سوال:
بابا بیزی سندن آییران پیک اجلدی
هجران اوخی اهل حرمین قلبینی دلدی
سرنیزده،گوردون نه بلا باشیمه گلدی؟
دور بیر ایاقا گور نه پریشان گلوب عمم
قبرین آلوب آغوشه اودی دینجلوب عمم
جواب:
خوش گلموسن ای نازلی بالا قبریمون اوسته
ایتدی سنی غملر گوزلیم دهریده خسته
نفرین ائلدیم قمچی ویران دشمن پسته
یورقونلوقی احساس ائلدیم من نفسیندن
قلبیم آلیشوبدی ایاقین آبله سیندن
___
سوال:
قلبینده بابا بیر یارا واردی خبریم وار
دشمن آتی سینونده چاپاردی خبریم وار
انگشتریوی بجدل آپاردی خبریم وار
آفت یلی گلزار ولایه نیه اسدی؟
سویله باشیوی شمر ستمگر نیه کسدی؟
جواب:
مقتلده دیدیم شمره دایان،ظلمه تلسمه
اللهدان اوتان،لعنت اولا سن کیمی خصمه
یول گوزلوری خردا بالالار باشیمی کسمه
توبه ائله،توبه قاپوسی هر دم آچیخدی
باخمادی کسوب باشیمی،هم سینمه چیخدی
_
سوال:
قرخ گوندی گزوب چوللری اولدوق سنه مهمان
مهمانلاریوا سویله خوشامد،شه خوبان
چک بیر الیوی باشیمه جانیم سنه قربان
باخ بیر بو آخان گوزده کی گوز یاشیمه بابا
یوللاردا سنان ،قمچی ویروب باشیمه بابا
جواب:
گلسه باشیما هر نه بلا خصمه اگیلمم
وار علتی گوزیاشیوی گوزدن نیه سیلمم!
شرمنده بالا،من باشیوا ال چکه بیلمم
آگهسن ئوزون چوخدی غمیم یاره لی دلده
ئوز ساربانیم اللریمی کسدی بو چولده
_
سوال:
قوش تک بابا بو چولده سینوبدی پروبالیم
سرنیزده گوردوم باشیوی آرتدی ملالیم
دیندیر منی زهرایه گوره،غملیدی حالیم
عرشه اوجالوب دهریده بو آه و فغانیم
سس ویر منه یورقون قیزینام یوخدی توانیم
جواب:
آند اولسون او خلاق جهان و شب و روزه
آند اولسون او قرآندا اولان رمز و رموزه
قرآن اوخودوم آنیما داش ویردی عجوزه
سرنیزده آنیمدان آخان قان سوزولوبدی
مرجان کیمی کیپریکلریم اوسته دوزولوبدی
- پنج شنبه
- 19
- مرداد
- 1402
- ساعت
- 0:35
- نوشته شده توسط
- یوسف اکبری
- شاعر:
-
بهلول حبیبی زنجانی
ارسال دیدگاه