اِبریقِ میِ میکده ی جاندی محمّد
جان بشریتده کی شریاندی محمّد
.
پیغمبر رأفتدی پیام آور رحمت
ذات احدیّت کیمی رحماندی محمّد
.
زیبا یارادوب صورتینی حضرت زیبا
کیم گورسه دییر ماه درخشاندی محمّد
.
غار ابدیّت تانینوب غار حراسی
اوردا بیلینوب صاحب رجحاندی محمّد
.
یوخ سیطره و سلطنت عشقیده مثلی
عیسالره موسالره سلطاندی محمّد
.
دریایه‌سالان وقتیده ئوز کشتی سینی‌نوح
یازدی سُوا پیغمبر طوفاندی محمّد
.
وار علتی عمّامه سینون رنگی اولوب سبز
چون سبزترین گلشن رضواندی محمّد
.
پروانه کیمین روح الامین گویده آچار پر
سسلر منه ده شمع فروزاندی محمّد
.
یوخ فضل و عطایاسینون عالمده نظیری
پربارترین دامن دوراندی محمّد
.
ایوان سماده سالینار سفره سی هرگون
عرش اهلی دییر صاحب احساندی محمّد
.
واردور یری ناز ایلیه هر مذهبه اسلام
چون عالم هستیده مسلماندی محمّد
- چهارشنبه
- 18
- مرداد
- 1402
- ساعت
- 23:47
- نوشته شده توسط
- یوسف اکبری
- شاعر:
-
بهزاد قاسمی اردبیلی
ارسال دیدگاه