هِدایَتِین گُونی چُون کَسدِی کُوندَن اِشراق
جَهانی چُولقادِی ظُلماتِ کُفر و بُغض و نِفاق
بَسیطِ فَرشِ مُطّبقَ دُولُوب نَوائیله
فَغان و نالِیَه گَلدی سِپهرِ نیلی طاق
هِدایَت اَهلِینی بُو غمدَه اِیتدی خاک نِشین
جَفای گُنبدِ فِیروزِه رَنگِ پَستِ رَواق
جَهان سَراچِهء اَندوه آدِیلَه آدلاندِی
نَبیّ اَکرمهِ تا اوُلدی باغِ خُلد وِثاق
نه تَک جَهان، هامی دُنیای خِلقَت اوُلدی مَلول
بُو جانگُداز بَلا کُونَه تاپدی اِستِغراق
هِدایت اَمرِینی قُورتاردِی گِیتدی دُنیادَن
او نَفسِ هادِی مُوسی و آدَم و اِسحاق
او سِیر اوُلدی جَهاندان زِ بَس گُورُوب آزار
هَنُوز اهلِ وَفا و وَفا اوُنا مُشتاق
مَعانِدِینین اوُلوب مُنتهای کامی رَوا
مُحِبّ لَر اوُرَگِین اوُدلادِی شَرارِ فَراق
دُوبارَه اوُلدی قَدیمی عِنادِیلَر ظاهر
قِیریلدِی زُورِ تَعصّبلَه رِشتهء مَیثاق
وَصیّتِ نَبوی تَرک اوُلوندی دَست بِه دَست
نِظامِ جامِعهء دِینی پُوزدِی اَهلِ شَقاق
بِنای ظُلم و تَعدّی قُویُوب مُنافِق لَر
اَساسِ مَذهبی یِخماخلِیقا اِیدِیبلَه وَفاق
عَرب تَعصّبِ ذاتی سِین اِیلیُوب ظاهِر
کُهن رُسُوم اوُلوب تازَه بِدعَته اِلحاق
کَراهَتیلَه صَنَم تَرکین اِیلِیَن کَسلَر
صَحیفهء دِله عَکسِ بُت اِیلیُوب اِلصاق
قُورُوبلا حَلقهء بیداد و کِینه تا اوُلسون
کتابِ شَرع و دَیانَت او جَمعِیلَه اوُراق
خَلِیفَه اِیتدیلَه بیر اِستقالَه جُو شَخصی
بو شَرَّ مَحضَه نِفاق اَهلی اِیلیُوبلَه تَفاق
اَبُو قَحافَه نِین اوُغلی قَمِیص اَخذ اِیلدی
خِلافَت اَمرِینی ظُلماً نَه روی اِستِحقاق
بِیلَه بِیلَه که علی نِسبَتِین خِلافتلَه
همان تَناسُبِ قُطب و رَحیً اِیدِیب خَلاّق
هَوانی اِیلَدِی مَسمُوم زَهرِگین اَنفاس
آزیبدی یُولدان اِیدَن بُو هَوانی اِستِنشاق
عَلینی خانه نِشین اِیتدی خانه وِیرانلار
مَهِ سِپهرِ هِدایَت تاپیبدِی حالِ مُحاق
گَلیبدِی جِلوه یَه شَب تاب کِرم لَر گُورجَک
هِدایَتِین گُونی آفاقِیدَن کَسیب اِشراق
هامی مُحِبّ لَرین قَلبِینی غَم اِیتدی کَباب
خُصُوص فاطِمَه نی غُصّه اِیلَدِی بی تاب
صَفای گُلشنِ دِین، نِزهَتِ بِهشتِ وِلا
بَهای گُوهرِ عِصمَت، چِکیدهء تَقوی
یِگَانه خاطرِهء زِنده نَفسِ طاهادَن
هامی مَراتبِ فَضل و کَمالیدَه یِکتا
حَیا خَزِینِهء مَخفی، او کَنزِه بُو، گُوهَر
عِفاف مَشعلِ رُوشن او مَشعلَه بُو، ضِیا
بَسیطِ خاکیدَه مَحدود، شاهِدِ قُدسی
نِجَه که ضیقِ عبارَتدَه وُسعتِ مَعنا
حَیا تَجُسّمی، عِصمَت مِثالی، دِین شَرحی
وَفا ثَبوتی، صَفا شَکگی، صَبر و سَلمَه رِضا
بِهِشت جِلوه و حُورا سِرِشت، اَمّا نَه
بَتول و فاطِمَه بَس، نَه بِهشت نَه حُورا
رِکُوعِینَه مُتَذَلّل، عَناصُرِ عَلوی
سِجُودِینَه مُتواضِع صَوامِعِ عُلیا
نَفس حِصارَه دُوشُور سِینَهء مَلائکَدَه
اِیدندَه زَمزَمهء لاشَرِیکَ لَه، زَهرا
حَریمِ سایَه سِینَه دور باشِ عِصمَتدَن
نِفوذ اوُلمُوب اِیدَه نورِ مَشعلِ بِیضا
او مَه یُوزُون عَظمَت هالَه سی، اِیلَه بُورویُوب
که یُوخ تَصوّرِ مَعنایَه فِکریدهَ یارا
بیو آرِزُوئیلَه سَر گشتَه دور نَسیمِ جِنان
که خاکِ کُویُون اِیدَه، کَحلِ دِیدهء حُورا
دُوتاندا اُوز گُویَه وُجَّهتُ نَغمه سی دِلدَه
دِئیِب خُلُوصِینَه سُکّانِ عَرش آمِنّا
گُلِ بِهشت وِئرِیب باش کَوِیرِ غَبرادَه
مَگر که آرتیرا بُو شُورِه زارَه ذُوق و صَفا
سِمُومِ حادِثَه اَسدی و لِیک گُلشَنِینَه
قَرار و طاقَتِینی دِلدَن اِیلَدِی یَغما
بَهار اَبری کِیمی دُولدی حقّ گُورَن گُوزلَر
شَقایِق اُوسته نِثار اِیتدی لوءلوء لالا
بَهاری اوُلدی خَزان رِحلَتِ پِیمبَردَن
اِیشقلی گُوندُوزُونی اِیتدِی غَم، شُبِ یَلدا
آتا فَراقی گَتِیردِی اوُنی اِیلَه دَرده
که مُونسی گِیجه گُوندُوز اوُلوب فَغان و نَوا
اِیله سِیزلدادِی دِلدَن آتا فَراقِیندَه
که گَلدی نالَه و فَریادَه صَخرهء صَمّا
آتاسی چَکدِیقِی زَحمَتلَری خِیالَه سالیب
اوُلوردِی صُبح و مَسا، وِرد و ذِکرری وا اَبَتا
اُوجالدِی شِیوَن و فَریادِی شَهرِ یَثرُبدَن
بَتول ناله سی شُورِ قیامت اِیتدی بِپا
عَدو جَفاسی، نَبی فُرقتَی، علی مُحنی
گَتِیردِی نِی کِیمی فَریادَه قَلبِ فاطِمَه نی
پِیَمبَرِین قِیزِی شاهِ وِلایَتَه هَمدَم
حَریمِ عِصمَتِینَه چِشمِ ماه نا مَحرَم
هامی خَلایِقَه مَختُومَه اُوجِ رُتبَتدَن
هامی عَوالِمِ اِمکان وِلاسِینَه مُلزَم
نَه تَک وِجُودِی اوُلوب فَخرِ دُودهء طاها
که اُولمُوش اُونلا مُباهی سُلالهء آدَم
اِیلَه سِیخیلدِی مَصائبدَه قَلبِ آگاهی
که اِیتدِی اَشگِ رَوان چِشمَه سارِ چِشمِینی یَم
کِنه یِتُوب او مَصائب بُویُوردِی تَلویحاً
اوُلور گُونُوزلَرَه یِتسَه لَیالیّ مُظلَم
حَدیثِ غَصبِ فَدک، ماجرای سِقطِ جَنین
بَتُولی چَکدی بَلا دامَینَه قدَم بَه قَدَم
وُوریبلا مُهبطِ تَنزِیل و وَحیَه آتشِ کَین
اوُلوبدی صَدمِهء مِسمار زَخمِینَه مَرهَم
بَنای دَهر عَجب دور که اُولمادِی فانی
یاناندا ظُلمِیلَه دَرگاهِ مِیرِ حِلّ و حَرم
اِیدِیبِ صَحیَفِهء جِسمِیندَه نِیلگُون خَطلَه
عَدُو جَفاسِینی دَستِ سیاطِ ظُلم رَقم
وِیرندَه غُسلینی لَمس اِیلدی او خَطّی علی
نَلَر حِکایت اِیدُوب بُیلمَم اُول خَطِ مُبهَم
که شیرِ داوَری آغلاتدِی های هائیلَه
حَیاتیدَن اُولوب آزردَه حال امامِ اُمَم
آچاندا ظُلم اَلی نامُوسِ کِردگاره عَدُو
نَه حالَه قالدِی علی یازماقا خَجِلدِی قَلَم
اِمامِ کُون و مَکان لَنگرِ زَمین و زَمان
اِیدَن مَبانیّ اِسلامی تِیغیلَه مُحکَم
گُورَندَه گُلبنِ عِصمَت اَسِیر دور خارَه
او باغبانِ وِلا چِشمی اُولدی پُر شَبنم
او خاری صاعِقَه تَک یاندِیراردِی شُعلهء تِیغ
وِقایَه اوُلدی وَلی اَمرِ سِیّدِ اَکرَم
دایاندی لِیک نَه اوُز وِیردِی غِیرتُ اللّهه
اُوزی بِیلِیبدِی فَقَط بِیردَه خالقِ عالَم
او شَمعِ خلوتِ عِصمَتدَن آلدِی جِلوَه دِیمم
چراغِ دِیدهء تاریکِ قومِ ظُلم شِیَم
مَحالدور گُوره آیاتِِ حَقّ دَقایِقینی
او گُوز که پَردَه چَکیب نُورِینَه غَشای ظُلَم
دِیمَه او عارِضی نا مَحرَمین گُوزی گُوردِی
عِفاف پَردِهء ذاتی دِی عِصمَتَه مُنضَم
جَمالِ آینهء حَقّ جَلا و جِلوَه سِینی
شَوائبِ نَظرِ باطل اِیلمَز بَر هَم
گُونَه دَقیق اوُلانُون تار اوُلار جَهان گُوزُونَه
شُعاعَیلَه وِیرار اوُخ مِهرِ آسمان گُوزُونَه
- شنبه
- 22
- مهر
- 1402
- ساعت
- 21:31
- نوشته شده توسط
- یوسف اکبری
- شاعر:
-
محمد عابد
ارسال دیدگاه