گوردیلر بیر داغ انوب تلی بیابانه گلور
گوهر قدرت قهاریدی جولانه گلور
مرتضی اوغلی اباالفضلدی میدانه گلور
وئره نامردلرین مزدینی مردانه گلور
اود دوتوب حیف سوسوز قلبی یانا یانه گلور
.
.
کلک دست ازلین معجز ائدوبدور هنری
سینه سی پھندی باریک دور اما کمری
زَهرۀ زُهره نی چاک ایلر آجیقلی نظری
پنجۀ شیره ورار طعنه قوی پنجه لری
نیزه سین آلجاق اله، لرزه نیستانه گلور
.
.
عرش زین اوسته اوتورموش جبل طور کیمی
گورونور قدّ رساسی علم نور کیمی
دم شمشیری سوکور سینه لری گور گیمی
خوار اولوب دشمن ناکس مگس و مور کیمی
لشکری رعشه دوتوب واهمه انسانه گلور
.
.
او غیور عربین جنگینه کیم مایل اولور
ئوزباشی ئوز اتگینده دَرَکه واصل اولور
فرقدور ضربه گورور قاشدی گوزه داخل اولور
سینه دور طبل کیمین پارچالانوب باطل اولور
امت رهبر بی دیندی که نیرانه گلور
.
.
پند عباسی ائشیتسیدی او اشرار زمن
سویونوب جوشن فولادی گییردیله کفن
گویه تیغیله سالوب طنطنه اول سر و بدن
یرده یوز مین تیکانی اود بوریوب واهمه دن
داش اورکلر آلیشوب توستوسی کیوانه گلور
.
.
بیر نفر تنگ ائلیوب عرصه نی اون مین نفره
ایکی بازوئیله دورد سمتی سالوبدور خطره
قبض روح ایلیوب اشراری توکور دور و بره
دوندروب یوز او کشاکشده باخور خیمه لره
عطر سلطانی آلوب وجدِ فراوانه گلور
.
.
جوهریندن اوجالور عشق دلینن بو خطاب
یاحسین کیمدی سو تا مندن آلا طاقت و تاب
من عطش آتشینی غیرتیلن ایلرم آب
تک سنون عشقون ائدوب قلبیمی بریان و کباب
تک سنه خاطر اورک پرده ده الحانه گلور
.
.
تا اولام لطفوه داخل آتارام وارلیقی من
باشماقین خارج ائدر مسجده البته گلن
هستی اهل اشارت آقا سن سن آقا سن
خلق اولوب خاکدن آدم سنه نور اولدی بدن
سنون آدونله شرف شاهد ایمانه گلور
.
.
بوریوب چوخدا منیم دوره می یوزمین ظلمات
ظلمات ایچره منی عشقون ائدوب آب حیات
ایچمرم اوپسه ایاقیمدن اگر نهر فرات
گورسه کوثر بویانان لبلری سویلر صلوات
بو دوداقیله نفس پیکر عرفانه گلور
.
.
بیر بیله قدرتیلن حاضرم ای پیر مغان
سوکوله سینم اوخیلان توکوله شیشیه قان
آلا اول شیشه نی دشمن وئره بیر جام سودان
گوندرم تشنه اوشاقلاروه اول جامیده جان
گوره لره خیمه لره هدیۀ جانانه گلور
.
.
وئروب اول نیتیلن مرکب رهواره جلو
داغیدوب صفلری اول شیر دلیر ائتدی درو
وردی اوخ هر اورگه قوپدی او قلب ایچره الو
نیزه سی لشکره برپا ائلیوب محشر نو
نوبه شمشیره یتوب برقینه پروانه گلور
.
.
غضب و غیضی چیخوب عرصه ده سیر و گذره
اوخشادوب بادیه نی خونیله بحر خزره
آتلارین دیرناقی قان ایچره دونوب لعل و زره
وردیلار حیف اولا گوز گلدی او صولت نظره
گوردیلر حال خسوف اول مه تابانه گلور
.
.
#عباسیه_شهادت (https://zobdatolashaar.ir/tag/%D8%B9%D8%A8%D8%A7%D8%B3%DB%8C%D9%87_%D8%B4%D9%87%D8%A7%D8%AF%D8%AA/)
.
.
ایکی بولموشدی حریفین او که با ضرب ظریف
ایکی قولدان اونی محروم ائلیوب ایندی حریف
یخدی اول مرد سخانی یره بیر مرد سخیف
یخان ابله یخیلان مه، او شرف سیز بو شریف
او گلور غیضه بودا فیض فراوانه گلور
.
.
بویورور اهل عنادی چاغیر ای پیک هلاک
ایلیون سینه می پیراهن یوسف کیمی چاک
«مرغ باغ ملکوتم نیم از عالم خاک»
آت ایاقینده داغیلدی ائله که بو تن پاک
اوندا روحیم پر آچوب عرشده طیرانه گلور
.
.
ای منیم روحیمه معراج وئرن شاه پریم
ای منیم صبح نفس غیب قصص راهبریم
اولا یوز قطعه اگر قامت معنی گھریم
سن چاغیرسون منی لبّیک دییر قطعه لریم
یوخسا بو پارچالانان پیکریم افغانه گلور
.
.
هله قان ایچره او جانان یولا تیکمیشدی گوزین
که او جانانه یتیردی شه لب تشنه ئوزین
باشینی آلدی دیز اوسته یوزونه قویدی یوزین
قدرتی اولمادی دلده گوزی فاش ائتدی سوزین
دئدی قارداش داخی روحیم منه بیگانه گلور
.
.
ای اولان گوهر معنایه قیزیل قانی محک
عرشه اوج ائتمگه آماده سن الله معک
لبلرون بیربیره وورما که ائدور لرزه فلک
«خلق را از دهن خویش مینداز به شک»
کسمه انفاسوی روح القدس احسانه گلور
.
.
سنی که، تپراقا یخدی سپه کینه مآب
آرزوسین توز ائدوب یللره تاپشیردی رباب
داخی قان خدمت ائدر اصغر عطشانه نه آب
نامروت اوخ آچار حلقینی مانند کتاب
او کتابیله نفس، دولت قرآنه گلور
- چهارشنبه
- 18
- مرداد
- 1402
- ساعت
- 15:3
- نوشته شده توسط
- یوسف اکبری
- شاعر:
-
عسگر شاهی اردبیلی
ارسال دیدگاه