گَل باجی گَل بیر دسته گُل خندان گتوردوم
جدّیم شبهین قانینه غلطان گتورودوم
گَلسون خبر ویر عترتِ قرآنِ ناطق
شیرازه دن اوراق اولان قرآن گتوردوم
اوغلوب ئولوب ، قلبیم یانوب ، دلخستیَم من
دلدن طنابِ زلفینه پا بستیم من
جانان عزیزیم جان ویروب ، جان اوستیم من
هر بیر قدمده جان ویروب بیر جان گتوردوم
هانسی جوان بو منظرِ طاهایه بنزر
هانسی آنا اوغلی ئولن لیلایه بنزر
هانسی قیزیل گُل بو گلِ حمرایه بنزر
آفت زده بیر گلستان ویران گتوردوم...
وار حقّی دوشسون قارداشون تاب و تواندان
هانسی آتا باخ گور گیچر بیله جواندان؟
گچمز قیامتده آنام زهرا بو قاندان
محشرده داد آلماقلیقا عنوان گتوردوم
باشدان گیچوب خلوتگهِ یاره چاتوبدی
دینمور دانشمور عالَمی گوزدن آتوبدی
دیندیرمه یورقوندی بالام راحت یاتوبدی
باشدان گچن بیر عاشقِ جانان گتوردوم
رختین سویوندورما یاتا قوی باجی راحت
رختین سویوندورسان ویرر زحمت جراحت
اولادِ یاسین ایتماقا یاسین تلاوت
یاسین شبیهین خستهء پیکان گتوردوم
پیغمبرین آئینهء هیکل نماسی
قالمیش او حاله شرحینون یوخ انتهاسی
بسکه وروبلار نیزه و خنجر یاراسی
یغدیم عبایه چون گُلِ خندان گتوردوم
بیر کیمسه بولمور قالموشام باجی نه حاله
بیر دسته آق گُل یولّادیم سمتِ قتاله
قانیله رنگین ایتدیلر مانندِ لاله
پرپر داغلمیش لالهء نعمان گتوردوم
باغِ امیدیم نخلی دور بو سرو قامت
بیر گُلدی وار بیر گلستان بوندا طراوت
امّا طراوتدن سالوب قومِ شقاوت
عمریم گُلین افسرده و پژمان گتوردوم
دنیا و مافیها بونون اولماز بهاسی
آلدی الیمدن حیف اولا دشمن جفاسی
گلمور یوزیمدن سن چاقور گلسون آناسی
دنیانی قویدوم صبریمه حیران گتوردوم
مصرِ بلادور خرگهیم بازارِ محنت
یعقوبِ پیرم یوسفیم بو ماه طلعت
یوسفده یوخ بوندا اولان حُسن و ملاحت
بازارِ عشقه یوسفِ کنعان گتوردوم
بیر خادمِ پیرم شها بو آستانه
آدیم (حسینی) نسبتیم سیز خاندانه
امّیدوارم لطفیوه الده بهانه
یوخ بیر زادیم بیر دیدهء گریان گتوردوم
- سه شنبه
- 17
- مرداد
- 1402
- ساعت
- 0:17
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه