او ساعَتی که حُسینُون آلیشدی خَرگاهی
فَلکدَه خرگهِ غَم قُوردِی زِینَبِون آهی
چَکیلدی دُودهء آهیله نُه قُبابَه قَرا
اوُلوندی ماتَمَه آمادَه ماه تا ماهی
هانی بُولَن نِجَه یاندی خِیَم، کیم اوُد وِوردی
دِیسَم مَلالَه گتُورّم اِمامِ آگاهی
نَه غارَت اوُلدی؟ نَه تاراج؟ اوُنی بُولَر اَهلی
آچُوق سُوزی دِیماقا نِطقیمُون وار اِکراهی
وَلیّ حَقّ باشینی نِیزیَه وِوران لَشگر
تَصَوّر اِئت نِجَه سُویماز ولیّةُ اللّهی
نَه نُوعی عَمّهء ساداتی سُویدُولار سادات
ئولونجَه آغلاسا آز دور نَه سال و نَه ماهی
مُعذّب اوُلدی اُبُوالفَضل رُوحی رِضواندا
که دَفعِ ظُلمَه یِتیشمَزدِی دَستِ کُوتاهی
اوُلار که اَکبَر و عَبّاسیدَن آجیقلیدی
بَهانَه اِیلَدی تاراجِ خَرگهِ شاهی
اَلیندَه قَمچی کَسُوب خِردا قیزلارِین قاباقین
اوُلوردِی سدِّ؛ سِتملَه قاچانلارِین راهی
گُورندَه آتلی گَلور هُولِدَن اوُزین اِیتیرُور
اوُشاقلارِین اوُجالور عَرشَه آهِ جان کاهی
بیری گُورُور که گلور آتلی، جدّینی چاغیرُور
بیری اُمیدِ تَمامیلَه سَسلَر آللّهی
بیری تاپانمُورِی یُول گه صاقا صُولا گِیدُوری
گهی دورُور قاییدُور خِیمِیَه طَرف گاهی
بیریسینُون بَدنی کِتفی زَنبَقه بَنزَر
وَ لِیک رَنگِ عُذارِی نِشان وِیرُور کاهی
رُقیّه آتلی گُورندَه دُوشَردِی نَه حالَه؟
سُودان کنارَه دُوشندَه نِشان وِیرُور ماهی
جَلال و شُوکتی هر چَند گِیتدی تالانَه
وَلی حُسینُون اَله گلدِی عُمدَه دِل خواهی
او غارَت اِیلورِی آلِ اُمَیّه نی رُسوا
جَهانیانَه بُو مَطلَب اوُلوندی آگاهی
نه سُوزیدِی #شأنی که نُوکِ قَلمدَن اوُد تُوکُولُور
نِشان وِیرُور نَفَسُون اوُدلاناندا خرگاهی
- سه شنبه
- 7
- شهریور
- 1402
- ساعت
- 23:59
- نوشته شده توسط
- یوسف اکبری
- شاعر:
-
مرحوم حسین شانی تبریزی
ارسال دیدگاه