نِهضَتِ خونینِ عاشُورا حِساب اوُسُتُوندَه دور
هم نَماز اوُستُوندَه هَم حِفظِ حِجاب اوُستُوندُه دور
قانیلَه کَرب و بَلانین دَشتی یِکسَر دُولماقی
گُلشُنِ حُریَتین سُوزِ عَطشدَن سُولماقی
اَصغَرین حَلقی نِشانِ تیرِ عُدوان اوُلماقی
هَم نَماز اوُستُوندَه هَم حِفظِ حِجاب اوُستُوندَه دور
قَتلگاهِ شاهِ دِین قانیلَه دَریا اوُلماقی
جُلوهء اَسرارِ حَقدَن طُورِ سینا اوُلماقی
سینَه سی آماجِ تیرِ قُومِ اَعدا اوُلماقی
هَم نَماز اوُستُوندَه هَم حِفظِ حِجاب اوُستُوندَه دور
بیر قُولاق وِیر زِینَبِین فَریاد و وا ویلا سینَه
جان و دِل یاندُور شَرارِ شُعلِهء آوا سینَه
دَستگیر اوُلماقلیقی دَشتِ بَلا اَعدا سینَه
هَم نَماز اوُستُوندُه هَم حِفظِ حِجاب اوُستُوندَه دور
اَکبَرین تُوپراقلار اوُستَه خونِ پاکی آخماقی
یاندُیرُوب قَلبِ جَهانی نارِ هِجرِی یاخماقی
چِشمِ خُون بارِی آنایَه نُوکِ نِیدَه باخماقی
هَم نَماز اوُستُوندَه هَم حِفظِ حِجاب اوُستُوندَه دور
قاسِمِ شَهزادَه نین آمادهک جَنگ اوُلماقی
جِسمی آماجِ خَدَنگِ قِومِ پُر نَنگ اوُلماقی
ظُلمیلَه مَقتُول اوُلوب قانیلَه هَمرَنگ اوُلماقی
هَم نَماز اوُستوندَه هَم حِفظِ حِجاب اوُستُوندَه دور
آچ گُوزُون اِی مُدّعی عَبّاسَه عاشِق سَن اَگر
بُول نَدَن اوُترِی اوُلوب عُنقا کِیمی بی بال و پَر
چِشمِ بینا کِیمدَه وار بُو سِرّی یاخشی دَرک اِیدَر
هَم نَماز اوُستُوندَه هَم حِفظِ حِجاب اوُستُوندَه دور
نُوکِ نِی دَه هَر باشی مَحصُور اِئدَن قان هالِه سی
هَر گُولَه بَنذَر یُوزُون خُونِ دِل اوُلماق ژالَه سی
قُوللّاری باغلی رُبابَین وای اوُغول وای نالَه سی
هَم نَماز اوُستُوندَه هَم حِفظ حِجاب اوُستُوندَه دور
اِی ساتانلار دِینی دُنیایَه یاتانلار قَصردَه
عاقِبَت بیر گُون اوُلار سِیزدَه یاتارسُوز قَبردَه
قُولِ حَقّی دَرک اِئدُون شَرطِ شَفاعَت حَشرِدَه
هَم نَماز اوُستُوندَه هَم حُفظِ حِجاب اوُستُوندَه دور
شاهِ گُلگُون پِیکَرِین باشدان جَهانی آتماقی
دِلدَه شُورِ وَصلِ دِلداریلَه قانَه باتماقی
طائرِ عَرش آشیانین تُوپراق اوُستَه یاتماقی
هَم نَماز اوُستُوندَه هَم حِفظِ حِجاب اوُستُوندَه دور
ئوز دِیارِیندَن کَسُوب تا اُلفَتِین سُلطانِ دِین
نِیزَه باشیندَه مَکان اِئتدِی وَلی خُونین جَبِین
قانلی لَبلَرلَه تَلاوَت اِئتماقی کَهف آیَه سِین
هَم نَماز اوُستُوندَه هَم حِفظِ حِجاب اوُستُوندَه دور
ناقَه دَه زِینَب دِئیَندَه اِی شَهِ دُوران حُسین
رُوحِ قرآن سان اوُخی قرآن سَنَه قُربان حُسین
قُوی بُولَه رازِ قیامُون عالَمِ اِمکان حُسین
هَم نَماز اوُستُوندَه هَم حِفظِ حِجاب اوُستُوندَه دور
باشلادِی تا ناقَه اوُستَه دُختِ زَهرا خُطبَه سِین
زِندَه اِئتدی کُوفَه شَهرِیندَه سَسی مُولا سَسین
اَمَر اِئدُوب بُولسُون بُو نِهضَت وار شُعُورِی هَر کَسِین
هَم نَماز اوُستوندَه هَم حِفظِ حِجاب اوُستُوندَه دور
گُوز یاشُوز خُشک اوُلماسین دُنیادَه اِی قُومِ ظُلام
کُور اِئدُوبدِی سِیزلَری بَرقِ زَر و فِکرِ مَقام
دَرک اِئدُون گر ذَرِه جَه اِنصافُوز اوُلسا بُو قِیام
هَم نَماز اوُستُوندَه هَم حِفظِ حِجاب اوُستُوندَه دور
دور ما دوز هِئچ بیر زَماندا عَهد و پِیمان اوُستَه سِیز
اِیندی گُور دوز بِیزلَری ظاهِردَه اوُلُدوز اَشگ رِیز
لِیک بُو قُول باغلی، دِل داغلی پُوزُولمُوش حالِی میز
هَم نَماز اوُستُوندَه هَم حِفظِ حِجاب اوُستُوندَه دور
اِی حُسین اِی پَرتُوِ اَنوارِ حَیّ لامَکان
بُو سُوزَه وار دور #شکیبین اِعتقادِی هَر زَمان
قانَه غَلطان اوُلماقُون لَب تَشنَه اِی شاهِ جَهان
هَم نَماز اوُستُوندَه هَم حِفظِ حِجاب اوُستُوندَه دور
#شادروان_شکیب_رحمة_الله_علیه
- چهارشنبه
- 8
- شهریور
- 1402
- ساعت
- 0:3
- نوشته شده توسط
- یوسف اکبری
ارسال دیدگاه