سنی زیبا یارادان داوره عشق اولسون حسین
ذات پاکونده اولان گوهره عشق اولسون حسین
سنی عرشه آپاران شهپره عشق اولسون حسین
سن کیمی اهل وفا رهبره عشق اولسون حسین
یا حسین ذکر ایلین دللره عشق اولسون حسین
آند اولا قزلاروین دلده کی نسگللرینه
زینبون کرب وبلاده داغلیان ئللرینه
اکبرین گوزلرینه قاسمیوین تللرینه
اوجا بوي قارداشیوین مشکی دوتان اللرینه
دینی سن حفظ ایلدون یکسره عشق اولسون حسین
عاشقه فرق ایلمز کعبه وبتخانه ودیر
هاردا یار اولسا اورا قبله دي عشاقه، نه غیر
شوذب وحنظله وجندب وحرّیله بریر
شهدا شیخی حبیب بن مظاهر له زهیر
مسلم عوسجه وعامره عشق اولسون حسین
شب عاشوریده عشاقه تکان ویردون سن
جنتی خیمیه گَتدون هیجان ویردون سن
قوزادون بارماقوي معجز عیان ویردون سن
اولارا جنتی بارماقدا نشان ویردون سن
بارماقوندان گورونن کوثره عشق اولسون حسین
هامی باخدي مگر عباس نوشتیمدي منیم
سن اولان یر دیدي کعبمدي کنشتمدي منیم
جنتیم نازلی رقیوندي سرشتیمدي منیم
اکبرین بیرجه قلم قاشی بهشتیمدي منیم
نیلورم جنتی من اکبره عشق اولسون حسین
قویمادون عشقده کم رطب و لا یابسدن
سبقت آلدون عجبا سابع وهم سادسدن
کیمیا مثلی آیردون زر نابی مسدن
بزه دون گلشن عشقی وهب وعابسدن
باغبانه چمنه گللره عشق اولسون حسین
فقط اون یدي گونیدي که طوي ایتمشدي وهب
آناسی همسري یاننده اوپاکیزه نسب
شهداده واریدي آدي اونون یا للعجب
بلدي که دعوت اولوب قلبی تاپوب شور وطرب
ایستدي رزمه گیدوب قان ویره عشق اولسون حسین
بسکه عورت اوزي شرکتدي هامی نیک وبده
تازه دامادي اودور همسري قویموردي گیده
ایستموردي هله بو تزلقا چون ترکین ایده
هی دیوردي داخی اوندانصورا دنیاده نئده
یالواریردي اوملک منظره عشق اولسون حسین
وهبون همسري رخصت دیمه راحت ویردي
دیدي تازه گلینم یوز اونا رقت ویردي
نوعروس آغلادي هی گوز یاشی شدت ویردي
تا حسین شخصا اونا قول شفاعت ویردي
وهبه سویلدي گت بالمره عشق اولسون حسین
دیدي هجرانه داخی صبر ایدرم یوخدي سوزوم
گت حسینه کمک ایت منده، غمه چوخدي دوزوم
ابر نیسان کیمی قوي آغلیا هجرونده گوزوم
حشریده فاطمیه منده کنیز اولّام اوزوم
بله تازه گلینه، همسره عشق اولسون حسین
اذن آلوب گتدي وهب قالدي آناسی حرمی
بیر سفارش ایلیوب زینبه ده بیش وکمی
نوعروسیم سنون امیدیوه قالدي نه غمی
اگر ئولسم گنه لیلادن آیرما نه نمی
گوزلریندن آخان اشگ تره عشق اولسون حسین
چوخ رشادتله گلوب لشگریله جنگ ایلدي
عرصه نی آل یزیده او جوان تنگ ایلدي
او قدر قیردي عمر سعیدیده دلتنگ ایلدي
نَفَسین تازه لیه، خیمیه آهنگ ایلدي
گلدي بیریولدا آناسین گوره عشق اولسون حسین
قییدوب خیمیه یورقون یارالی پیکري قان
قولبویون اولدي آناسیله او پاکیزه جوان
حین صحبتده ایدوب مادرینه بیله بیان
وهبوندن دي گوروم ایندي رضاسن آناجان؟
بیر بله شیرزنه مادره عشق اولسون حسین
دیدي فرصت اله دوشمز بله مهمان اولاسان
عمریده لذّت اودور همره جانان اولاسان
بوحسین چوخ آقادي گت که شتابان اولاسان
من سنی یولّامشام اکبره قربان اولاسان
تازه دن ووردي ئوزون لشگره عشق اولسون
- چهارشنبه
- 18
- مرداد
- 1402
- ساعت
- 15:7
- نوشته شده توسط
- یوسف اکبری
ارسال دیدگاه