("کاروان رفته منزل به منزل" وزنینده)
گل باجێ اصغریم قانه باتدێ
امدی پئیکانی مقصوده چاتدێ
اۆچ‌پر اوْخ چالدێ لای‌لای بالاما
دینجه‌لیب اللریم اۆسته یاتدێ
من اۇتاننام گله‌م خئیمه‌گاهه
گل باجێ سن اؤزۆن وعده‌گاهه
گل گؤره‌ک نئیلییه‌ک بۇ بالانێ
طاقه‌تیمی الیمده‌ن آلانێ
دفن ائده‌ک یا وئره‌ک بیز روبایه
گیزله‌ده‌ک یا کی بۇ ماجرانی
اصغری گؤرسه هئچ تاب ائده‌نمه‌ز
کربلاده اؤله‌ر دای گئده نمه‌ز
سن چاغێردۇن منی غملی خواهر
گل حسین جان وئریر تئشنه اصغر
آل روبابین بالاسێن الینده‌ن
یوْرقۇن اوْلدۇ بۇ غمدیده مادر
غۆصصه‌ده‌ن گؤر نه حاله قالێبدێ
اصغرین دردی دیلده‌ن سالێبدێ
ال آیاق چوْخ چالێب آغلامێشدێ
آغلایێب داغ-داشی داغلامێشدێ
چنگ آتێب اؤز گؤزۆن پارچالاردێ
اللرین مادری باغلامێشدێ
چیرپینیب دۆشمیشیدی نفسده‌ن
اینجیمیشدی اوْدۇر بۇ قفسده‌ن
آلتێ گوشه بئشیک اشتیاقی
مست ائدیب آلتێ آیلێق قوْناغێ
سینه‌می ائیله‌ره‌م حشر اوْلۇنجا
اصغرین آلتێ گوشه اوْتاغێ
بۇ یارالێ باجێ من یارالێ
سینه‌مین خوْشدۇ اوْلسۇن میدالی
ایستی گۆن شدّتیله شاخاردێ
اصغریم دیسگینیب چون باخاردی
ایستی سالمێشدێ حالدان بالامێ
گاه باخێب گؤزلری گاه آخاردێ
نیسگیلی چوْخدۇ دیلسیز بالانێن
گل ائشیت ماجراسین بالانێن
اصغرین گؤزلری هئی سۆزه‌ردی
قلبیمین ریشه‌سین لاپ اۆزه‌ردی
آغلێیا بیلمئیوردی عطشده‌ن
لب‌لرین مثل لاله بۆزه‌ردی
اوْخ دگه‌نده دوْداقلارێ قاشدێ
لب‌لری قالدێ حلقی گۆل آشدێ
پئیکرینده باجێ یوْخ یاراسێ
یوْخدۇ حتّی دئسه‌م چوْخ یاراسێ
باورون یوْخدۇ گل باخ اؤزۆنده
وار بوْغازێندا بیر اوْخ یاراسێ
حرمله چلّه‌سینده‌ن چێخێبدی
اوْخ دگیب گل ائویمی یێخێبدێ
اصغری اوْخ سالێب گؤر نه حاله
آسلانێبدێ باشێ مئثل-ی-لاله
گؤردۆ من آغلۇرام غئیرتینده‌ن
گۆلدۆ هئچ ائتمه‌دی ذرّه ناله
سینه‌مه نخل-ی-ماتم اکیبدی
غئیرتی مُرتضیٰ‌یه چکیبدی
اوْ منه گۆلدۆ من چوْخ اۇتاندێم
یاندێم اصغر جانی باجێ یاندێم
گؤزلریم گؤرمه‌دی خئیمه‌گاهی
ساق-سوْلا قتلگهده دوْلاندێم
اصغریم قلبیمی چوْخ سێخێبدێ
اکبرین دردی یاددان چێخێبدێ
سسله‌دیم گل ابالفضل آماندێ
وئرمه‌دی سس سسیمه یۇباندێ
چوْخ ادبلیدی ین کی بیلیرسن
قارداشێم اللرینده‌ن اۇتاندێ
صۆد امه‌رده منی بوْشلئییبدی
کۆسدۆ منده‌ن اوْخۇ خوْشلئییبدی
زحمتی وئردی آخر نتاییج
سکّه‌سی عالمه اوْلدۇ راییج
کربلاده بیر ایش گؤردۆ اصغر
رُتبه‌سی اوْلدۇ باب‌الحوائج
کیم دخیل اوْلسا بۇ شیرخواره
دردینه ائیلییه‌ر فوری چاره
شاعر:نقوی خلخالی