جان رُقیّه یُومُولان گُوزلَرَه عَمّوُن قربان
سارالان صُورَتِ خُوش مَنظَرَه عَمّوُن قربان
دِینجَل اِی صُورَتی غَم لالَه سی، نِیلوفَرَی گُول
قِسمَت اوُلدی سَنَه دَه غَملَی آنام گِتدیگی یُول
اِینجِدُون مَندَن عَزیزَه بالا گِیت مِهمان اوُل
قُول قابُورقاسی سِنان مادَرَه عَمّوُن قربان
زِینَبُون اَللّرِی اَفسُوس اَلوندَن اوُزولُوب
آنامُون گُوزلَرینُون بَنذَری گُوزلَر سُوزُولُوب
آلنُووا دُرّ کِیمی گُورنَه سُویُوق تَر دُوزُولُوب
طاقِ اَبرُولَرُون اوُسته تَرَه عَمّوُن قربان
دِلِ شَب لَردَه شیرین دِل بالا هِی قالدُون اوُیاق
شَهپَرُون یاندی شَرارِ غَمَه پَروانَه سَیاق
نَه لِباسُون تَزَه لَندی نَه تِلُون گُوردی داراق
بَنذَرُون اوُلدی گُل پَرپَرَه عَمّوُن قربان
خَرمَنِ عُمرُوَه غَم اِیلدریمی شاخدُوقجا
آخدی اَشگیم یُوزُومَه اَشگِ تَرُون آخدُوقجا
دُویمادیم باخدیم اوُچ اِیل صُورَتُوَه باخدُوقجا
هِی دِیدیم صُورتَه صُورتگَرَه عَمّوُن قربان
خُوشدِی تاریخدَه پَر بَستَه هُما قالسا آدیون
گِیجَه گُوندُوز قَفَسِ غَمدَه مَگر آغلامادُون
وِردی صَیادِ بَد اَندیشَه گُوَیردِی قنادُون
قَلمچِیلَر نِیلی اِیدَن شَهپَرَه عَمّوُن قربان
هاردا گَنجِ عَلَوی اوُلسا بُیُوک قِیمَتی وار
نَه خوش اِقبال یِریمِش بُو اوُچُوق کُهنَه حِصار
جِسمُوَه نرم تُرابی اوُلاجاق بَستَر وار
سَنی آغُوشَه آلان بَستَرَه عَمّوُن قربان
من دِیدیم زِینَب ئولَر دَردینَه سَن آغلارسان
اوُخشامُوندا وار اَثر سینَه لَری داغلارسان
چَکدِیگم زَحمَتَه خاطر قَره می باغلارسان
باغلادِیم مَن قَرَه اوُستن قَرَه عَمّوُن قربان
لَکه سالمِشدی هَوا آق گُله بَنذَر یُوزُوَه
دُوشمَشیدی لَکه آئینَه کیمی هَر یُوزُوَه
تُوکلوبدور هُورُوگُون چِگنُوَه تِل لَر یُوزُوَه
ساچلارا طُرهء بی مَعجَرَه عَمّوُن قربان
مَنَه باخما آنُووا باغ سِخلوب بیر بُوجاقا
یُوزَه چَکمِش لَچَگین باشنی سالمِش آشاقا
چون مُقیّد دِی بی بُوندَن گلَه بُلمُور قاباقا
قالدی حَسرت سَنَه هَم اَصغرَه عَمّوُن قربان
گَلدی دِیدارَ اِیدَه سَندَن بُو گِیجَه مِیرِ اَنام
آلدُون آغُوشُوَه مَست اِیتدی سَنی عَطرِ اِمام
قُوجاقوندان یِرَه باش دُوشدی دِیدیم ئولدی بالام
هَم سَنَه هَم او سَرِ اَطهرَه عَمّون قربان
عِشقوِین پایَه سِینی اِیلدُون عالَملَرَه فاش
خَستَه جانُون سَرِ جانانوَه اوُلدی شاباش
بِیلَه ئولمَک مَنه دَه قِسمَت اوُلیدی اِی کاش
جان اِیدِیدی سَرِ بی پِیکرَه عَمّون قربان
گَلسَه غَسّالَه یُووار جِسمُوی ظُلمَتدَه نِجَه
کاش اوُلِیدی چِراغیم رُوشن اِیدِیدُوم بُو گِیجَه
گتُورِیدُوم یُوئوجی غُسلوِى قُویمِیدی گِیجَه
دِلِ شَب یاخشیدی خِیر اِیشلَرَه عَمّون قربان
نُکتَه باریکیدِی گُوندُوز سَنَه غُسل اوُلسا اَگر
اوُندا کِی غُسل وِیرَن کُوینَگُوِی خارج اِیدَر
تازیانیلَه گُوَیرمِش بَدنی هامّی گُورَر
حَشر اوُلار عِترَتِ پِیغَمبَرَه عَمّون قربان
- سه شنبه
- 7
- شهریور
- 1402
- ساعت
- 23:41
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه