عم اوغلی صبریم جالاندی
خانه‌ی بختیم تالاندی
اووچیلارا اسیر اولدیم
دادیمه تئز گل آماندی
باغریم اولوب قان عم اوغلی
گوزلره قربان عم اوغلی
حیجلهسرا تالان اولدی
گلین‌لیگیم یالان اولدی
اوستومه آد قویوب گئتدین
دردین منه قالان اولدی
باغریم اولوب قان عم اوغلی
گوزلره قربان عم اوغلی
فلک سنه کمند آتدی
اولادی آرزیا چاتدی
سنین آدین دیله دوشدو
اما منیم آدیم باتدی
باغریم اولوب قان عم اوغلی
گوزلره قربان عم اوغلی
اورگیمده سوزوم قالدی
نه قلبیمده دوزوم قالدی
کج باخیب آیریلاندا سن
گوزلروندا گوزوم قالدی
باغریم اولوب قان عم اوغلی
گوزلره قربان عم اوغلی
چاغماغینی فلک چاخدی
گوگده بیر ایلدیریم شاخدی
چوخلار آیدینلیغا چیخدی
منیم بخت اولدوزوم یاتدی
باغریم اولوب قان عم اوغلی
گوزلره قربان عم اوغلی
سالدی منی بلا جاندان
ظلم و جفای دوراندان
بزندی توی گونو سنین
آغ کوینگین قیزیل قاندان
باغریم اولوب قان عم اوغلی
گوزلره قربان عم اوغلی
خوش گونو نیلیرم سن‌سیز
گول بئجرم درم سن‌سیز
چتین گوره ائل قبیلهم
زولفلریمی هورم سن‌سیز
باغریم اولوب قان عم اوغلی
گوزلره قربان عم اوغلی
داغیلدی ائللریم گئتدی
سویولدوم زیوریم گئتدی
سندن قالان نشانیدی
گلین‌لیک معجریم گئتدی
باغریم اولوب قان عم اوغلی
گوزلره قربان عم اوغلی
آهیم الوودان سئچیلمز
دردیم اورکدن بیچیلمز
سنده منی گوزدن آتسون
عشقون اورکدن کیچیلمز
باغریم اولوب قان عم اوغلی
گوزلره قربان عم اوغلی
کوفیه گلدی قطاریم
سارالدی گول تک عذاریم
قانلی باشون جدا اوسته
اولدی منیم هم جواریم
باغریم اولوب قان عم اوغلی
گوزلره قربان عم اوغلی
منه دشمن ال چالاندا
جان قویمادی غم بو جاندا
تاری بیلیر نه چکمیشم
نی ده باشون داشلاناندا
باغریم اولوب قان عم اوغلی
گوزلره قربان عم اوغلی
گلستاندا تکان بیتدی
گوزل یاریم گوزدن ایتدی
دویولمکدن یورولمازدیم
منی شماتت اینجیتدی
باغریم اولوب قان عم اوغلی
گوزلره قربان عم اوغلی
داشلانیب چرخین جفاسی
دردیمین یوخدور داواسی
هر یارایا مرهم اولسا
ساغالماز هئچ دیل یاراسی
باغریم اولوب قان عم اوغلی
گوزلره قربان عم اوغلی
اووچو کمانه اوخ تاخار
جیران قاچار دونر باخار
تانیش داشی اوخدان بتر
هم گوینهدر هم ائو ییخار
باغریم اولوب قان عم اوغلی
گوزلره قربان عم اوغلی
قیشده قوپار دومان یئردن
اورگ یانار یامان یئردن
کوسمگه حقلی‌سن مندن
کونول کوسر اومان یئردن
باغریم اولوب قان عم اوغلی
گوزلره قربان عم اوغلی
بلبل اوچار گوگه بیلمز
گول تیکانلیق سئوه بیلمز
آداخلیسی اولن گلین
هئچ قاپینی دویه بیلمز
باغریم اولوب قان عم اوغلی
گوزلره قربان عم اوغلی
غم منی زینهاره گتدی
آغ گونومو قارا گتدی
فلک قولومو باغلادی
مجلس میخاره گتدی
باغریم اولوب قان عم اوغلی
گوزلره قربان عم اوغلی
هامی یارین عزیز ایستر
گلین گئدهن جهیز ایستر
گوزلروننان ایراق اولسون
دشمن منی کنیز ایستر
باغریم اولوب قان عم اوغلی
گوزلره قربان عم اوغلی
آخار سودا بالیق اوزر
آی باتاندا اولدوز سوزر
توی گورمین یاسلی گلین
کنیزلیگه نئجه دوزر
باغریم اولوب قان عم اوغلی
گوزلره قربان عم اوغلی
بو چرخ سفله و دنی
بلادن اینجیدیب منی
دشمن ائوینده گوزلریم
قورخا قورخا گزر سنی
باغریم اولوب قان عم اوغلی
گوزلره قربان عم اوغلی
باغلار قالیب سئل آلتیندا
سنبل سینیب یئل آلتیندا
باغریم قان اولدو آزگلنن؟
قانه باتان تئل آلتیندا
باغریم اولوب قان عم اوغلی
گوزلره قربان عم اوغلی
- چهارشنبه
- 18
- مرداد
- 1402
- ساعت
- 1:14
- نوشته شده توسط
- یوسف اکبری
- شاعر:
-
سید تقی سیفی اردبیلی
ارسال دیدگاه