یارالی باشُوَه قربان منِ کُلباش على قارداش
جُدادَه گُونکیمی شامَه گِیدَر بیر باش علی قارداش
مَنیم لُوحِ ضَمِیریمدَه چَکوب نَقّاش تَصوِیرون
سالوب دور بُوینُوما رِشتَه سَرِ زُلفِ گِره گِیرُون
باشُون گِیتدوقجا مَن گلّم عَجَب مُحکمدی زَنجیرون
ازَل گُوندَن بُو زَنجیری قرِیدِیم کاش علی قارداش
جُدادَه سُنبلِ زُلفون او گُل رُخسارَه اَفشان دور
مَنیم بُو قان اُولان گُوگُلوم او دور چون شانَه شان شان دور
پَریشان زُلفون عِشقوندَه اِیلَه حالِیم پَریشان دور
گُوگُل قانَه دُونُوب گُوزدَن آخار قان یاش علی قارداش
بُولود تَک حَلقهء زُلفون سالوب مَه صُورته هالَه
او هالَه گُور منی قارداش سالوب آخر نِجه حالَه
اِیدندَه نِی کِیمی نالَه اُولور زَنجیر هَمنالَه
سیزیلتیمدان مَنه اُولمُوش جَرس یُولداش علی قارداش
اُولوب عُمریم گُونُوم قاره علی زُلفِ سیاهوندَن
اَسیرِ عِشقیوِی سالما کنارَه اُوز پناهُوندَن
کمانِ اَبرو خَدَنگِ غَم آلوب طرزِ نِگاهوندَن
وِروب دور قَلبیمَه مین اُوخ او بیر گُوز قاش علی قرداش
چَکُوب لوحِ جَبینوندَه اُوز عَکسین بی بَدَل مانی
مُتَرجِم اِیلیوب خَط خَط تَمام آیاتِ قُرآنی
اِیدوب اُوز قُدرَتین ظاهر یازُوب اِنا فَتحنانی
بُو نَقشَه مَحو اُولور دِلدَن باخان نَقّاش علی قارداش
اِیدندَه نالَه و شیوَن گَلندَه داد و فریادَه
وُرالّار قَمچی باشیمدان گُلور لِیلا آنام دادَه
دِلیم دُوتمُور دِیُوم شِمرَه اَمان وِیر اِی زِنا زاده
دُویُونجا اِیلَسُون صُحبَت باجی قارداش علی قارداش
گُوزیمدَه اِیلوری جِلوه سَنُون تَک قارداشیم باشی
گُوگُل بی اِختیار آغلور دُونُور قانَه گُوزُوم یاشی
گُوز آچ باخ گُور نه ظُلم اِیلور بُو شام و کُوفه اُوباشی
سَنُون بُو سُوگلی باجُون دُوگُور اُوباش علی قارداش
قُولُوم باغلو اوُزوم خَسته اوُزاق یُول باشدا یُوخ مَعجَر
قووُالّار آت قَباقیندَه مَنی بُو رَحم سیز لَشگر
یُوزیمدَه نیلیِ سیلی دِلیمدَه وای علی اکبر
یانیمدا قَمچی اَللّردَه نِچَه فَرّاش علی قارداش
#حسینی نُوکَرون اِیلور گِیجَه گُوندوز سَنه خِدمَت
رِضا اُولما قالا قارداش او قَبرِ پاکِیوَه حَسرَت
اُونا بیر اِلتفات اِیلَه وَلِیکَن قُوى مَنه مِنّت
نُولُور لُطف اِیلسَن بیر دانهء خشخاش علی قارداش
- شنبه
- 22
- مهر
- 1402
- ساعت
- 21:27
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه