سلام ایاؤز وطنینده وطن غریبی، حُسینیم
سلام ای یارالی قلبیمین طبیبی، حُسینیم
سلام ای قالان آتلار ایاقیآلتدا جنازه
سلام ای منی قیرخ گون سالان بو سوز و گدازه
سلام ای دوداقی خیزِ خیزرانی خریدار
گونش کیمین گئجهیاری تنور ایچینده پدیدار
سلام ای داشآتانلار گؤزونده پارچالانان آی
داریخمیشام باجون اؤلسون، قؤی آغلاییم سنه "هایهای"
مصائبیله قؤیان ای عزالی زینبی یالقوز
سلام، شامه کیمین نیزده پاریلدایان اولدوز
عزا توکولدو عزا اوستونه ، ائله چتین اولدی
که بیلمدیم نئجه گونلر ساووشدو اربعین اولدی
خیال ائدنده علی اکبرین سسی قولاقیمدا
گئدیب شیرین یوخویا اصغرین منیم قوجاقیمدا
خیال ائدنده اسیر اؤلمویوب خزانه بهاریم
اؤز عالمیمده هله وار منیمده بیر کسوکاریم
اؤز عالمیمده هله قارداشیم دایاقدی دالیمدا
چکر خیال ائلیرم نازیمی بو غملی حالیمدا
اؤز عالمیمده دوروبدور هله دالیمدا علمدار
هله سنین –منه بنزر- بیر اوچیاشیندا قیزین وار
مصیبت اوسته مصیبت، نه گلسه؛ قؤی گنه گلسین
سوروش دییم کی نهلر چکمیشم، قادان منه گلسین
سوروش دییم کی نجور ائتدیلر قیامتی ظاهر
قاچیردیلار، بیری انگشتره، بیری باشا خاطر
اؤزون حسابلا اؤ حالدا گَرَک نه چاره ائدیدیم
سنه طرف یا گَرَک خیمیه ساری قئیدیدیم؟
سوروش حسین دییم؛ دوشدو خیمه لرده نه بلوا
واویلا آه واویلا ، واویلا آه واویلا...
بیری قاچیردی یَمینه، بیری قاچیردی یَساره
اؤ حالدا قالمیشیدیم لمیئسیر آرادان "آواره"
ایکی اَلیم باشیم اوسته اورک اؤتوندا یانیردیم
گزیردیم اخیامی بیربیر، رقیّهیه دؤلانیردیم
رقیّهدن دئمه...گؤردوم نقدر قؤرخوسو چوخدی
یوزی کبود، قولاقیندا گوشوارهسی یوخدی
حسین! باقلادیلار قولقولا بیزی، خبرین وار؟
گَلَن ویریردی سالیردی یولا بیزی، خبرین وار؟
آپاردیم اوزدن آپاررام نئجه عزانی، دئدیمکی!
محالدی غم سالا دیلدن بو قهرمانی، دئدیمکی!
علی قانی داماریمدا، حرامیلر ییخابیلمز
بو تربیتشدهی شاهِ لافتینی، دئدیمکی!
بشر کی سهلیدی، حتی مَلَکلری باشا سالدیم
نشانین ایتمییهجک ای آنامنشانی، دئدیمکی!
محالدور چیخایاددان نقدر گئچسهده تاریخ-
مرور ایلییهجکلر بو ماجرانی، دئدیمکی!
روایحاجته ای شاه چاره قیل، داها بیر گون
بهشتینن عوض ائتمزله کربلانی، دئدیمکی!
بو اؤلکهده غریب اؤلدون، ولی شمیمِ نَسیمین
اَسَنده یکسره مدهوش ائدر جهانی، دئدیمکی!
دیلیم دیلیمدی دیلیم دیلبریم دیل آچ منه سس وئر
بو یورقونا اؤ مسیحا دَمیندن آزجا نفس وئر
اؤقدر آغلامیشام، قان سالیبدی گؤزلریمه خال
گئجه-گونوز غم اَلیندن؛ هه بسنمه؟ پوزولار حال!
هه بسنمه؟ بوکولر بئل، هه بسنمه؟ آقارار باش
قؤجالتدی قیرخ گونون عرضینده ماتمین منی قارداش
جنازن اوسته اَلین شمر خنجره آپاریردی
سنین باشین کسیلیردی، منیم باشیم آقاریردی
حسین! هئچ دئمیرم یورقونام؛ "یورولمویاسان" دی
باجون اؤلیدی نیه تربتین هله لالاقاندی؟
#سیدضیاء_موسوی
- پنج شنبه
- 19
- مرداد
- 1402
- ساعت
- 0:50
- نوشته شده توسط
- یوسف اکبری
ارسال دیدگاه