فَراق اِیویندَه نَه مُدّتدی مَنزل اِیلَمشَم
اُمیدِ وَصلیلَه هِجرَه تَحمل اِیلَمشَم
وِصال عالَمِینی یاد اِیدوب اوُزون گِجه لَر
اوُنیلَه غَملَریمی دِلدَه زایِل اِیلَمیشَم
اوُلوبدی هَم نَفسِیم بُو قُورِی قفَس قارداش
بُونیلَه حَلِ جَوابِ مَسائل اِیلَمیشَم
بَلی بَلایه دِیوب اِیتمشَم بَلانی قَبُول
بُو خَستَه جانیمی هَر دَردَه مایِل اِیلَمیشُم
سَنون یُولوندا مَنَه هَر بَلا یِتَه خُوش دور
اوُزیمی مَن او بَلائیلَه خُوشدِل اِیلَمیشَم
قدَم بُو دایرهء عِشقه قُویمُوشام اوّل
هامی بُو دُوره نی طیّ مَراحِل اِیلَمیشَم
دِبیر اوُلوب مَنه عِشقُون وِیروب وَفا دَرسین
وَفا و عِشقیمی عِشقونلَه کامِل اِیلَمیشَم
بُو کُوی عِشقدَه گر ئولمَسَم نَه عِشقِیدی بَس
بُو عشق نامه نی اوّلدَه مُقبِل اِیلَمیشَم
اِیدندَه لُوحِ دِلَه نَقشِ صُورتون تَصویر
شَمایِلُون نَظریمدَه مُقابِل اِیلَمیشَم
گُوزیمدَه جِلوَه لَنُور جلوهء جَمالُون على
هامی وِجودیمی مَحوِ شَمایِل اِیلَمیشَم
دُوشندَه بَحرِ غَمَه غَرق اوُلان زَمان جِسمیم
کنارِ عِشقوِی اوُل بَحرَه ساحل اِیلَمیشَم
بُو جِسمِیمَه یِتیشَه تازَه جان گُورَم بیردَه
قُولومی بُوینوا قارداش حَمایِل اِیلَمیشَم
وِصال تَشنه سِیم قِسمَت اوُلسا لَعلِ لَبُون
بُو دردَه بُولَم على چارَه حاصِل اِیلَمیشَم
سَنُون خیالُویلَه فِکریمی آتُوب باشدان
على بُو وَقته اوُزومدَن تَغافل اِیلَمشَم
خیال اِیدردَیم هَمِیشَه سَنی اِیدم داماد
وَلی بو باردَه بیر فکرِ باطِل اِیلَمشَم
او زُلف و کَاکِلُوی خاطره سالُوب سَنسیز
ئولونجَه تَرکِ چَمن مِیلِ سُنبُل اِیلَمشَم
اِیدندَه جلوَه نَظردَه او گُل جَمالُون على
گَلُوب فَغانه نَوا هَمچُو بُلبل اِیلَمشَم
گُونُوزلَر اَگلشُورَم گُوندَه گُون قَباقِندا
گُونُون شُعاعنی بُو باشدا حایِل اِیلَمشَم
اِیکی گُوزومی علی تِیکمِشَم سَنُون یُولوا
گُوزُوم یاشیلَه یازُوب نامَه حامِل اِیلَمشَم
#سهیلیم مَنه اِئت بیر کرَم علی اَکبر
اؤزومی دَرگهِ لُطفوندَه سائل اِیلَمشُم
- سه شنبه
- 7
- شهریور
- 1402
- ساعت
- 23:46
- نوشته شده توسط
- یوسف اکبری
- شاعر:
-
میرزا احمد سهیلی
ارسال دیدگاه