آچ گوزلرون اشراری رسوا ایله قارداش
قرآن اوخی قرآنی احیا ایله قارداش
واگیر :
سر نیزه اوستن باخ منه
جانیم اولا قربان سنه
یا رالی قارداش
بو قافله سنسیز اولانماز شامه راهی
یول ایتمه سین الله یاراتدی نور ماهی
سنسن بو یولدا زینبین پشت و پناهی
آهسته گیت اما مدارا ایله قارداش
نیلوم سنه دلبستیم
آهسته یول گیت خستیم
یا رالی قارداش
کیم باشووی سر نیزه نون اوسته ووروبدی
کیم ساقه سیندن بو گولی عطشان قیروبدی
آئینۀ پیشانووی داش سیندیروبدی
بیر یولدا قان آلتدان تجلاّ ایله قارداش
بو امّته دلسوز سن
ئولسونده سن پیروز سن
یا رالی قارداش
بارماقیمه انگشتر دیداری تاخ گیت
سرنیزه ده اولدوز کیمی شاماته آخ گیت
گیتمه گیدورسن نیمه جان قزلاره باخ گیت
بی کسلرین دردین مداوا ایله قارداش
ای روح طاهر آچ گوزون
آللهه خاطر آچ گوزون
یا رالی قارداش
سعد اوغلی ویردی خولیه باشون امانت
اما اولوبدی بو امانتده خیانت
گول چهره وین اوستونده وار کولدن علامت
بو سرّی آچ کشفِ معما ایله قارداش
واضح بویور سوز هر ندی
قارداش بو خاکستر ندی
یارالی قارداش
یوللاردا دوتما فاصله مندن حسین جان
گول آیری دوشمز چونکی گلشندن حسین جان
زهرانون عطرین قوی آلیم سندن حسین جان
گوز یاشیمی یوللاردا دریا ایله قارداش
سایون یُوخی هست ایلیر
عطرون منی مست ایلیر
یارالی قارداش
- چهارشنبه
- 18
- مرداد
- 1402
- ساعت
- 0:59
- نوشته شده توسط
- یوسف اکبری
- شاعر:
-
استاد حسین غفاری اردبیلی
ارسال دیدگاه