دور یاتما زواریم گلور قارداش ابولفضل
یورقون بالالاریم گلور قارداش ابوالفضل
قرخ گونون عرضینده باجیم گورنه قوجالیب
سوسوزلوقدان بالالاریم سولوب سارالیب
معلوم اولان بیر عده سی یولاردا قالیب
محرم اسراریم گلور قارداش ابوالفضل
چوخلی مصیبته دوزوب کرب و بلاده
کوفه و شامی دولانوبیب پای پیاده
بیر نظر گوزدن قویموب منی جداده
یار وفاداریم گلور قارداش ابوالفضل
واردور باشیندا زینبین چوخ ماجراسی
باجیمون گلمز شماره درد و بلاسی
توخدامیب ئورگینین هله یاراسی
قافله سالاریم گلور قارداش ابوالفضل
دور پیشواز ائت زینب نالانی قارداش
آغوشینه وئر اصغر عطشانی قارداش
جانیم اولا زینبمین قربانی قارداش
یاتما اویان یاریم گلور قارداش ابوالفضل
نهضتی احیا ایلین زینبدی زینب
برپا قیامت ایلین زینبدی زینب
یزیدی رسوا ایلین زینبدی زینب
وفالی دلداریم گلور قارداش ابوالفضل
بو کاروانیله گلور حسینین جانی
دور یاتما استقبال ایله بو کاروانی
وئر زینبین آغوشینه اوخلی قربانی
غم گونی غمخواریم گلور قارداش ابوالفضل
اصغره لای لای دیئری آغلیری زینب
اوغلی ئولن آنالاری داغلیری زینب
قرخ گوندی باشینه قرا باغلیری زینب
یورقون عزاداریم گلور قارداش ابوالفضل
- شنبه
- 25
- شهریور
- 1402
- ساعت
- 0:34
- نوشته شده توسط
- یوسف اکبری
- شاعر:
-
حاج صمد قاسمپور
ارسال دیدگاه