی عمر
بو نوجوان گوروسوز صورتا پیمبر تک
خیال ایلمیون سیز پیمبرون اوزیدور
اولوبدی جدینه بنزر جمالی مظهر تک
دگل رسول ، حسینون علی اکبری دور
شجاعتیله صلابتده شیر داور تک
نه دورموسوز بو جوانی چهار جانب دن
ایدون احاطه جماعت محیط اخضر تک
قلج ووران اوخ آتان دسته دسته حمله ایدون
ورون ، یخون یره رعنا قدون صنوبر تک
سنان و نیزه و شمشیر و تیر و خنجریله
تکه تکه بدنون دوغریون گل تر تک
اونون جمالینی قانیله ایلیون گلگون
که سرخ رو گیده بزم نگاره دلبر تک
ویریلدی لشکره تا ابن سعددن فرمان
صدای کوس اوجالوب هایهوی لشگر تک
گلوب تلاطمه دریای غیرت علوی
قزاردی رنگی غضب دن طلای احمر تک
آچوب فصاحتیله لعل گوهر افشانون
توکوب لعآلی دری کلامی گوهر تک
نه سس سسه ویروب ای قوم قیل و قال ایدوسوز
نه بیر بیره قاریشورسوز زنان و دختر تک
هانی او لاف گزاف ایلین دلاورلر
گله مبارزته فارس هنرور تک
حرام اولا سیزه غیرت ، گرک نهان اولاسیز
بو غیرتیله پس پرده ده مخدر تک
شجاعت اولسا اگر بیر کسون وجودینده
چخار اودا قویولاندا عیاردن زر تک
بو کثرت ایچره اوزوم تک، بو قوم و لشکردن
گوروم بو یرده دوران وار بو تک دلاور تک
دایاندی یرلی یرینده ، چو قالب بی روح
نه حس ،و نه حرکت ، صورت مصور تک
گورنده حالت قومی نبیره حیدر
دولاندی حالتی خشمه گلوب غضنفر تک
ووروب عقابه چپ و راستدن ایله مهمیز
گلوب او دم تک و پویه عقاب صرصر تک
اوجاتدی معنی الله اکبری اکبر
ال آتدی قائمه ذوالفقاره حیدر تک
یوزی گوزی قیزاروب منتهای غیضندن
ایدردی، حمله او حالیله ضیغم نر تک
بسان مور و ملخ ایلدی پراکنده
جناح قلب داغلدی یمین و ایسر تک
علم یاتوب ، پوزولوب دسته لر، قشون سیندی
داغلدی رشته نظم و نظامی صفلر تک
ویروب او دشتده ترتیب کشته دن پشته
بیر بیر اوسته دوشوب سرنگون بدن سر تک
علی الینده ظهور ایتدی سطوت علوی
یهود قومینه رزم قتال خیبر تک
اولاندا بارقه هر فرقه برق شمشیری
بولردی راکب و مرکوبی عمر عنتر تک
ایدوب او عرصه نی اعدایه حوزه عرصات
مجسم اولدی نظرلرده هول محشر تک
قالاندی تل کیمی نعش لر ، ایدوب مسدود
فرار ایدنلره راه فراری معبر تک
فضای دشت چو دریای خون اولوب مواج
او قان ایچینده بدنلر نگون شناور تک
قیلوب قلوب سپاه مخالفی تسخیر
باباسی بدرده منصور اولان مظفر تک
گلن خیالیمه الدن قراریمی آلدی
خیالیمی ایدوب آشفته زلف اکبر تک
نوای ناله نی ، ناله دن دایاندی ، دله
ایدر اثر رگ و جانه زبان نشتر تک
قلم دایاندی الیم تتردی ، دوتولدی دلیم
دولوب ملالیله قلبیم، دل مکدر تک
شهادتی دله گلمز دیسم دلیم یانسون
اوزوم بو اوددا یانام سهلدور سمندر تک
که قورخورام اورگیمده بیر اود زبانه چکه
یانا الیمده کی خامه (حقیر ) دفتر تک
نه پیر دهر گوروبدور نه مادر ایام
جوانمرد هنرمند علی اکبر تک
- سه شنبه
- 17
- مرداد
- 1402
- ساعت
- 0:10
- نوشته شده توسط
- یوسف اکبری
ارسال دیدگاه