زاهِدُون ذُوق و صَفاسی لطفِ اَذکاریندَه دِی
عارفُون صُبحِ وِلاسی لِیلهء تاریندَه دِی
زاهِدُون فِکری عَبادتدَه گُوزی جَنَتدَه دِی
عارفُون اَندیشَه سی مَقصُودی ئوز یارِیندَه دور
آلماز عِشق اُستادی دُرَّ پاکِ نَفسِ زاهِدی
عارِفُون کالای نَفسی عشق بازاریندَه دور
هَر نَه رَمزِ مَعرفَت وار دَفترِ اِیمانیدَه
عارفِ حَقّون دِلِ بیدار و هُوشیارِیندَه دور
غَل و غَش سیز اُولسا عُرفان جُوهرِ اِیمانیدور
نُطقهء عُرفان بَلی اِیمان پَرگاریندَه دور
عاشقِ صادِق هَمیشَه سُلکِ عارِفدَن چخُوب
طرزِِ جان بازی بُو سِلکُون مَصدرِ کاریندَه دور
زُمرهء صُوفی دَگُل اَلبتَه عارفدَن مُراد
عارفِ مَعنا بُو سِلکُون ردّ و اِنکاریندَه دور
عارفِ اوّل علی دور مُصطفایَه پِیرَوی
طَرزِ اَفعالی رَسُول الله کِرداریندَه دور
شَهرِ دانِش خَتمِ مُرسَل دور علىُ بابِها
چِشمِ مُولا مُصطفانُون جامِ سَرشاریندَه دور
شَرعَه خاطر مُرتضانُون قانی آخدی سَجدَه دَه
مَسجِدِ کُوفه اُونُون جُزوِ عَزادارِیندَه دور
اِیندیدَه آشفته مِحرابی عَلینی آختارور
قانَه باتمش قِبلَه سی سَرگشتَه اِیثاریندَه دور
وارِثِ اوُلدی مَکتبِ مُولایَه شاهِ کَربَلا
گُوردِیلَر دائم حُسینی ظُلم پِیکارِیندَه دور
عارفِ حَقّه اُولوب یِتمش بیر عارِف هَم صَدا
قُدرتِ وَحدت بَلی بُو شاهُون اَنصارِیندَه دور
خون چَکان اَعضالَرین آغُوشَه آلدی کَربَلا
باشلاری عِیسایَه رَهبَر دشمنُون دارِیندَه دور
لِیلهء یَلدای هِجرانَه وُروبلار پُشت و پا
قانلو گُوزلَر صُبحِ وَصلون خوش پَدیدارِیندَه دور
گُورمِیوب بُو کارِوانُون مِثلینی شامُون یُولی
چِشمِ رَه راحِل لَرون تَصویر رُخساریندَه دور
قُوزانُور صَحرا تُوزی هِی قانلو لَبلَردَن اوُپُور
سُرمِهء غَم عاشقانُون چِشمِ بیدارِیندَه دور
نُوعَروس آغلُور قَرا یِل قاسمُون زُلفین دارُور
چِشمِ مُشاطِ فَلک زُلفِ سَمن بارِیندَه دور
بیر اُوجا نِی دَه حُسینون باشی هر باشدان قاباق
یُول گِیدور قانلو گُوزی دِلخَسته قِیزلارِیندَه دور
اِیلیُور رَمزی اِشارَه حقّ یُولوندا حَقّ دِیُون
کَلمِهء اَعلای حَقُون نَشئه تِکراریندَه دور
زاد راهوز هَر نَه اُولسا سیز بُو یُولدا خَرج اِیدُون
درَّ عِشقوز ناب دور قِیمَت خَریدارِیندَه دور
خوار اُولوبسُوز اِیتمیُون خارِ مُغیلاندان گِلَه
حاجیانِ عِشق چون لذّت یُولون خارِیندَه دور
سُوزشَه مُحتاجی دور پَروانه لَر شَمع آختارور
اَهل عِشقُون سُوزشی آهِ شَررَباریندَه دور
خانمانُوز غارتَه گِیتدی بیابان گَرد اُولون
چُولدَه یاتسا عِشق اَسیری عِشق تالاریندَه دور
وُورسالار زَهرا کیمی اَللَردَه ئولسُوز دِینمِیُون
اَجر و مُزدوز دُشمنِ بی رَحمُون آزاریندَه دور
سینه سین مِسمار دَر دَلدی آنامدا دِینمَدی
عَطرِ خُون بابِ اُمیدُون تیز مِسمارِیندَه دور
قونماز هِیچ دِیوارَه هِیچ اِیوانَه هِیچ بیر گُنبَدَه
دائماً مُرغِ سَعادَت عِشق دِیوارِیندَه دور
اِختیاری خامیَه وِیرسَم اَگر مَطلَب قالار
آیری صُحبت عَندلیبِ طَبعِ مِنقارِیندَه دور
کاروان یُول گِیتدی چاتدی یُولدا دِیرِ راهِبَه
نَشرِ مَطلَب مَقتَلون صَفحات اَخبارِیندَه دور
گُون باتان چاقی قُشُون دُوشدی کَنارِ دِیردَه
گِیتمَه قالما، حُکم یُولدا کُوفَه اَشرارِیندَه دور
وُردیلار خِیمه او چُولدَه بَزمِ عِشرَت قُوردُولار
سُفرهء بادَه او قُومُون مَست خَمّارِیندَه دور
قُویدیلار صَندوقَه سُلطانُون باشین قُفل اِیتدیلَر
بُیلمدیلَر آی او باشُون تَحتِ اَنوارِیندَه دور
دستِ مَعنا قُفلِ زِندانِ جَفانی سیندیرار
قُدرتِ مُطلق شَهیدِ عِشق دادارِیندَه دور
دامنِ صَحرا اوُلوب آلِ عَبانُون مَنزلی
اَلوِلا اَهلی بَلانُون بَندِ دُشوارِیندَه دور
بیر بُلوک شُوریدَه دِل سَر دَر گِریبان اَگلشُوب
گُلشَنی وِیران اُولانلار فِکر گُلزارِیندَه دور
بالش و بَستر یُوخیدی سَر بِزانو یاتدیلار
دَمبدَم یا هُو دین لَر مِثلِ یاهُو یاتدیلار
بُلبلانِ باغِ عِصمَت وِیردی شَهپَر شَهپَرَه
بَعضیسی قُویدی قُولی اُوسته باشین بَعضی یِره
زُلفی آشُفتَه خانم قیزلار وَسطدَه یاتدیلار
دور اِیدوب اَطرافینی وُردی بُیُوکلَر دایِره
خوابِ شیرینَه گِیدوبلَر خَستَه گُوزلَر یُوخلادی
تَرپَدوبدور تِللَرین یِل پَردَه چَکدی یُوزلَره
سینهء صافِ سَمادَه ماه و اَنجِم تابناک
کَهکشانلاردا نِمُودار اُولمُوش آیری مَنظرَه
نُو عَروسِ لِیلى اِیتمش نُورِ مَه سیمین قَبا
نُورینی اَرزان اِیدوب نُور افکنِ خِلقَت یِره
سیّدالسّجادیلَن زِینب اِیکی شَب زِنده دار
یُوز دوتوبلار ساحتِ اَعلای حَیّ داوَره
بیر بی بی بیر قارداش اُوغُلی مَکتبِ تُوحید آچوب
سُجدهء پُر شُور اِیدَہ لّر کِردگارِ اَکبرَه
قانلو باش صَندوقدَه فُوجِ قَراوُل دوره دَه
بانگِ نُوشا نُوشِ لَشگر قُوزانوب دور گُوگَلَره
گُوردیلَر بیر اَل ظُهور اِیتدی دوتوب آهَن قَلم
راهبُون دِیوارِ دِیرین اُوخشادوب دور دَفترَه
یازدی دِیواره اَتَرجوا أمةً قَتَلَت حسین
حالَتِ بُهت و تَعجُب یُوز وِیروب دور لَشکره
قاچدی بیر دَسته او دَستِ مَعنوینی دوتماقا
دُستِ حَقّ اَل وِیرمدى لِیکَن او قُومِ خود سَرَه
کِچدی بیر آز ظاهر اُولدی آستینِ غِیبدُن
یازدی بیر جُمله اِشارَه اِیتدی روزِ مَحشَره
ئولدوروب هَر کیم حُسینی یوخ شَفاعَت حَشریدَه
اُولماسُون اُمّید لُطفِ خاتمِ پِیغمبَره
سومین دَفعه او اَل دَرج اِیتدی بیر مُحکم کُلام
مُنتَظر اُولسُون حُسینی ئولدورنلَر کِیفَره
دشمنِ آیاتِ قرآن دور حُسینون دشمنی
قاتلی قاتلدی هَم پِیغمبَره هَم حِیدَره
اَلغَرض فُوجِ قَراوُل یاتدی وَحشتلَن گِیجه
راهبُون بَختی اُویاندی رُوحی تاپدی سِیطَره
مَعنوی سَسلَر اِیشتدی دِیره سالمش طَنطَنَه
بُو گِیجه حاشا دِیدی راحت گِیدَم من بَستَره
رُوزنِ دِیری آچوب اَطرافینَه قیلدی نِگاه
گُوردی مأوا دور او صَندوقی که رأس اَطهرَه
مَطلَعِ اَنوار اولوب دور کاسهء خُورشید تَک
لَمعه لَمعه رُوشنی قالخُور سِپهرِ اَخضَره
آسماندان دَمبدَم فُوجِ مَلک اِیلور نُزول
زایِرِ مَعنا دولوب اُول وادیِ پَهناوَرَه
کَعبه تَک اِیلور مَلکلَر دورِ صَندوقی طَواف
هَر فِرشتَه شُوط اِیدَن وَقتَه سَلام اِیلور سَره
یا حسین یابنِ رَسول الله سَلام اُولسُون سَنه
بُو گِیجه تُوفیق اُولوب شاها یِتیشدوک مَحضَره
سَن او سُلطانِ عَظیم الشّاُن سَن رُوح الَامین
شَهپَری اُوستَه قُوناق گَتدی مَقامِ بَرتَره
سَن هَمان شَه سَن بَلادَن قُورتاروب سان فُطرِسی
سَن هَمان شَه سَن بابان گُویلَردَه گِیتدی مُنبَره
سُورتُوروک باشون اُولان صَندوقَه بُو شُهپَرلَری
قَصدیمیز حَملِ تُبَرکّدور گِیدندَه گُویلَره
بیز مَلک لَردَه لیاقَت یُوخ دوداقُوندن اُوپَک
بُو اِیشی شایستَه دور اُوغُلی ئولَن زَهرا گُورَه
گُوردی بُو اُوضاعی راهِب قَلبی اُولدی هُولناک
صُبح وَقتی گَلدی یُوز دوتدی گُروهِ کَافَره
گَلدی گُفتارَه اَمیرِ لَشگروز کیم دور دِیدی
وار سُوالیم اِیستُورَم سَر لَشگروز پاسُخ وِیرَه
خُولینی وِیردی نِشان پیرِ کِنِشتَه اَشقیا
روبرو اُولدی او نامَرد و عَدالت گُستَره
خُولیدَن آلدی خَبر سُویلَه نَه وار بو جَعبَه دَه
نیمِه شَب قالخُوردی نُوری گُنبدِ نیلوفَرَه
رأسِ مَردِ خارجی دور سُویلدی صَندوقدَه
نِهضَت اِیتمشدی فَنا اِیتسُون یَزیدی یِکسَره
سُویلَدی آدین بَیان اِیلَه دِیدی آدی حُسین
فاطمه دُختِ پِیمبَر دور آنا بُو سَروَره
فاطمه آدین اِیشتدی غِیظیلَه راهِب دِیدی
وای سیزه پِیغمبَر اُوغُلون ساتمُوسظوز سیم و زَره
سَهلی دور قرآن سیزه لَعنت اُوخُور اِنجیلدَه
قابِلِ لَعنتدی هَر کیم خِیرینی ساتسا شَره
زَحمتِ پِیغمبُرِ اِسلامَه قیمت قویما دوز
صَفحهء تاریخدَه اَعرابَه حُرمَت قویما دوز
اِیستُورم تاریخدَه بیر اِفتخار اُولسُون مُنه
سیز حسین باشین وِیرون دِیریمدَه یار اُولسُون مَنه
نِصفَ شَبدَن چشمهء اِسلامَه عَطشان اُولمُوشام
جُرعه نُوشی اُولماسام صِدقیلَه عار اُولسُون مَنه
فاطمه اُوغُلی گرکدور دِیریمَه وِیرسُون صَفا
مَسلُکِ عُرفاندا صاحِب اِختیار اُولسُون مَنه
سُفرهء فِیضیندَه فِکریم وار اُولام مُن ریزَه خَوار
اِیستُورم سُفرمدَه عِیسی رِیزَه خَوار اُولسُون مَنه
اِیستُورَم طُوقِ صَلیبی گَردنیمدَن رَد اِیدم
گَردَنیمدَه طُوقِ اِسلام اِعتبار اُولسُون مَنه
وِیرمَرم خُولی دِیدی راهب بُو باشی من سَنَه
قُورخُو رام دشمن یَزیدِ فِتنَه کار اُولسُون مَنه
پیرِ رُوشندِل وِیروبدور خُولیَه بیر کیسه پُول
پُول دِیدی گِیتسُون وَلی خوش روزگار اُولسُون منه
آلدی اُون مین دِرهَمَه قانلو باشین بیر ساعَتین
قُوی دِیدی عُمرون خَزانی نُوبَهار اُولسُون مَنه
یُوسفِ عشقی اُوجُوز ساتدوز وای اُولسُون سیزلَره
طُولِ عُمرومدَه بُو آل وِیر یادگار اُولسُون مَنه
خُولی آچدی جَعبه نی باشی وِیروب نَصرانیَه
وِیر دِیدی مِهمان شَهِ والا تَبار اُولسُون مَنه
قانلو باشی آلدی دِقت اِیلدی سیماسینَه
دِیریدَه هَمدَم دِیدی بُو گُلعذار اُولسُون مَنه
چوخ گُوزلدور صُورتی اَفسُوس کُول آثاری وار
لَکّه قُویسام بُو گُوزل صُورتدَه عار اُولسُون مَنه
سُو دَگل لایق گرک مُشک و گُلابیلَن یُووام
تا جَمالِ حَقّ نَماسی آشکار اُولسُون مَنه
میزبان اَهلِ دِل اُولسا دِینجَلَر یُورقُون قُوناق
میهمان دِینجَلسُون اَجرِ بی شُمار اُولسُون مَنه
قانلو باشی شُست و شُو اِیتدی قُویُوب سَجادیَه
قیمتِ عشقیم دِیدی خوشدور عَیار اُولسُون مَنه
ای یاراسی مَرحَمَه حَسرت قالان مَنلَن دانش
صُومعه م قَصرِ بِهِشتِ لاله زار اُولسُون مَنه
بُوینُوما سالدیم قَرا اُولدوم عَزادارون آقا
زندگی دُنیادَه سَنسیز ناگُوار اُولسُون مَنه
گَل دِیلَه دِیندیر مَنی اِنجیلدندَه اَل چَکُوم
عَهد اِیدوم بُوندان صُورا قرآن شُعار اُولسُون مَنه
رُخصَتُون اُولسا حُسینیَه دُوزلدیم دِیریمی
سَجدَه گاهیم خانهء عشق و نِگار اُولسُون مَنه
گُنبدِ دِیره و یا بیر قاره پَرچَم نَصب اِیدوم
حَشره تَک مَبهُوت چَرخِ کَجمَدار اُولسُون مَنه
خوشدی یازسام شَقّهء پَرچَمدَه یا مَظلوم حسین
پَرچَمین گُورسُون کُمَک هر رَهگُذار اُولسُون مَنه
راضی اُولسُون باشوی مِحرابیدَه دَفن اِیلیُوم
باشوَه هر گُون دونُوم کَسبِ وِقار اُولسُون مَنه
قیلدی فَرمایِش حسین تُوحیدَه اِقرار اِیلَه سُن
مُسلم اُول جَنّتدَه قَصرون هَمجِوار اُولسُون مَنه
گُوزلَریم دولمشدی مَطبَخ دَه یُودون خاکّستَرین
حُرمَت اِیتدون قُویمادُون کُولدَن فِشار اُولسُون مَنه
اَللّریم یُوخدور سیلَردیم گُوزدَه کی گُوزیاشوی
دوزمَزیدوم من او گُوزلَر اَشکبار اُولسُون مَنه
من حُسینم کیم مَنه ساری گُوتورسَه بیر قَدَم
مین قدَم گَلّم یَقین اَمیدوار اُولسُون منه
پاک عَزاداریم و یا زَوّاریم ئولسَه قُورخماسُون
قَبرینُون اوّل شبَندَه اِنتظار اُولسُون مَنه
باشیمی دَفن اِیتمَه قُوی چُوللّردَه سَرگردان گزوم
هر باخاندا باشیمَه زِینب خُمار اُولسُون مَنه
فاطمه اُوغلی مَگر عیسادی دار اُوستَن قاچا
شامَه جَک هر گُون گرک تَکلیف دار اُولسُون مَنه
وِیرمَرم مین بِیلَه دِیره خِیزرانُون خِیرینی
بُوسَه آلماقدا اُودا مَعشُوقه یار اُولسُون مَنه
مانِعی یُوخدی گُوزومدَن دِیشلَریمدَن اُوپسَه دَه
مَجلسِ شُربُون گرک تالاری تار اُولسُون مَنه
گُل نِثار اِیللَّه سُلطانَه گُلی من نِیلورَم
طشتدَه ئوز لَبلَریم گُوهَر نِثار اُولسُون مَنه
قانه باتمش لَبلریملَه دَمبدَم یا حَقّ دِیُوم
خالقیم باخسُون ئوزی قیمت گُذار اُولسُون مَنه
اّنتقامیم آلماقا مَجلسدَه دِیلّنسُون باجیم
مَنطقی بُرّانی مثلِ ذُوالفقار اُولسُون مَنه
#انورم بیر نُوحه نُون نَظمندَه پُرشُور اُولمشام
اَرزشی وار دَفتریمدَه شاهکار اُولسُون مَنه
- سه شنبه
- 7
- شهریور
- 1402
- ساعت
- 23:33
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه